宇宙傳送門: 1.12

現時晏就四點十六分，事隔多日嘅我終於開聲，邀請少女日星一齊去買餸。

「哦…好吖。」少女顯得有少少愕然。

我都好耐冇正面注視過佢，睇耐咗先發現佢而家身上嘅衣著仍然係同幾日前第一次見佢嘅時候一樣。

「你..冇冲過涼？」我小心咁問。

佢雙手快速遞出嚟，連同個頭一齊左右搖動「唔係吖！我有沖㗎。係冇換衫啫…」佢急於解釋，但最後嗰句變得冇乜力。





見佢冇衫換，我就去我媽間房，打開咗個衣櫃，然後示意佢入嚟。

「你唔介意嘅，自己揀嚟着住先啦，你同我媽差唔多高，應該啱嘅。」

佢猶豫咗幾秒「真係可以？」

「橫掂都已經係冇人着。」我行出房，順手閂埋門。

係等少女換衫嘅期間，我坐咗係圈圈隔離，抱起佢嚟摸。





呢幾日，我連圈圈都好耐冇理過，好彩佢都冇點嬲我，願意俾我摸。

少女出返嚟，佢揀咗件我冇乜點見過嘅普通灰色Hoodie，黑色牛仔褲。佢咁着出嚟，完全唔似係我媽嘅衫。

「行㗎啦喎。」我放低圈圈。

「嗯。」少女過嚟幫我拎咗個環保袋。

我屋企附近最近嘅街巿大約要行十分鐘，而我距離上一次嚟呢個街巿都有幾個月，之前一向都叫外賣或者食罐頭。





嚟到街巿，我係一頭霧水，唔知應該由咩開始，反而係少女帶領住我。

「以前我成日自己去買餸。」少女邊講邊物色緊有咩靚嘢。

「10蚊吖，靚女。」菜檔檔主問少女攞錢。

少女望住我，用眼神同我講，佢冇錢。

我將成個銀包都俾咗佢，根據而家呢個狀況，都係佢負責揀同買，我就係負責勞力。

「你未嚟我屋企之前，你啲錢係點嚟？非法勞工？」我忽然醒起，其實呢個少女仲有好多未知嘅問題。

佢左望望，右望望，然後挨近我，抬起頭細細聲同我講「偷返嚟！」

佢講完又若無其事咁繼續買餸。





「咩呀？！你偷嘢？」雖然我大聲叫咗出嚟，但係街巿裏面都係普通聲量嚟。

「放心啦，我好小心㗎。何況都只係幾百蚊啫，我一個人嚟到呢個陌生嘅地方，身無分文，又冇身分證。我需要幾多就攞幾多㗎咋。」佢再一次若無其事咁安慰我。

我停低諗咗一陣「有咩分別呀？！」差啲俾佢嗰個奇怪嘅邏輯混淆咗。

「係邊呀？」我追問。

「街巿。」

「！」

「唔係呢度吖。咁我冇嘢落肚，都係逼不得已啫。」





「Okay okay，知啦。總知你以後唔好再咁啦。」佢真係一個莫名其妙嘅少女，平時見佢怕怕羞羞咁，真係估佢唔到。

「哦。」佢笑住咁答我。

「笑咩呀？」

「冇，我覺得你心情好似好返啲。」佢又將頭髮撥去耳仔後面。

「你邊隻眼見到我心情好呀而家？」心情有冇變我就唔知，但的確今日我講嘅嘢夾埋都比前幾日多。

「呢兩隻，嘻。」少女第一次嘅露齒笑。

如果係心情嚟講，反而係佢好咗好多。

最終，一個環保袋係完全唔夠，我同佢都用晒兩隻手先攞得晒我哋買嘅嘢。





係返去嘅途中，少女表示好耐冇食過雪糕，於是我哋買咗兩杯雪糕，揾咗個公園仔坐低。

我哋食住雪糕，眼前有幾個小朋友係度跑嚟跑去。呢一刻，係一個平和又普通嘅時間，同我嘅心境嚟比係截然不同。

平行宇宙嘅我、殺母之仇、極光事件。

我而家嘅心境係比較矛盾，係想咩都唔理但又放唔低嘅感覺。

呢個公園仔，令我諗起一個長頭髮嘅女人，但可能當時太細個，唔係好記得咩樣。

「如果你真係另一個我嘅話，我哋係咪同一日出生？」我突如其來嘅問題。

「數到三我哋一齊講。」佢提議。





「1，2，3！」

「1月20」我。 「1月30」佢。

「….」

「前日？即係你已經20歲？」

「今年係19。」

「有冇生日願望？」我隨便順口咁問。

「嗯～～其實每年都係一樣。我希望有一個普通嘅家庭，有一個好朋友，可以鍾意一個人，結婚，再組織返一個普通嘅家庭。簡單咁講就係想要一個平凡的人生。」

我順口一問嘅問題，但得嚟嘅係一個真摯嘅回答。可能係成長環境差唔多嘅關係，我好明白佢講嘅嘢。

佢想要嘅嘢亦都係我想要嘅嘢。

「但而家，我想留底…。我食完啦。」佢彈咗起身。

揼完垃圾之後，我哋兩個再重新上路。