哇我有超能力呀!!但係點解得五秒咁撚少?!: chapter.9 失控
落到樓，一股涼風吹過，但係而家已經係十一月十六號，正常黎講已經係冬天，而唔應該係好似而家咁吹過秋風送爽既感覺。不過咁既天氣有佢既好，因為...昅女。
呢種唔凍唔熱既天氣，會見到寒底既人著多d，熱底既人會著少d，呢頭行過既女仔仲著緊白色短袖tee配吊帶牛仔熱褲，果邊經過既高妹就著住七分貼身牛襯高踭鞋配上身既黑色tube top加淡黃色連帽風褸，各有其艷，其色美不勝收...呀喂。
行經琴日跌石屎果度，周圍圍起左個欄，而上面甩石屎既地方用帆布擋住，唔知幾時會整番好呢？係喇，琴日就係響度啪過一次手指，所以無辦法阻止老豆比小巴撞...等陣，係，果時我並唔知十分鐘後會發生乜事，所以我響救完個三九唔識七既阿姐之後，阿爸既意外我係乜野都做唔到，我咁樣同自己講，但係如果我無幫個阿姐呢？
停，我習慣不停檢討自己既思維方式慢慢失控，我決定唔諗，望下成條街周圍發生緊乜事。
哇~呢條女好高，哇~果條女對腳好白好滑，哇~~呢個對波好大呀，喂喂小姐，你跌左d野呀，你跌左對奶出黎呀！
到左廣華，轉身行三層樓梯上樓，行到左老豆間房，我見到老豆已經醒左坐起身，阿媽就坐左響老豆側邊，阿哥...係，我仲有個阿哥，佢坐響度睇緊電視。
我行到去老豆張床側邊，「拿，老豆，你既衫呀，你要抖番幾日先出院架啦？」，我將袋衫就咁放左響床邊，老豆無應我。
老豆無望我，只係呆呆咁望向前面，但係，佢前面只係對面床位儀器同櫃筒，有咩好望？
正當我想拎隻手響老豆面前掃一掃，睇佢有無反應再問佢咩事，我老豆先一步用力dup左張床一拳，「咚！」，沉厚既回音。
我定一定，老豆做乜？呢個時侯老豆又再dup張床，然後繼續呆望前方。
我望一望老豆，又望一望阿媽，同阿媽四目交投，阿媽開口：「頭先醫生話，你老豆可能以後下半身都唔郁得...」
「係啊！而家我係廢人喇！我呢對腳...」一聽到阿媽開口，阿媽都未講完老豆就好大聲咁喝住阿媽，然後用力打左自己右腳兩下，「唔痛喇！無反應架！郁唔到啊！」
「我係廢人喇！係廢人呀！同果邊個打靶仔一樣係廢人喇！」佢指住坐緊響度睇電視既阿哥，咁既聲佢無可能聽唔到，我完全想像唔到呢個阿哥係諗咩，咁既情況佢都仲無動於衷睇住醫院部電視。
我睇見老豆有史以黎最激動既一次，老豆之後拎起隻膠水杯用力扔去阿哥度，阿哥個頭比佢扔中，但係仍然無動於衷，無講野，淨係望左一眼老豆，然後行開。
阿媽響側邊聲嘶力竭咁想叫佢老公冷靜，但係完全無用，叫到喊埋出黎，老豆響度一直發脾氣，阿媽就一直喊一直喊。
所有野響我面前發生，我無出聲，淨係望住，望住，而我好似有d野開始好快好快咁流失緊，好似係一道氣，又唔多係，比較似係條柱，有條撐住我某樣野既柱磨蝕緊。
條柱係咩黎？條柱係撐住我同成件事，係分開既，就好似我響天堂，望落凡間發生呢件事咁，keep住令我覺得成件事我都無能為力，我淨係可以旁觀，就算發生咩事，就算對我影響好大，但係我都做唔到d乜啦？我只能夠唔開心。
但係由頭到尾我都錯左，根本我就唔係處於一個旁觀者既無能角色，我根本係一個當事者，我好清楚我有d咩能力，亦好清楚只要果一刻我有使用我既能力，成件事跟本唔會發生。
到底點解我果一刻唔噠停五秒救番老豆？唔好講咩因為救完個阿姐所以無辦法救老豆，藉口黎！個阿姐死唔死關你乜野事？而家係個唔識既人重要d定係你老豆重要d呀？陳達銘你係咪傻撚左喇？
我比一股莫名奇妙強烈既內疚感塞爆哂成個腦，完全無左正常既理性思考。
老豆停低左發脾氣，佢係咪回氣一陣再發？你問我我問邊個？
