哇我有超能力呀!!但係點解得五秒咁撚少?!: Chapter.17 迷團像是一朵黑色的雲
我地搞完d出境手續之後，行到出機場大堂，當我準備問connie睇唔睇到大電視新聞話白宮發生爆炸時，我電話響，係eva：「喂ev－
「你響邊？你而家響邊？」eva搶先開口。
「我岩岩落左機－」
我講到第六個字聽到有d唔妥，停左口。
電話另一邊傳黎些少抽泣既聲。
「eva...做咩...事？」
仍然係忍住忍住，索下個鼻既抽泣聲。
隔住電話我同eva沉默左廿秒左右。
Eva開口，「我幾個鐘之前...睇...睇左突發新聞，我想打比你...偏偏又唔通...我唔知你地會唔會去左果邊...唔知...唔知你地會唔會咁岩好－」
我打斷eva，「我而家...生勾勾企響香港赤臘角機場，個天陰陰地好似想落雨咁，呢邊天氣熱過紐約...係喎，呢幾日香港都凍左，你有無著多兩件衫？」
「嗯...」
「放心啦，我無事。」
「嗯...」
呢一刻我知道有人擔心我，雖然佢知道我無事，但係擔心既感覺並唔會咁快消散，我盡量表現得比平時更活躍，我希望用說話黎安撫eva，我同eva傾左十分鐘左右電話，都係我講多過佢，講野內容唔重要，只係想令佢果份憂心感覺消散。
「嗯...就咁啦，一陣陪我出黎行下囉？」我同eva講。
「好...」
收左線之後，先發現原來connie響我背後一路等緊我，connie臉帶微笑。
「呃...sorry，傾耐左少少。」
「係楊小姐打比你呢？」
「嗯。」
「嗯，行啦，我細佬有開車黎接我。」
「喂喂connie，你睇唔睇到電視話白宮發生爆炸？」
「睇到丫。」
「我地好似係廿個鐘之前先響白宮離開，如果係我地響白宮入面果時爆炸...我地咪乃野？」
Connie笑左笑，「點會呢，唔會炸中我地既。」
「好難講...」
「有阿ming你既超能力呀麻，就算爆炸我地都走得甩既。」
「你高估左我喇...如果真係響現場，我可能都未黎得切反應就被炸死...」
「唔好理白宮果邊喇，而家兩點幾，你洗唔洗番莫生果邊？」
「莫生...？喔，阿mark。今日唔洗。」
「嗯，咁我車你番你屋企啦。」
「唔洗喇，我諗到有d野想做。」
「楊小姐？」
「唔...哈...比你估中。」
「咁好啦，我自己番去先喇。」
「bye。」
「bye。」
我同connie再見之後，我自己去左搭機場快線，再轉車直接搭去樂富。
頭先響電話聽到eva想喊想喊咁，諗一諗電話果頭既佢，濕濕地眼個樣，反而到我擔心番eva，呢一刻我只想快d見到佢，拖住自己個喼都係咁話。
「嘟鈴鈴鈴鈴鈴－」 典型家居電話響起既聲。
「喂？」
「喂eva，落黎樓下丫。」
「唔？」
「我而家響你樓下丫。」
「下？你唔係...岩岩先落機咋咩？」
「咁你望出窗口喇。」
住七樓既eva果真望到我就響佢樓下小公園坐緊。
呢個公園仔好安靜，淨係得塊搖搖版，而且位置響eva條屋村既邊邊位，d人寧願去屋村中間位置個大d既公園打躉熱鬧d。
等左一陣，eva踢住拖鞋，上面凹件冷衫下面一條睡褲落左黎。
我望住eva行過黎，然後響我側邊坐低。
Eva對眼好似有少少紅筋，頭先佢真係擔心到喊出黎，我呢一刻只係用右手捉住eva既左手，捉得好實，比佢實實在在咁知道我響度。
「你唔係話一陣先陪你出去行既咩？」eva先開口。
「我突然好想見到你丫麻。」仆街，好撚肉麻，但係對我黎講，我覺得而家要我講十次都得。
Eva無出聲，只係將個頭挨落我度，我同eva就咁坐響呢個辟辟地既公園仔長櫈，兩手緊握，靜靜咁過左三分鐘，無其它人，無其它事，淨係得我個喼做電燈膽。
「你呢次去紐約有咩睇？」eva開口。
「紐約丫...第一個感覺咪我變左聾啞人士，好慘，哈哈。」
「你唔係出發之前惡補過英文咩？」
「完全唔掂，我係咁查字典，聽英文歌睇西片，只係幫我過到去聽得多少少，我去同鬼佬溝通淨係不停pardon，pardon，pardon。」
「咁你地點check in同周圍行？」
