《我老婆唔係我女朋友》【那些年／九十年代學界／真人】 第七章全新中篇！: 【第七章】 宿生的世紀賭局（３）
「都比完賽啦，應該講得喇啩…」Leon有點閃縮的望了阿材一眼，尤如自言自語一樣。頓了頓好像下了決心：「咳唔～是噉的，個外圍盤呢，係Zoe開嘅。」
「鬆姐？」我好生奇怪，以鬆姐咁銀根雄厚，點使喺學校搞外圍呀。
如果大家記得的話，趙婉Zoe是Leon上莊時的終極幕後金主，她的家族是【建橋】的影子管理層，有絕對的影響力。
「Zoe喺宿舍同其他Hall（其他社堂）啲人鬥氣，咪跌錢出嚟搞囉，你知佢又唔衰得。」Leon娓娓道來。
我心諗我鬼知咩，明明佢係你中學時嘅「青梅竹馬」啫。
Leon繼續說：「噉佢哋宿生駁火，梗係set埋啲勁辣嘅外圍規矩啦，例如所有莊員不得參與，避免我哋隨便調人，影響賽果，其實又邊有得換人吖，又嚴禁洩露畀當事人知，當事人即是我哋泳隊成員，否則賭局即時取消兼殺注。所以我都唔敢同你提，一來怕影響你心情，二來怕取消賭局累街坊。」
呵，難怪馬飛同埋其他人全部都支吾以對，一問三不知，我開始掌握到點點實況了。
「由於事發最初只係Hall與Hall之間嘅意氣之爭，所以賭局亦只限宿生實名親身落欖，我哋走讀生全部唔受注，而且投注人士有晒數簿記錄，行連坐法就唔怕有人報串囉（再次說明以前唔用「篤灰」的）。」Leon繼續落力解釋。
我恍然大悟：「哦，所以你就搵阿材幫手落欖嘞？」難怪Leon不停話嚟搵財神了，原來是來收派彩。
Leon欣然道：「醒目！搵阿材做疊碼仔先可以落注嘛，其他走讀生好多都用呢招，不過唔係我落欖，而係你自己落欖噃。」