【校園】想成為您的治癒: 82. 善意的謊言
「拜拜～」邱茗然喺殷書賢行到佢身旁嘅時候細聲咁講道
殷書賢聽到邱茗然同佢講嘅嘢，但佢冇作出回應，兩個人擦肩而過都只係一秒嘅事
「淇淇今日洗唔洗補習？定番屋企？」邱茗然問道
「番屋企，今日冇補習～」張萱淇輕鬆咁講道，「番去瞓陣就做功課。」
「咁你咪好失望囉⋯冇得見你個補習同學。」邱茗然代張萱淇輕嘆一口氣，當自己係張萱淇肚入面嘅蟲，講出佢嘅心聲
「唔係囉⋯！」張萱淇頓時搖頭否認，「見佢唔係重點囉，只係補習咁啱同佢一齊補⋯順便見佢咋⋯！」
「哦哦哦～」邱茗然比個Okay手勢，「好呀信你～」
「我講真㗎⋯！」張萱淇拉過邱茗然嘅手，用無奈嘅聲線講道，但臉上卻掛住笑容
兩人轉彎行入另一條出去大街嘅路，行出大街再去地鐵站
「張萱淇！」李雨揚見到張萱淇行出嚟，怕張萱淇見唔到佢即刻叫佢一聲
「你、你點解會喺度？」張萱淇一臉愕然，佢望住企喺佢眼前嘅人，李雨揚就喺佢面前，身上仍然著住校服
「幾日前你唔係叫我嚟接你放學咩？」李雨揚笑嘻嘻講道
「我講笑㗎咋⋯」張萱淇口係咁講，但見到李雨揚真係嚟，佢都係有啲開心嘅
張萱淇眼睛嘅餘光望到仍喺佢身旁嘅邱茗然，張萱淇即刻有啲笑唔出，佢好似估到，李雨揚嘅真實意圖
「嗨～」李雨揚當然望到邱茗然，佢即刻熱情咁對邱茗然打招呼，「我地又見面啦～」
「嗨⋯」邱茗然不情不願咁笑一笑，佢偷偷地拉一拉張萱淇嘅手肘
「你地番屋企呀？」李雨揚問道，但未等張萱淇開口，李雨揚就對邱茗然笑問：「你叫咩名呀？上次都冇問你～」
邱茗然望向張萱淇，張萱淇同邱茗然對望，輕皺着嘅眉頭加上眼神都叫緊邱茗然唔好答佢
「邱茗然。」邱茗然老實咁回答，張萱淇即刻用眼神嘆氣
「好高興認識你～」李雨揚講着客套說話，佢撞一撞張萱淇嘅手：「你睇下人地幾好呀⋯！」
「咁你想點呀？」張萱淇反咗個白眼，拍開李雨揚嘅手
「冇想點冇想點～」李雨揚見張萱淇擺出一個唔想再同佢講嘢嘅氣勢，佢即刻就投降，「我今日都嚟咗接你啦～」
「嗯，你唔好以為我唔知你因為咩而嚟接我。」張萱淇面帶微笑，伸手毫不留情咁掐咗李雨揚嘅手臂一下
「咩呀？」李雨揚扮唔知咩事，「你叫我嚟㗎嘛！」
「我冇叫你嚟。」張萱淇講道，佢知李雨揚想點，佢都係想識佢嘅好朋友所以過嚟，先唔係真心要接佢
張萱淇默不作聲，佢企喺李雨揚同邱茗然中間將兩人隔開，佢中意李雨揚，但係李雨揚從來都冇察覺到自己對佢嘅唔一樣
喺李雨揚嘅眼中，自己同其他女仔好似有分別但又好似冇分別⋯張萱淇在意，但係佢冇資格要求⋯
李雨揚一個小舉動都可以令佢開心一日，張萱淇有時都覺得咁樣嘅自己好卑微，但係冇辦法控制佢對佢嘅心
張萱淇見李雨揚一直望向邱茗然嘅方向，心裏冒起醋意，頓時偷偷地拉一拉邱茗然嘅手：「茗然你搭地鐵唔係要行得遠啲咩？」
「嗯⋯？呀⋯」邱茗然望住張萱淇嘅雙眸，兩人從眼神接觸估對方想講啲咩，「嗯！係呀～我本來打算送到你去地鐵站口就算，不過佢喺度嘅話，咁我就唔送你到嗰度啦～」
「嗯！唔緊要～」張萱淇滿意咁笑一笑，然後比個okay手勢，「呢度都已經係巴士站啦，你唔好再特登行一轉啦⋯」
「咁我喺度等車啦～」邱茗然停下腳步，指一指眼前嘅巴士話，然後佢望向李雨揚：「咁唔該你幫我送淇淇番去啦～」
「得你一個人喺度等車，唔太好掛～」李雨揚笑一笑，同邱茗然一齊行到巴士站嘅簷蓬下，「我地陪你等埋車先都唔遲呀～」
「唉⋯！死人中央空調⋯！」張萱淇忍唔住喺心入面鬧咗李雨揚一句
邱茗然擔心咁望咗張萱淇一眼，張萱淇都無話可說
「我聽張萱淇講，話你有中意嘅人。」李雨揚直接咁問邱茗然
「吓⋯？」邱茗然未反應得切，下意識就呆呆咁吓咗一聲
「邊有人好似你咁直接㗎⋯！」張萱淇即刻擋喺兩人之間，手放喺身後拉住邱茗然嘅手，用力咁捉咗佢嘅手腕一下
張萱淇點會諗到自己隨口講嘅大話，會比李雨揚直接喺當事人面前曝光？如果邱茗然話冇，咁呢個大話就要比人踢爆
「我好奇下咋嘛～你講到佢中意嗰個人同我差咁遠，好奇下唔得咩？」李雨揚自信嘅一面表露無遺
「茗然中意嗰個男仔⋯係、係我地級嘅學霸嚟⋯！你呢啲學渣梗係冇得比⋯！」張萱淇理直氣壯又認真，喺張萱淇身後嘅邱茗然不禁瞪大眼，連忙回握張萱淇嘅手
李雨揚嘅目光落喺仍然有啲愕然嘅邱茗然身上，張萱淇回頭望邱茗然，帶着暗示講一句：「你唔係到宜家都唔認呀嘛～」
「呃⋯嗯！」邱茗然唔好意思唔幫張萱淇，朋友點都要幫一把，所以佢都係默默咁接受呢個大話，「係呀⋯」
邱茗然同張萱淇對望，用眼神交流着，眼見巴士駛到嚟，邱茗然即刻拉一拉張萱淇嘅手
「車到啦⋯！淇淇你番去啦！」邱茗然望住巴士駛到，伸手輕輕咁推一推張萱淇
「咁好啦，我走啦⋯！」張萱淇對邱茗然講道
邱茗然行上巴士，上到巴士透過玻璃對張萱淇比咗個okay，然後揮揮手
「呼⋯」見到邱茗然上咗車，張萱淇不禁鬆一口氣，佢面帶笑容望向李雨揚：「行啦～」
IG Link: https://www.instagram.com/nd_cotttoncandy/?hl=zh-tw