【校園】想成為您的治癒: 39. 碰巧
「喂！」李雨揚一個批踭就撞向佢嘅同學，「講咗唔提清菁⋯！」
「清菁？好似好在乎呢個人⋯」張萱淇望住李雨揚嘅大反應，直覺一下子就嚟，「幾時嘅事⋯？」
「好好好，唔喺新女面前提你啲傷心事～」嗰個男仔笑笑口講道，然後好順手咁拍一拍李雨揚嘅膊頭，「聽日番學見啦。」
「嗯。」李雨揚提一提手當係講拜拜
李雨揚坐番好一拎起薯條，就見到張萱淇雙眼直勾勾咁望住佢，李雨揚將薯條放入口嘅動作都放慢咗半拍
李雨揚抬頭望到張萱淇望住佢嘅眼神，佢就知道張萱淇想問啱啱嘅嘢，佢當睇唔到繼續耷低頭邊睇手機邊食嘢
「你好中意佢？清菁⋯」張萱淇最終都係開口問咗出嚟，李雨揚喺心中默默地嘆一口氣
「薯條要趁熱食，快啲食。」李雨揚當聽唔到張萱淇講嘢，直接拉開話題
「既然咁中意，做咩飛咗人？」張萱淇又問道
「你唔好聽啱啱個人亂講啦～佢成日都係咁。」李雨揚笑了笑，打算一笑置之，「佢亂講㗎咋～」
「但你個反應，完全唔似係嗰個人亂講而有嘅反應⋯」張萱淇將熱辣辣嘅薯條放入口咬咗一啖，眼見李雨揚沉默，張萱淇好奇追問：「所以點解飛咗人？」
「我係比人飛嗰個Okay？」李雨揚無奈地講道，然後提手示意停止呢個話題，「轉個話題Okay？」
「李雨揚居然會比人飛！？」張萱淇對呢件事有啲震驚，「唔通係因為咁樣所以令自尊心受損而好在意？」
張萱淇又偷望李雨揚一眼：「感覺又唔似⋯但佢好在意嗰個人，好明顯係真⋯」
李雨揚嘅表情佢睇唔透，張萱淇喺呢一刻覺得，自己一啲都唔了解李雨揚呢個人
⋯
殷書賢戴住耳機坐喺靠窗嘅位置，書包放喺雙腿上，手自然咁搭喺書包上面
朝早嘅巴士車廂好安靜，同放學後充滿活力嘅巴士車廂好唔同，朝早嘅大家似乎都未瞓醒一樣
巴士靠站，喺再次緩緩開始向前行駛時，殷書賢感覺到佢身旁嘅座位忽然沉落去一樣
「嗨～早晨。」
殷書賢聽到坐佢隔離嗰人講嘢，似乎係同佢講緊嘢一樣，於是佢抬頭望向佢嘅右邊
「早晨⋯」殷書賢見到邱茗然一大清早就掛上陽光笑容，殷書賢以略帶疲倦嘅聲線回答，喺心入面默默地講：「一大清早仲咁精神⋯」
「你聽緊咩歌？」邱茗然見殷書賢戴住耳機，便指一指自己都戴住耳機嘅耳仔好奇問道
「冇聽歌。」殷書賢將右邊嘅耳機除咗落嚟，「係Chem嘅雞精講解。」
「哦、哦⋯」邱茗然不禁一愣，呢個人點解喺番學路上都係聽緊呢啲嘢，「今日有test⋯？」
「唔係，係下一課嘅預習。」殷書賢回答，因為今日會教下一課，所以佢喺琴晚睇過一次內容之後，今日再聽雞精內容
「哦⋯」邱茗然雖然唔理解，但佢都微微點頭
「你聽緊咩？」殷書賢指一指耳機問邱茗然
「冇呀，就係普通嘅歌。」邱茗然嘅指尖輕碰螢幕一下令螢幕亮起，將手機螢幕側向殷書賢嘅方向，「你平時都係搭呢班車㗎？好少見到你～」
「因為今日早咗出門口。」殷書賢回答，「今日要早啲番去拎番嘢。」
「漏咗嘢喺櫃桶？」邱茗然自然問落去，然後笑一笑，「放學都唔執齊嘢先走？」
「連轉堂都會漏咗筆袋喺人地櫃桶嘅人，冇咩資格話我。」殷書賢稍微打量邱茗然後淡然地笑一笑，「我本chem書喺locker。」
「嗰次我趕住番去上堂嘛！」邱茗然即刻有啲尷尬，帶住紅紅嘅臉頰解釋，「你唔會漏嘢嘅⋯！」
「唔會。」殷書賢一副肯定嘅模樣，不過邱茗然就唔係咁諗
「你上次唔係漏咗嘢喺天台咩～」邱茗然嘅大腦忽然一轉，記得上次有人仲懷疑佢會唔會周圍同人講呢個秘密
「上次係因為你嚇親我。」殷書賢仍然一臉鎮定，但其實喺邱茗然提起嘅時候，佢嘅心臟都縮咗一下
「哦～好囉～」邱茗然嘅嘴角微微上揚起嚟，以一個意味深長嘅笑容回答
「到站啦，㩒鐘啦。」殷書賢迴避邱茗然嘅笑容，指一指喺邱茗然嗰邊嘅落車鐘
「咁樣一齊番去好尷尬⋯陣間比佢地見到又要煩勁耐⋯」殷書賢嘅右腳一踏出車到外面嘅地上就即刻冒出呢個想法，下一秒殷書賢就開口：「我去買早餐。」
「哦好呀。」邱茗然冇覺得點樣，直接就向前繼續行
邱茗然番到課室坐低，門差唔多閂埋嘅時候又被推開，行到去locker前面嘅邱茗然聽到門發現嘅聲音就回頭望一眼
「早晨～」許洛霏放低書包喺位之後就行到locker前，企喺離邱茗然一個人嘅距離
「早晨。」邱茗然笑一笑，然後打開locker門
「你係咪都有睇呀？韓國嗰個綜藝，我琴晚見你po咗story！」許洛霏問邱茗然，佢嘅聲線中夾雜住少少嘅興奮，「出咗新一集啦原來～」
「係呀～你都有睇呀？」邱茗然見許洛霏都有睇，即刻就有話題興趣
「有呀！」許洛霏點點頭，「我今晚番去就睇！」
「之前嗰啲你有冇睇呀？」邱茗然左手攬住一疊書，右手將locker門閂上
「有呀，我一直都有追開～」許洛霏用力咁點頭，「上個月嗰集間諜超好睇！」
「嗰集我都有睇！去到中間勁刺激，最後一個大反轉好精彩！」邱茗然即刻附和，因為張萱淇平日多數都係睇劇，好少會睇綜藝呢啲，所以見到有人同自己一樣有追就感覺莫名興奮
IG Link: https://www.instagram.com/nd_cotttoncandy/?hl=zh-tw