中六個年 我鍾意左叫我起身個女仔: 運動會訓練

原本我仲可以求其報個好快就搞掂嘅項目過到骨就算，但係因為呢個神出鬼沒嘅體育老師係呢個咁關鍵嘅時刻出現，仲講咗句咁嘅嘢。

事到如今，我冇得唔報三千米。

但係唔好話三千米，我行三百米都就嚟抖唔到氣。

雖然說拎頭三嘅機會唔大，甚至可以話係近乎零，但事到如今，就算我幾唔想練都好，我都要練。

畢竟當日向晴一定在埸，雖然如果佢全程都喺到同周公捉棋，我跑第幾都冇所謂。



但係根據過往經驗，大部分女仔都會喺嗰日帶埋望遠鏡嚟睇場上面咁多個靚仔嘅樣，同埋佢地超靚嘅肌肉線條，當然男仔都有睇返女仔，而我相信向晴都係其中一份子。

雖然話我唔係女仔想要嗰一種大隻靚仔，但係經過望遠鏡嘅加成，佢喺賽道上面望到我嘅機率大大增加。

我已經無後路，既然避唔到，咁就捱過佢，而家距離運動會仲有四個禮拜時間。

從今日開始，我要每晚都沿住海邊由屋企樓下跑到去碼頭，因為經過我精密計算，即係PokemonGO嘅孵蛋，我屋企樓下來回碼頭就係三公里，同比賽嘅長度一樣，簡直就係完美嘅訓練路線。

過往三千米賽事嘅頭三名，衝線時間都係around十至十一分鐘，即係話一分鐘要跑三百米。



孫子兵法有講過，「知己知彼，百戰不殆。」，知道自己同對手嘅實力係咩位，咁即使鬥起上嚟都唔會出事。

而家我淨係知彼，未知己，所以第一日嘅訓練重點係要知道自己嘅一般發揮要幾耐先可以跑完三千米。