我去到旺角蕩下蕩下,真係完全唔知做乜好,呢個時侯我同自己講如果有條女陪我行街就好喇!

但係現實唔係話想就有,我仍然係一支公ON99響度遊。

當我響度等緊過馬路,呢個時侯見到側邊有個盲公跌左支盲公竹出馬路,仲要紅燈,仲要有架車飛緊埋黎,「噠!」五秒既時間岩岩好夠我幫丫盲公執番佢支竹,然後我響盲公耳仔側邊細細講:小心d啦!

如果有人聚精會神睇住呢邊,應該會見到支跌左落地既盲公竹,好似變魔術咁突然上番呀盲公隻手度。

但係因為成街都係人,成街好多廣告,成街好多車,無人睇到呢個城市既一個角落既呢件小事。



我望下錶,不知不覺原來都六點幾,番屋企好過。

成屋企都未有人番黎,我又坐左響部電腦面前,上討論區睇,突然手痕,開左個POST寫住 :
「哇我有超能力呀!!我可以啪手指停低個世界五秒!」

個內容語氣我盡量寫得有幾囂張得咁囂張,結果PO左唔夠十五分鐘,個POST有17個負評,我個名收左3粒膠。

我都覺得自己好無聊,我決定走去打PS3。

打到夜晚九點幾,個肚有D餓,諗住落街食野之際,阿媽番到屋企,見到我又著褲又著拖鞋,一副準備落街樣。



「阿仔,落街食野呀?」

「係呀。」

「唔好落街啦,你阿媽我煮飯呀。」

「下,你又煮丫?」

「係呀,等陣啦,好快就有得食架喇。」



阿媽又煮茄子,係,無錯,又係茄子,前前後後佢應該係第八次挑戰茄子。

阿媽又真係煮得幾快,好快我就同阿媽同台坐埋一齊一路睇電視一路食飯,個電視做緊林峰,呢條友仔之前做尋秦記果陣咪好地地,而家搞到要走靚仔路線做乜鳩?

一路睇電視我一路起勢扒飯,碟上既茄子我郁都未郁過。

「仔丫,試下D茄子啦,你都未食過。」 阿媽夾起左一舊茄子食落口,完全唔覺有問題。

我望下碟野,心諗仆街:呢碟到底係咩黎?

「阿媽你整D咁既野比我食係咪想毒死我?」....我心諗,當然我無講出口。

望住台面碟茄子,我深信真係食落肚既話,會好大獲,係我自己好大獲。但係我又唔想咁衰比阿媽睇到我唔捧佢場,我膽粗粗夾起左一舊,夾到一半,未到嘴邊,氣味已經後發先至,搶住入閘,進攻我既鼻孔。



我...我..屌....呢D..係乜撚野味黎?呢種氣味我自出娘胎廿年黎一次都未聞過,咁獨特既臭味我應該呢一世都唔會唔記得。

我夾到去嘴邊,心諗死就死啦...但係靈機一動,係喇!

「啪!」我有黃金五秒比我去處理成件事。

扔落台底阿媽掃地果陣會見到,扔番落碟阿媽更加即刻知道,唔通收埋入件衫...好核突喎?到底扔去邊好?

