【校園】想成為您的治癒: 38. 同款
「你考個第二番嚟有咩用⋯？」「算啦，佢心情都唔好，你唔好再話佢⋯」
「佢平時都考第一，今次點解會考第二？係冇盡力定已經盡咗力？」「書賢都係一時失手，下次考番第一，將來一定讀到醫。」
「書賢，你今次發生咩事呀？你係讀書上有咩唔明定點樣呀？我同你講咗好多次，考第二有咩用？第一先會有人睇到。」殷媽媽拎起成績表不解地問殷書賢，殷書賢仍然一聲不吭，「你呢個時候唔可以懶㗎⋯！」
望住媽媽嘅失望，殷書賢嘅內心都係無盡嘅失望⋯今次係第一次考到第二名，對佢嚟講，係難以接受嘅事⋯
殷書賢望向爸爸，雖然爸爸口中一直講緊唔緊要、一直講緊佢盡咗力，但嗰份打從心底失望出嚟嘅感覺太明顯
殷書賢默默耷低頭，拎住呢個成績，似乎冇令父母開心，反而令佢地失望極致⋯
「你拎番你張成績表，自己諗下點算⋯」媽媽無力地將成績表遞比殷書賢
殷書賢呆咗半秒先接過成績表，佢抬頭望爸爸一眼，爸爸輕皺着眉頭，微微點頭
殷書賢拎住成績表一步一步行番入房，閂上房門
「第二名⋯」殷書賢企喺書枱前望住成績表，「係我唔夠努力，先會考第二名⋯」
啱啱爸媽喺學校收到佢嘅成績表時臉上嘅表情喺殷書賢嘅腦海中一閃而過，係愕然、係難以置信、係失望⋯
「嘖⋯」殷書賢不忿地咬緊牙關，手一用力，成績表都比佢捏皺
殷書賢企喺書枱前，毫不猶疑就拎起放喺一旁嘅鎅刀，拉起冷衫嘅衫袖
「嘖⋯煩死啦⋯！」殷書賢推出刀片，直接喺自己嘅前臂上微微用力一划，隨即划出一道新嘅傷口，「第二名第二名⋯煩死啦⋯！」
殷書賢嘅內心係煩躁同自責，當佢拎住成績表番屋企嘅時候，佢父母臉上嘅表情係無法隱藏嘅失望
「嘖⋯」殷書賢喺回憶中出番嚟，諗起嗰件事令佢有啲煩躁
殷書賢將成績表放番好，然後坐低喺書枱前，拎起毛巾抹頭
「算啦⋯做埋啲功課⋯」殷書賢將電腦合上，轉身喺書包拎出功課
⋯
「所以，你今日又冇帶筆呀？」張萱淇望住李雨揚，有呢個猜測係因為李雨揚一嚟到就對住佢笑咪咪
「唔係呀，我有帶～」李雨揚邊講邊拎出筆袋，「你啲筆真係幾好用～」
「哦係咩⋯」張萱淇托住下巴反咗個白眼
「唉～真係好用⋯所以我買咗同你同款嘅筆！」李雨揚從褲袋拎出佢喺嚟補習前買嘅筆，同張萱淇之前借比佢嘅幾支筆都完全一樣
張萱淇不禁瞪大眼，眼前呢個人做咩要買同自己同款嘅筆？完全唔明白
「你做咩要買同我一模一樣嘅筆？」張萱淇收起心中嘅驚訝，擺出嫌棄嘅表情問道
「好用囉！」李雨揚嘅嘴角上揚，拎住啲筆喺張萱淇嘅眼前晃了晃，「咁有眼光嘅你？」
「都只係啲筆嚟⋯」張萱淇淡然地聳肩
「我都好有眼光，識問你借筆～」李雨揚用膊頭撞咗張萱淇嘅膊頭一下
「咁最勁係你啦～」張萱淇聽到就笑咗出嚟，「咁有眼光問我借筆呀～」
「係呢～」李雨揚自豪地點頭，拎住自己嘅筆拍埋去張萱淇嘅筆隔離，「啲人會唔會以為係情侶裝？」
「唔會囉！邊有人會用情侶筆？搞笑呀？」張萱淇笑道，但心臟都緊縮咗一下
「呢個made in Japan喎⋯」李雨揚拎住新買嘅筆喺度研究
「佢到底有咩咁大嘅魅力，可以做中央空調⋯？」張萱淇定睛望住李雨揚嘅側面，「好睇係好睇，但邊個會咁膚淺⋯」
「望咩呀？」李雨揚眼尾餘光留意到張萱淇定睛望住佢，佢笑問：「覺得我好有眼光定覺得我好靚仔？」
「兩樣都唔係⋯」張萱淇笑着搖頭，喺收回視線嘅同時默默地喺心裏道：「係笑容⋯？」
雖然張萱淇成日都話李雨揚就係個中央空調，但其實佢都覺得李雨揚嘅笑容的確幾好睇
「今晚放補習之後食唔食嘢？M記？」李雨揚問張萱淇，「最多食完我送你番去。」
對於李雨揚送自己番屋企呢個提議，佢係有少少心動，但佢又有啲想番屋企食飯
「我地兩個人呀？」張萱淇遲疑地問道
「仲可以有邊個？」李雨揚輕皺起眉頭反問，「食唔食呀？」
「都得嘅⋯」張萱淇故意遲疑地回答，「咁我大發慈悲同你食老麥啦～」
「多謝晒喎真係～」李雨揚笑道
喺放補習之後，張萱淇同李雨揚一齊去咗附近嘅M記；等餐嘅時候，李雨揚輕推咗張萱淇一下
「你去搵咗位先，我幫你拎埋。」李雨揚講道
「哦⋯好。」張萱淇呆咗一呆，李雨揚有時都係將貼心嘅
李雨揚拎住兩個餐番嚟，張萱淇淨係坐喺度等李雨揚，李雨揚先啱啱坐低，就有人拍李雨揚
「喂！」一個男仔企喺李雨揚身後
「你喺度嘅？未番去咩你？」李雨揚瞬間回頭望，見到係佢嘅熟人就即刻講兩句
「買個嘢食再番去咋⋯咦～」對方答完李雨揚，就留意到坐喺李雨揚對面嘅張萱淇，「又有新女朋友啦？」
「佢唔係我女朋友。」「我唔係佢女朋友⋯」
李雨揚同張萱淇異口同聲地講道，李雨揚朝張萱淇望一眼，只見張萱淇不慌不忙拎起放喺盤上嘅汽水飲咗一啖
「你唔好比佢厄到呀～呢條友好花心，成日轉女朋友。」對方指住李雨揚，對張萱淇笑道，「上次佢同清菁分手之後，勁快又識咗第二個，明明咁中意人。」
IG Link: https://www.instagram.com/nd_cotttoncandy/?hl=zh-tw