中六個年 我鍾意左叫我起身個女仔: 運動會

老實講，嗰埸比賽簡直就將我未來十年嘅運動量都補足咗，之後幾日返到學校都好似未瞓醒咁，雖然我好似原本都係咁。

過咗差唔多一個禮拜，唔知點解，我竟然特別精神，甚至可以話係亢奮，可能係渡過左極度疲倦嘅時期，就反常咁走向另一個極端。

啱啱擺低書包，睇左陣書，班主任就行咗入嚟，派咗一張類似報名表嘅表格比我哋。

我攞起佢睇咗睇，係完全唔關我事嘅陸運會。

正係我準備繼續睇書，我睇到表格最底有一行好細嘅字。



「每位學生都必須報一個項目。」

晴天霹靂。

我仲未喺絕望裡面行出嚟，向晴就喺呢個時候問咗我一個問題。

「最後一年啦，你報啲嘢玩下啦。」

雖然我知佢冇惡意，但係我感到更加絕望。



被強逼運動、出醜，都算，仲要係佢面前出醜。

我夾硬笑咗下：「梗係，我仲要跑第一！」

正喺我諗住耷低頭思考人生嘅時候，好嚟唔嚟，呢個神出鬼沒嘅體育老師，竟然係出面經過。

他推開課室門：「向晴側邊嗰個，你一定要拎返個獎啊，你喺中四長跑日拎左第一之後就冇見過你參加比賽。」

我慢慢抬頭，露出一個禮貌而不失尷尬嘅笑容：「好啊！」



屌，點算？

就算我肌肉仲有力，我個肺都經歷過唔少風浪，應該跑多兩步就可以直接Call車入ICU。