沙頭角與長洲的距離(重修版): 八十七.

佢一嘢錫咗埋嚟，之後又扮咩事都冇發生過咁繼續飲酒。

佢咬住枝飲管：「做咩唔飲啊？」

不如你問下你做緊咩啦？

我無奈咁苦笑：「比你嚇親啫。」

你個標準同我個標準都好唔同吓喎。





佢縮咗縮膊頭，微微一笑：「而家廿一世紀喇，唔好咁Out啦。」

睇嚟我呢個老坑都係時候跟上時代嘅步伐。

「咁咩係有意思，咩係冇意思？」我攪咗下杯酒：「如果你呢嘢有意思，又係咩意思？」

等啊叔學下嘢都好。

「唔知呢，你估下。」佢伸咗個懶腰：「你慢慢就會知架喇。」





答完好似冇答咁。

「頭都痛撚埋。」我郁咗郁枝飲管：「飲酒啦。」

再咁諗落去真係變諗樣都似。

//

我將空酒杯推埋一邊：「埋單啦。」





都係時候返去。

「你陪我過去搵人，呢到就我請。」佢伸出右手：「得？」

陪你搵個人就洗少成百蚊，何樂而不為？

我毫不猶豫咁握咗落去：「掂啦。」

今日又小賺一波。

//

我點煙：「比我食埋枝煙先。」

飲完酒食枝煙，合理。





佢伸手：「比枝嚟？」

梗係得啦。

我拎一枝比佢，之後再拎火機出嚟諗住幫佢點火。

咬住枝煙嘅佢推開我個火機，挨過嚟用我枝煙嘅火點煙。

「呢下又係咩意思？」我彈一彈煙灰：「有火機做咩唔用呢？」

個火機大把油，唔洗同我慳架喎。

「有煙點，做咩要用火機呢？」佢吹啖煙落我塊面到：「冇咩意思。」





原本冇咩道理，但你講出嚟又好似有啲道理。

//

見行緊個方向有啲唔對路，我決定要問下佢咩事。

「喂，你拉我去邊啊？」我拉停佢。

我有合理理由懷疑你拉緊我去賣豬仔。

「去Club囉，做咩啊？」佢拉我埋一邊：「你唔係話OK架咩？」

喂。

我皺到眉頭可以夾死烏蠅：「冇聽你講過嘅。」