張學勤由細到大都係一個好勝心同自尊心好強既人,佢係家中四兄弟姐妹入面最大果個,無論讀書定運動都係名列前茅既人,而且同人爭執永遠唔會講輸人,佢總有辦法用大道理令佢企響啱果一邊。

而且佢老豆係好成功既生意人,佢父母廿五歲果陣生佢出黎,三十歲佢阿媽已經唔洗做,響屋企相夫教子做全職湊仔婆,而佢老豆五十五果時,盤生意已經發大到成間公司,幫佢老豆打工既有幾百個人,所以佢老豆已經半退休,盤生意交比手下就搞掂。

所以,當佢讀大學果陣溝掂食埋當時學生公認既校花,佢已經肯定自己會同佢老豆一樣,一樣係可以做個頂天立地既好男人,亦都想佢老婆好似佢阿媽咁,唔洗做響屋企相夫教子,佢自己就每日放左工可以番屋企飲啖靚湯同個仔玩下,又可以同D仔講下自己以前D威水史。

而佢大學畢業左之後就決定想承繼佢老豆盤生意,但係自尊心既關係,佢唔想比人話佢係靠老豆發達,佢要比人知佢係有真實力,有料到,所以佢入去老豆間公司由低做起,而且成間公司無人知佢就係大老闆個仔。

頭幾年都平步青雲,好快仲同大學識果個校花結埋婚,廿六歲就生左個仔,呢個時侯佢已經想叫個老婆唔好做野,湊下仔,但係佢老婆做緊既係最大既興趣,所以張學勤無強迫,心諗比老婆玩多幾年興趣,而自己個位再上高D,到時請多幾個工人,再比老婆嘆世界都唔遲。
但係,或者呢個世界真係有天才,佢老婆越做越勁,個朵越黎越響,仲響到出國,去到歐美全世界大把人識佢,佢老婆既作品一係唔出,一出就響全球賣出既收入上到9位數字美金,犀過犀菲利。



但係張學勤自己就好似D電視劇咁,生完仔過左兩年,佢自己因為一次管理失誤比手下反咬一啖,響高位跌番落黎,未到身敗名裂,但係已經唔可以再留響間公司度,佢去左做老婆既助手,如是者,再過多三年,佢終於忍唔住。

呢一日,佢個老婆響意大利,而佢,佢去左老豆間公司個頂樓,上左天台,跳左落去。

係佢老婆個細佬響香港幫佢執好哂成件事。另外仲呃佢個仔:「你daddy去左旅行丫,好似你媽咪成日去旅行咁,叔叔陪你番上屋企睇電視。」而佢老婆番到黎香港,先知發生左咩事。