有一晚，我打飛機打到條jer斷左: （48）

「不如揾Kevin幫手？」楊家成提議。

「Kevin捉鬼嘅渣喎，打外星人得唔得架？」我話。

「我估佢應該有計嘅。」

於是我問Cathy借左個好大嘅篋，將格格同佢細佬塞入去，然後就同楊家成揾Kevin。

拖住個裝住斷手斷腳嘅行李箱，行喺街上面，我感覺自己似嗰啲肢解殺人魔。



好好彩一路上都無遇到差佬，否則都俾人周到，都唔知點解話好。

而唔好彩嘅係，行行下，我隻左腳都斷埋出嚟。

再咁斷落去，相信好快我全身就要四分五裂。

我單手執返起隻腳，單腳跳下跳下咁拖住個篋上到Kevin屋企。

得返一手一腳嘅我，上到Kevin屋企，喺想㩒門鐘嗰下，剩低嗰隻手都甩埋出嚟。



肢解嘅速度比想象中更快。

楊家成用我個龜頭嚟㩒鐘：「叮噹！」。

跟住一個綠色頭髮嘅女人嚟開門。

繼cosplay過秋山澪，今次Kevin扮埋《叛逆的魯魯修》入面個C.C.。

「終於肯蒲頭啦，係咪上嚟找數呀？」



上次捉鬼條數條友要收我5皮嘢，到依家我都仲未有錢還俾佢。

「成5皮嘢，我呢啲窮學生邊咁快有錢找到條數。」

Kevin趟開道門，見到我斷手斷腳，嚇到飛起：「嘩！你俾人斬呀？」

「唉，成件事一匹布咁長，你扶我入左去先講。」

Kevin幫手儸住我啲手腳，然後慢慢扶我入去，再拖埋個篋入嚟。

我就fing兩邊手袖，單腳彈下彈下坐低喺客廳梳化。

「咁大個篋裝左啲咩呀？」Kevin一拉開條鏈，入面啲手手腳腳就陸續跌出嚟。

嚇到佢即刻彈起身：「嘩嘩嘩！你搞咩嚟呀？你學人劈友玩肢解？」



「唔洗驚，佢地兩個雖然肢體分離，但都仲係生勾勾嘅。」

「你好，我叫格格，隔籬呢個係我細佬。」格格突個頭出嚟打招呼。

Kevin驚到塊面青過個頭，幾乎暈埋咁滯。

格格同佢細佬喺個篋度碌出嚟，而我就廢話少講，直接將斯比列特人嘅事，連埋Cathy屙蛋嘅事，快速交代一次俾Kevin聽。

「…乜呢個世界上真係有外星人？仲要天生斷手斷腳駁唔埋咁奇怪。」Kevin好奇咁打量格格同佢細佬同埋我。

「咪就係嗰粒靈結石受到破壞，搞到我地打回原形，所以先想請你同我地去斯比列特星，一齊對付嗰班侵略者外星人，保護嗰舊石。」我請求Kevin。

「對唔住，呢次我諗我幫你地唔到。」



「點解呀？」我同楊家成同聲問。

「第一我淨係識得捉鬼，唔識對方外星人。第二，你睇我呢個look就知，我準備參加一個cosplay比賽，今次仲要飛去日本。」

「拍硬檔，幫幫手啦。」我嗰隻分離嘅手，爬上去拍一拍Kevin嘅膊頭。

Kevin驚驚青青咁縮開個身，並表示愛莫能助：「唔係話我唔想幫你，但我真係唔識對付外星人，而且去日本嘅機票、酒店早就book好左，我今晚就要飛啦。」

「連你都唔幫手，咁我地真係唔知點算好。」我感到苦惱。

「你地不如揾下其他朋友幫手啦。」Kevin話。

「嗯...我知仲有個地方可以揾到幫手。」楊家成居然有辦法。

「係咩地方？」我問。



「和合石。」