中六個年 我鍾意左叫我起身個女仔: 澄、晴(十)

我搭住佢一步一步咁慢慢行，用咗唔知幾耐終於返到屋企樓下。

「喂，密碼，樓層。」佢拍咗拍我背脊。

「7542，17。」慣性嚟，醉咗都記得。

「嘟、嘟、嘟、嘟。」佢撳密碼。

「行喇。」



我跟住佢一步一步咁行入𨋢大堂，然後入𨋢。

我挨住扶手，然後就順勢坐低。

坐低未夠半分鐘，佢就抽起咗我。

「行喇。」佢拍咗拍我手臂。

我扤咗扤頭，然後跟住佢行。



我Feel到燈光暗咗好多，應該出咗𨋢。

我跪低，然後佢又抽起我。

「差幾步咋，頂住。」佢好大力咁捉住我。

「嗯。」我扤咗下頭。

我跟住佢行咗縛步，然後就停低咗。



「鎖匙。」

我喺褲袋摷咗摷，摸到啲似係鐵嘅嘢就拎咗出嚟：「呢條係咪？」

佢拎走條鎖匙：「等我一陣。」

三秒後，佢將條鎖匙塞返落我隻手到：「唔識開，你嚟。」

我拎住條鎖匙，對咗幾秒終於對啱位。

「咔噠！」

門開咗，佢更用力咁捉實我：「睇門檻。」

我跨咗一大步，無Kick親。



我喺呢個漆黑嘅環境裡面隱約見到熟悉嘅肉色梳化，就直接攤咗落去。

我攬住張被，諗住合埋眼就可以瞓，點知一合埋眼，我個頭就即刻轉到都嘔。

我擘大眼彈返起身，然後用力咁呼吸，成個人即刻醒曬。

我望咗望周圍，佢跪咗喺我隔離。

間屋好黑，我只能夠見到佢個輪廓。

佢係…啊晴？

我捽咗捽眼，然後用盡所有精神望住佢。



「望完未啊？」佢撳低我：「瞓低，但唔好合埋眼。」

過咗陣，佢好似拎咗啲嘢返嚟，然後又跪返喺我身邊。

「啊晴你拎咩嚟？」我問佢。

佢冇答我，我只係聽到有水聲同擰毛巾嘅聲，然後就有啲嘢冚咗喺我額頭上面。

好暖，好舒服。

「有冇好啲？」佢問我。

「嗯。」我扤咗扤頭。

「我走喇。」佢企起身。



我拉住佢衫角：「唔好。」

「我知你未得。」

佢拎開我隻手，然後就開門出咗去，而我都好快就瞓着咗。