「唯有connie佢出馬，connie佢話自己都曾經響英國讀過一年書，基本既英文會話無咩問題，當然比唔上佢個細佬精通外語。」我繼續講，「咁我地跟住就去左邊度丫...然後又去左邊度...」
「咁咪好多野睇囉？」
「都ok架，有機會帶你去多次睇下。」
「咁跟住呢？」
「跟住呀...係喇，我地響紐約果邊發生左車禍，原本我仲問緊connie點解用咁多錢請我做佢助手，跟住架電單車就比架貨車兜野撞過黎，好彩既係我推開connie，唔係既話都幾大獲…」
「下？咁你有無整親？」
「無呀，只係原本我仲諗緊，如果唔係要比錢屋企，我真係好想唔做呢份咁無謂既工，但係聽connie講完一番說話，um…佢令我知道係我，先有做佢助手要既特點，聽完之後我就...個感覺好左好多。」
「哦...」
「然後...」我望一望eva，佢好似已經無乜事，「我地第二日咪去左白宮。」
「你地去左白宮？」
「er…夜晚果陣connie話搭車去華盛頓果邊望下白宮，咁第二日我地...咪去左一轉。」唔等eva出聲，我繼續講，「原來connie真係幾犀利，原本入白宮參觀要差唔多成個月之前申請，等佢批左參觀證比你先可以響預定時間入去行，但係connie只係去到門口傾下計，就比到我地入去。」
「咁之後呢？」
「之後就...響入面行下睇下，不過原來白宮入面都無咩特別野睇。connie都只係做下戲影相，之後連d相都delete哂，行完我地就直接番左酒店執野，上機番黎香港。」我繼續講，「好彩我地走得早，如果唔係爆炸就波及埋我地...hehe。」
「你仲笑得出...認真d好無丫？」
「哈哈...唔好嬲，我買左d野比你。」
我鬆開eva隻手，起身打開自己個喼，響個喼度拎左條鍊出黎，係條寫左eva yeung既銀質狗牌，係模仿好多軍人會隨身帶備既牌仔。我覺得簡單而精美既禮物。
「好靚丫。」eva咪咪嘴咁笑，我幫佢戴起左條鍊，然後eva拎起個散發淡淡銀光既tag仔細觀望。
當我準備關埋個喼果時，我望到一個唔屬於自己既黑色袋仔，我拎左個袋仔出黎，係個普通款式既拉繩袋仔。
「入面裝d咩架？」eva見到我拎住個袋仔，隨口咁問。
「個袋仔唔係我架喎。」
「唔係你既？會唔會係connie漏左響你度？」
「可能係喇。」我心諗，多數都係connie架喇呢個布袋。
我隨手拉開個袋諗住睇下係咪重要野，係重要既就即刻拎番去比佢。
點知，一打開，個袋入面係一堆黑色珠仔，黑色珠仔全部好似吊墜咁有個圈圈可以穿繩。
我諗起響白宮，connie頸鍊上果一粒黑珠裝飾，同呢一袋既黑珠一模一樣。
點解connie會響褲袋搵番粒珠？因為搜身所以拆粒珠放入褲袋？
而家又有一袋同一款式既黑色珠仔...唔通connie當時響褲底拎出黎果一粒，並唔係朝早響酒店戴起果粒？
如果係咁，咁佢原本果粒黑珠呢？係我估錯，其實佢褲袋果粒就係原本果粒？定係原本個粒而家響呢個袋仔？定係...原本個粒漏低左響白宮？定係...特登漏低左響白宮？
Eva見到我望個袋入面d野發吽豆 , 有d覺得奇怪。
如果特登漏低左響白宮？咁...
我一瞬間諗起connie既說話同語氣，又諗起白宮爆炸單野。
我有個最不可能既諗法：connie同白宮爆炸有關。
但係我既知識即刻否定左我：首先我地果陣入白宮一早比人搜過身，全身每一忽都check無帶任何可疑既物品先比入白宮參觀，其次係好簡單既物理常識，呢粒點睇都似係普通黑色珠仔既野，入面跟本無任何火藥或者引燃物，而且不含任何化學元素。細細粒既野點有可能炸得爛半邊白宮？點樣做出二十米高既爆風？呢度係現實，唔係打機揮下手都可以炸開座山。
我記得物理學好似有樣野叫質量守衡，仔細我唔記得，總之就係咁細粒既珠仔，就算係最先進既炸藥都做唔到炸爛白宮果種級數。
諗太多喇傻仔，我同自己講。
「唔知...咩黎既呢，成個袋都係connie佢條頸鍊既飾物，聽日拎番比connie。」我望住eva。
「哦，喂喂我地不如去睇咩咩咩囉？」
「好呀，你上番去換衫先，我番屋企放低個喼。」
「嗯。」
「一陣打比你，bye。」
「bye。」