中六個年 我鍾意左叫我起身個女仔: 澄、晴(十一)

喺我再次擘大眼嘅時候，我身邊一個人都冇。

個頭仲係有少少痛，不過應該飲杯水就無咩事。

我坐起身，睇咗睇錶。

十點，應該所有人都返曬工。

我起身飲咗杯水，然後就去老竇同老母間房睇咗睇，冇人。



我行返去我間房到，點知我一開門，就見到啊晴瞓咗喺到。

佢着住白背心、真理褲，一般嘅居家衣著。

仆街，我個頭又開始痛。

到底我琴日做過咩？

我將我個腦裡面零碎嘅片段重新組織，再加上我眼前嘅畫面，我諗我大概估到發生咗咩事。



我揈咗揈頭，然後爬上床背住佢瞓低。

佢拍咗拍我背脊，然後我擰轉身：「做咩？」

佢都擰轉咗身，我哋兩個喺床上面你眼望我眼。

我張床好細，我哋兩個塊面嘅距離連十CM都冇。

「做咩起咗身都唔叫我。」佢摸住我塊面。



我摸住佢隻手：「我唔知你喺到啊嘛。」

「傻仔，唔係我送你返嚟，仲有邊個會送你返嚟？」

「好似係，條仆街就走撚咗。」

「你都識講啦，咁琴日扶你返嚟嗰個咪我囉。」

「但係…你唔係嬲緊我咩？」

「咩我有話嬲你成世咩？」

「好似係。」我傻笑。

「喂。」



「做咩？」

「你信唔信十秒定律？」

「信啊，做咩？」

佢冇覆我，而我都冇再講嘢，只係專心咁望住佢雙眼。

十。

九。

八。



七。

六。

五。

四。

三。

二…

我個身突然好似比人控制咗咁，塊面不受控制咁貼過去，而佢…

都一樣。



我哋就咁蜻蜓點水咗一下，就好似有條羽毛掃過我個嘴咁。

只係一瞬間，但係錫呢樣嘢有時就好似畫公仔咁，唔洗畫出腸。

佢攬住我，而我思索咗幾秒之後，都攬住咗佢。

「你有冇諗過一樣嘢？」

「咩？」我更用力咁攬實佢。

「有時人真係唔洗做到好曬先搵另一半。」佢輕力咁拍我背脊，好似氹BB咁。