萬金油與孺子牛（第二季連載中）: 星夜對弈影成雙
「中山度假村發展項目，Kerry，你嗰邊進展如何？」
我之前故意將合作第三部份全權交給她負責，名義上是因為我需要處理其他新合作，實際我想觀察在Rachel百分百的資源幫助她底下，她會否擴充自己的勢力和權力。
Donald正身處馬來西亞與我們舉行視像會議。
「Rachel果邊希望我哋同法拉利傾，喺高爾夫球場進駐品牌旗艦店……」她這是一個很有野心的舉動，絕對不容易成功。法拉利的大老闆和Donald都是一場相識，但始終他們對於內地二線城市的擴展有所保留。
「你有幾成把握？」Donald聽完之後反問。
「我盡力。但如果有michael幫手，我有七成把握…」
我皺了一下眉，這麼沒把握的東西，還要拖我進場。她既然開口說七成，她似乎是有點把握的。那為什麼需要我？
「Michael，咁你幫下Kerry手。」
「知道。」
「下個議程……」
差不多聊到尾聲，我主動和Donald說：「Donald，同姜總嘅合作，我想Kerry做我副手。市場數據分析方面，我哋公司本身就比較欠缺內地優勢，Kerry喺呢方面嘅專業性同能力比較強，我認為可以幫到我哋推進計劃。」
他似乎有點奇怪，因為這個是非常難得的機會，亦是他看重我的一個考驗。連其他主管也覺得有點詫異。
「好，呢個計劃我全權交俾你負責，你安排就可以。」他說。
「多謝Donald。」
因為我要故意在Kerry面前暴露戰略性錯誤，這個正是一個很好的平台，讓我試探Kerry的「底牌」。
會議結束之後我和Kerry一起走回業務發展部，我有事要找Victor。
「你點解會覺得，我加入就有七成把握傾到個品牌旗艦店呢？」我好奇問。
「如果我傾唔成，Donald其實一早預咗，你亦都知，法拉利短期之內其實冇計劃喺二線城市發展。但係萬一我傾成，中山呢個計劃本身係你搵返嚟，你只係將第三部份全權交咗俾我。但傾成嘅話我就變咗功臣，你咪可以順理成章覺得我越權？孫家弘，我有冇講錯？」她又一次看透了我的佈局。
我笑笑，這個直白到不行的她我真的很喜歡。
「林泳昕，真係屈就你之前喺BD做我副主管…」我手插褲袋，故意略帶深意說。
「你咩意思啊？」她似乎感覺到我言語中有「骨」。
「我咩意思你知㗎。」我淡淡地說。
她沒說什麼，只是冷冷又匆匆返回自己辦公室，這幕正好給Victor他們眾人看見。
「都話佢扮豬食老虎㗎啦…Michael哥，你有冇睇到佢今朝幾虛偽呀？」「Co哥你高招喎！對付呢啲扮晒綿羊仔、扮晒不屑社交嘅女人，梗係要俾啲顏色佢…」…
我和多個主管一起吃飯，門外來了Johnson、Jenny、華哥等人，毫不客氣入來「踩場」。
「你班金油黨都幾唔客氣架喎？開大道門講人是非…」Jenny先說。
「唔介意嘅一齊講？」Johnson故意坐到Paul爺身邊。我抽著雪茄，看著劇情會如何發展。
此時Kerry走了過來，身邊還有市場部的Dennis。
「Dennis你有冇搞錯啊？你同佢地食？」Yanny雙手放胸前，目光銳利。Dennis非常尷尬地望了一眼Kerry，又望了我一眼，走到我身旁：「唔係啊Michael哥，我唔知你同Kerry姐又…」
「冇野…」我拍了拍他肩安慰，與Kerry甚有火花地隔空對峙。
我站起來，故意走向門口站著的Kerry，呼了口煙：「唔好意思Kerry姐，你唔好介意。大家一係一team人，頭先都係飲多兩杯講吓笑。不過我地呢間房煙霧彌漫，唔係好適合你呢啲…懷孕嘅同事。」
她看到我故意沒有弄熄雪茄、亦故意這樣對她說話，她似乎很心碎，與我狠辣的對視。
「冇嘢喎～你對住女同事冇邊界感，都唔係第一日發生嘅事。孫總監你嘅風度，我收到啦。唔阻你哋食野，我哋返去先～」她那女王般的氣場把其他主管輾壓得為之一震。雖然不太友善，但我卻暗暗喜歡，有時我懷疑自己和她一起久了，我也染上了一些「被虐狂」。林泳昕，不感情用事、甚至開始變得冷血的我，會不會讓你沒那麼擔憂？
我和Kerry那種一時合作無間、－時又互相撕殺的工作關係，讓BD和其他部門最近越來越頭痛。我會忽然故意抽起Kerry的方案或者分析，打「風險管理」的名義，重新讓各部門主管簽名。Kerry會故意做些「踩界越權」、疑似擴充勢力的事試探我的底線。
以防兩邊山頭主管趁亂搞小動作，我還故意在他們之間釋出了其中一個最近表現較神秘穩秘的主管、細微的「黑材料」，讓他們互相猜忌，以便我專心「對付」林泳昕。連CFO、Donald多年的下屬何俊華John也禁不住在會議非常婉約地向曾生，投訴我和Kerry的權鬥手段太恐怖……
「其實關於果個預算風險，Kerry本身係做得唔錯，不過Michael 嘅擔憂係非常合理。呃…其實有冇可能…可以你哋再傾下？或者Donald你…要唔要睇吓你有冇咩機制去執執，我哋傾下…」
Donald看到俊華哥這般頭痛的模樣，還有其他主管這段時間經常皺眉、拍腦袋的苦惱樣子，卻不自覺哈哈大笑。
Donald轉了一下筆，翻了翻那份預算的風險頁，笑笑開口：「點啊，你地好頭痛咩？唔應該向我求救喎～」他望向雲淡風輕喝著奶茶的我，又望向一面不在乎、在文件上左寫右劃的Kerry。其他人也跟隨Donald的目光望向我和Kerry，卻不敢回應。
「哈哈哈哈…我希望你地自己都諗下，呢個局面對你地有冇好處。今日去到呢度先，散會…」Donald似乎很滿意，但其他人直冒汗，甚至吞吞口水。