「我番黎喇。」望下度門側邊成家人放鞋既位,就知道家姐阿哥老豆未番,即係得阿媽響屋企。

聽到廚房煎緊野既聲,我行入廚房同阿媽講多次:我番黎喇。

「番黎拿?食左野未?」

「未呀。」

「岩喇,就黎煮好,一齊食啦。」



「唔好啦,你煮d野咁難食...」

「衰仔,我好日都唔煮一餐,你咁都唔捧場?」

「唉好好好...我食我食...沖個涼先。」

響沖涼房入面,我左手拎住花灑高舉,右手...噠下手指,合埋眼好情深咁沖住涼唱歌。

「疑?」



突然感覺唔到花灑射水個力,我打開眼一望,水花一滴一滴全部散開響我眼前定格,好似高清相機影出黎既效果咁,好華麗。

我拎起手指掂一掂d水花,粒水好似氣泡咁比我篤凹左。響我仲未回神清楚發生咩事既時侯,花灑突然出番水,噴到我一臉都係,d水仲入埋鼻哥窿俗親,咳咳咳...仆街。

「丫...搞咩呢?」我感覺到唔妥。

不過我肚餓,無理咁多,我著好衫行出廳睇下有咩食。

「又茄子?」言詞間我隱約透露出不滿。



「係丫,你阿媽我屢敗屢戰,但係屢戰屢敗丫麻,你話既。」阿媽應該get唔到我既不滿,我總係將我既不滿,調較到岩岩好阿媽感受唔到既水準,因為我深知如果阿媽知道我有不滿,到最後蝕底既都係我。

「阿媽...d茄子下次不如用滾油炸一陣先落免治豬肉煎...」

「肯定係呢次又買到d唔新鮮既茄子,你睇下,煎完d色暗啞哂既。」

「......」

我無講落去,夾起左一舊茄子丟入口,唔...好濃烈既味呀!但係好唔好食啦喎...唔講喇...你明既。

食完飯就返左房,我撻響床上面諗起今日發生既事,諗黎諗去都覺得唔對路,「喂屌唔係咁邪下麻...」我突然諗到,會唔會係我鬼上身?

我深呼吸一下,兩下,三下,呼...無野既!聽日要做stock take,要早d番去。專心咁諗住聽日既事,我好快訓著左。

第二朝番到去,第一個見到既人係響門口執緊衫既大波霞,當然呢個名係我地私下叫架啦。



「hi,shirley。」 我諗緊我對住大波霞個微笑同對住客既微笑係咁一樣咁虛假?

「番黎拿阿ming?」

「係丫,我入去打卡先。」

我行到入去staff room,有四個人鋤緊dee。

其中一個仲要係我鋪頭既general manager,即係一間分店裡面最大粒果個。

「下,阿mark,今日唔係做take咩?」平時我會叫佢老細,不過佢話咁叫叫到佢好老,所以叫番佢個名。

「頭先office果邊搞錯左d野,話要聽日先好入資料,咁聽日先做都唔遲啦。」



「喂掂啦。我鍾意呀。」把口係咁講,其實如果無野做我反而覺得好悶。 「咁而家點?我出去睇鋪先喇,你地四個齊腳啦。」

「是但啦,而家都無人行架啦,自己搞掂啦。」老細頭都無回,隨口應左我兩句。

「OK,阿mark你咁既牌輸少當嬴好過啦。」我見到老頂手上拎住鋪爛牌,我不禁笑一笑。

如常咁係度行行企企,過左無幾耐,有份鋤dee既其中一個行左出黎。

「疑,組長,鋤完dee拿?」我隨口問下。

「鋤完啦,嬴左老頂五舊水仲唔割禾青?」佢戴住黑框眼鏡,身高一般,外表平凡。

佢比我地叫組長並唔係因為佢個post真係組長,原本佢岩岩入職有個好正經既名:matthew,可惜有次比人響深圳撞正佢帶兩個人入去揼邪骨,自始大家都叫佢組長,咩組?叫雞組。

「係喎阿ming,阿康問收工出唔出旺角行下?」



「哦可以丫,等埋你地囉。」今日我比佢地早收一個鐘。「老細呢?叫埋佢?」

「佢唔去喎,話要執盤數。」

「嗯。」表面同我地玩玩貫,但係GM呢個位其實好辛苦我係知既。

收工之後四個人一齊出旺角行下,所謂出黎行既節目無非就係行一陣,然後搵間野食餐飯,之後番歸。

旺角街景其實黎黎去去都係呢d,無非都係出去見到人山人海,迫下迫下,個人搵番些少存在感,無響屋企咁虛,唔係屋企唔好,而係出街蕩下個感覺好似仲同世界係有接觸緊咁,唔出街淨係番工放工番工放工,真係會痴呆。

響我諗完呢d野回過神來既時侯,佢地行得好遠,我想啪手指呷停佢地,叫佢地等埋我。

「啪。」



周圍既世界又再一次定格,抬頭望遠處既廣告版,高樓大廈既螢光幕,身邊周圍既路人,停低哂。

我清楚知道又發生左一次呢種怪事。

我望住自己隻右手,腦海中瘋狂轉動閃過千百萬種念頭,五秒過後我有種奇妙既諗法。

周圍成個世界就好似睇戲暫停之後,禁左play制又一次流動:廣告版輪轉式展示幾種廣告,大樓螢幕播緊某間補習社天皇天后既chok樣,而身邊既路人繼續川流不息響大街上走丫走,企定定既我比經過既路人輕微碰撞左幾次。

呢一刻就同頭先怪事既完全相反,周圍成個世界正常流動,定格企響度既只有我:我繼續望住自己右手。

我想試下心中想法熟真熟假,眼神由右手轉移到大街四周上。

「啪。」我又啪左一下手指。

「......」

乜事都無發生。

仆街,企定響條街度啪手指,同個痴線佬有咩分別?

前面三個茂利調轉頭走番黎,問我做乜鳩企定定唔郁,我是但應左句:你地行咁快托柒咩。