呢個時侯我望見定左格既阿媽,佢個口HOLD住趙緊野既動作,個嘴半開,我一瞬間有個邪惡既念頭。

五秒過後。

「喂阿媽你今次有d水準喎。」我扮一路趙緊野食然後望住電視。

「係咩?我都估到架喇,今次呢d茄子靚呀,整完d顏色仲好鮮,都係我有眼光。」



事實上我只係將我舊茄子塞入阿媽把口度,而阿媽佢自己唔知道發生咩事。

就結果黎睇,阿媽好滿意,我唔洗真係食d咁既野落肚,皆大歡迎,大團圓bbq結局。

即使我對筷子仍然殘留些少氣味,而又幸好我體格過人,未致於比股氣味攻暈,呢d少少苦楚,值得既。

食完飯如常係沖個涼,上陣網,睇下電視,又上床訓覺囉,平常野無咩好講。

一覺訓到大天光,又係陽光普照既一個好日。

如常係番工。

「疑,eva今日又見到你喎。」



「阿ming番黎拿?」 eva生得唔算好靚,不過佢成日咪咪嘴笑,好自然會對佢有d好感,我相信同eva識落應該會係個幾好既朋友。「係呀,星期日唔洗番學呀麻。」

「哦,星期日都黎番工?唔出下街?」

「阿ming你咪又係一樣!放假都仲要走番黎公司咁神心。」

「我有野幫阿mark搞丫麻,而且我做full time,責任心點都要好d既。」

「哦,我禮拜日都無咩野做,咪番工賺下錢囉。」

「哦...好啦好啦。」 我答。「講真你無實習,點解唔搵份醫院果類既part time做,走黎做sales?」

「咁sales都係服務性行業呀麻,第時做護士又係服務性行業,都算有關係丫。」 佢諗左一陣答我。

「哦,不過聞說護士既『客人』惡哽過sales好多喎...又有咩醫療事故...又有人會借d意非禮...又會有人嘔丫又盛...你唔怕咩?」響客人兩個字我加重左語氣。



「係架,咁我大個女啦麻,我搞得掂既!」

「好啦,咁,大個女小姐,我入去打卡先喇。」

「嗯。」eva保持一貫咪咪嘴笑。

話說我地呢度分店算係偏靜既一間,但係full time數目就唔合比例既多,其中當然有我同埋另外三仔,一個叫雞組組長,同埋出名口賤既tony,仲有無乜情緒起伏既阿康。

老細突然拉我入房話要密斟,我帶住疑惑既表情跟左佢入房。

「阿ming,如果比你響組長tony同阿康三個之間選一個,你會要邊個?」

「下,我唔搞gay架喎。」

「乜撚野丫,我問你你睇好邊個呀,死仔。」

「哦...」阿mark係想問我train邊個升職先。「三個都做得野...又同我咁friend,阿mark,好難答喎呢條問題。」

「咁你覺得我會搵邊個喇,你放心,係我既決定,唔關你事。」

「咁呀...」我諗左諗,「我諗你會要阿康。」我指一指響出面既阿康,阿康呢個時侯serve緊個女客人,個女客人著得身光頸靚,一睇就知有錢。

「點解呢?」

「其實三個都做得野既...不過組長佢自己出面既活動就多d,tony就衰口臭,唔多係人見人愛,但係就tony勤番工肯踩鐘,兩個都對升職無咩話好大動力。阿康就無咩方面好top好top,但係就乜都ok既,講野知時機,識睇人尾頭眼額,唔會有人憎佢,仲會幫你R舊人番黎緊急幫手,真係養兵千日用在一時,呢點阿康好犀利。」我唔係咁鍾意講任何人既壞話,人有優點一定有缺點,就算同阿mark幾friend都好,佢始終係general manager,我既個性就係會對阿mark有保留,所以只係隱惡揚善咁講下三仔既事。

「中哂喎。」 老頂好平淡咁講。

「差唔多啦,真心話。」

「嗯哼...嗯哼...」 老頂諗緊。「好啦,你出番去先。」

「哦。」 我轉頭準備出房。

我臨打開門果陣,老頂又有野講:「係喇,阿ming,雲姐可能過多幾個月退休,我其實係想你上黎頂佢個位,經理丫,益你啦。」

雲姐係我地鋪頭其一個經理,年介六十,年資仲老過阿mark,正常佢應該做緊更高既位,不過雲姐佢自己話嫌麻煩,senior manager佢就心足,連高層比佢升佢都唔升,所以論鋪頭既影響力,雲姐比阿mark更高。

「嗯。」我臨出房門回頭講多句:「多謝阿mark。」

我響出面突然響度諗,阿mark點解突然講雲姐退休?

其實阿mark知我諗咩,佢知我唔接受自己竟然番工訓覺,跨越左自己對做野既責任心原則,佢講話比我升職其實係支強心針。

一路做到夜晚,八點走一個,九點又走一個,十點再走多幾個,結果今晚得我同eva收鋪,我同佢快手快腳執好哂d野之後,就同老頂講一聲,然後打卡走人。

eva佢住響樂富,我住大圍,佢搭地鐵同我去巴士站條路係一樣既,咁我響鋪頭門口等佢去完廁所番黎先一齊行。

好快eva就行番黎鋪頭門口搵我,我見到佢戴多左頂chocoolate黑色軍帽,我就隨便問下佢做咩戴帽呀,佢又隨便答下我因為唔鍾意set個頭嫌麻煩,所以戴帽夠方便咁。

我同eva傾住計行落站頭,中間對話其實都幾大眾化,無非係衣食住行果d啦。

臨去到地鐵站果陣,eva問我有無咩夢想,我諗左陣。

「無呀,um...真係無喎。」

「點會呀,阿ming你實有夢想既,幾無可能都可以講架喎。就好似我既夢想係做護士咋麻!」

「我想用我個超能力五秒黎改變世界!」當然呢句我無真係講出口,莫講話五秒係咪可以影響世界咁誇張,連同佢講我有超能力呢樣野都唔知點樣講起,「咁丫...我想第時我個老婆唔洗做,咁樣算唔算夢想?」

「哈,人地同你講夢想,你講話想老婆唔洗做咁得意既?」

「係架,我不嬲隨口嗡當秘笈丫麻。」

「哈...好啦,我走先喇,bye。」 eva同我呷手再見,行到呢度呢個地鐵站出口,eva就入站搭地鐵番屋企,我就落樓梯就有車站比我等車。