呢個時侯有個人入左黎床房，係eva。
見到eva入黎，阿媽好快就用手抹左抹佢塊臉既眼淚。
而eva視線中並無見到d咩異常，只係拎左個蘋果入黎放響老豆床頭。
「世伯，今日醒左拿？個蘋果係請你食架，食蘋果可以快d好番。」
「今日世伯佢唔係咁...唔係咁舒服，阿妹你今日...今日番去先啦。」 阿媽把聲略帶沙啞。
﹝＊「妹」係高音果個「妹」，亦即係平時叫人高妹高妹，果個妹。﹞
eva聽到我阿媽既聲線，稍為望一望我阿媽，然後又望下我老豆呆滯既雙眼，又望一望我，佢視線停留左響我度，好似想由我既眼神知道發生d乜事。
「b仔呀...帶阿妹去行下先啦...」阿媽望住我。
我心諗其實叫eva阿妹唔多岩，佢都成16x差唔多170，外表都唔算太細路女。
我無出聲，我個腦仍然未停低頭先既思維風暴，只係反射性咁行左埋去eva身邊，eva亦好識做自然同我行左出去，搵左個周圍無人既走廊，響排櫈度坐低。
我坐低之後，只係一路望住地面。
eva見到我無主動開口，佢就問：「阿ming，係咪發生左咩事？伯母好似...喊完黎咁？」
我沉默。
「喂喂陳達銘...你做咩呀，你唔好唔出聲啦。」
「無野。」我好簡單咁答。
「點有可能無野呀...世伯醒左都好似發吽豆咁，伯母把聲又咁樣...」
「無野呀。」我加重語氣，聲線不期然放大些少。
「你唔好呃我啦...話比我知啦好無？」
「楊樂華我同你講，我話無野呀！」我企左起身，怒目注視eva。
eva比我突如期來既舉動嚇一嚇，然後先開口：「陳達銘你而家發生左d咩事？！我完全唔知你發生咩事！完全唔知點解你突然發咁大脾氣！」eva亦都企起身望實我。
「而家我老豆癱左呀！我老豆撞完車下半身唔郁得呀！而家咁得未丫？！」
「就算你老豆癱左又點呀？而家唔係你癱呀！你有氣有力，你可以照顧你老豆架麻！」
「我老豆係比我間接整癱。」我憤怒，「你唔會知原本我有機會去阻止我老豆比車撞，而我無做到！所以我老豆先會訓左入黎醫院，而家仲要癱左，下半世要響輪椅上渡過！」
「陳達銘你到底諗緊乜野？架小巴跟本成支箭咁衝埋黎，就算你跑去截住架小巴，架小巴會連你都撞開！」
「你根本就唔明。」
「我真係唔明呀，我識果個阿ming係好理智好淡定既人，就算發生咩事周圍既人慌哂都好，都係呢個阿ming管理大局，萬大事都諗到計拆掂佢，但係而家呢個阿ming同我講d咁唔理性既野，我真係完全唔明呀！」
我完全上哂火，怒火衝天，直情想燒著周圍所有野。
我哄上eva眼前，「咁我而家同你講，我有超能力，望住我右手，」我將右手放響佢面前，「只要我右手一啪，成個世界會停低五秒，呢五秒足夠我跑番轉頭推開老豆，但係我果刻無辦法咁做，因為我已經救左另一個三唔識七既人，而呢種能力響短時間內無辦法再用，係我，我救唔到我老豆。」最後一句，我望實eva雙眼，搖一搖頭。
「我...你...」聽到超越佢想像範圍中既野，eva停低響度，支吾以對，無法有任何反應。
「咁你而家明未？」我仍然怒氣未消，「而家係我有能力救番我老豆，但係我無救到，係我既錯，係我既錯！」我再哄上前，怒目注視eva雙眼，狠狠講完最後一句。
比我連番進迫，eva只係輕咬下唇，望一望地面，然後抬頭望住我，略泛淚光。
雙對無言，隔左一陣，我知道個發言權仍然係我，我再開口：「你無野講─
原本我準備講「你無野講啦麻？」然後深深吸一啖氣，行番床房睇實老豆老母，唔可以比佢地有事。
但係eva響我講到第四隻字果陣，佢走上前趷高，用自己既雙唇緊貼我既雙唇，兩隻手環抱響我後頸，攬得好實，好實。
我雙眼碌到好大，呢次到我支吾以對，無法有任何反應。