中六個年 我鍾意左叫我起身個女仔: 運動會訓練（三）

老寊講，三千米對我呢個幾千年冇做過運動嘅老人家真係一個冇可能嘅任務，先唔好話咩十至十一分鐘，我連可唔可以跑曬全程都係一個問題。

雖然我琴日係半路瞓低咗，但抖咗一陣之後我都係跑曬全程，咁就導致今日我啲肌肉都係痛到好似想攞我命咁。

不過，我今日都係會繼續，但係唔係因為我想去，而係因為向晴叫我同佢一齊跑。

我同佢約係我屋企樓下，而終點就同琴日一樣。

我啱啱出𨋢，就見到佢喺我棟樓嘅正門出面等緊，但係因為我只能夠係門罅見到佢嘅一部分，我仲未睇到佢着咗咩衫褲。



我推開大門嘅一刻，我先睇到佢嘅衣着，同一時間，我比佢嘅衣着仲有身材刷新咗我五觀，同佢琴日平凡到我冇印象嘅衣着完全唔同。

真理褲同Sport Bra，令佢嘅上圍同下圍完整咁呈現係我眼前。

好彩我即刻將我嘅視線移到十萬九千里之外，如果唔係我兩個鼻窿應該會出現兩條瀑布。

我深吸一啖氣，做好一切心理準備先將個視線拉返去佢身上。

「你知唔知我等咗你幾耐？」



佢一邊講，一邊跳下跳下，心口果兩舊野上下搖搖下，加埋佢鼓腮個嗲樣，我真係求下你停啦好嗎。

我夾硬扮冷靜：「對唔住我遲咗，行啦。」

我有預感，我今日會同琴日一樣，不過唔係跑到攰，而係扯到攰。

我同佢平排咁跑，佢冇講嘢，而我就好想講嘢，但係就唔知要傾咩。

跑咗一半，向晴跑咗入去涼亭休息，而我都喺後面跟住。



我坐咗係佢身邊，唔知點解，心跳好似有啲快，我諗唔係因為做緊運動，因為佢快得有啲不可思議。