哇我有超能力呀!!但係點解得五秒咁撚少?!: chapter.18-1 馬里亞納海溝 & chapter.18-2 第四種情
chapter.18-1 馬里亞納海溝
位於北太平洋，被北面既日本，西南既印尼，南面既澳洲包圍住世界上最深既海溝：馬里亞納海溝。呢一刻響海溝上方既海面有一艘大型遊輪駛過，遊輪上幾個遊客企響甲板上面，享受住海面涼風送爽，舒服既海風掃過比左大錢先上得黎遊輪玩樂既遊客。
響果班有錢遊客既其中一個一直手扶欄杆，遠望海既平面，無際既海平面同藍天連成一體既景色，就算已經睇左不下數十次，仍然華麗得令人一睇，再睇，不過呢一刻個遊客並唔係睇緊壯麗景色，「what the fxxking on？」佢只係望緊遠處大海上面，懸浮住兩個...好似係人既物體。
「阿星，你認真？」
「彼得，我認真。我一定要咁做。」
「咁我一定會阻止你。」
「......」
大海上面果兩個人既短短對話，響遊輪呢一邊當然聽唔到，而一路望住海面果位遊客，接下黎只係隱約聽到一d金鐵交加之聲，然後右邊果個人飛開左一小段距離，左邊果既『人』就突然有個黑色大球包住，響黑色大球消失之後，左邊果個『人』亦都同時消失左，而右邊果個只係向遊輪既反方向『飛』，直到消失響果個遊客既視線中。
chapter.18-2 第四種情
「喂喂阿ming，你今日係咪得閒？一陣上黎我屋企幫我一個忙丫。」connie響我未訓醒已經打電話比我。
距離由紐約番黎過左幾日左右，暫時都仲未聽到connie話下次去邊度，既然都未定話要飛去邊，我又同時依然收緊一樣數字既每月人工，connie叫我上佢屋企幫手，呢d應該唔關攝影助手事既野，我諗都無乜理由推既。
話說雖然connie真係幾有錢下，但係間屋住得反而唔大，第一次見到connie我記得佢好似係響『摩士公園泳池』落車，原來...佢就住響黃大仙下村龍福樓，connie佢話佢爸爸媽媽過左台灣養老，佢想留番佢爸爸媽媽間房，又話想留響呢間由細住到大既屋村，所以無搬到出去。
我就訓到十二點先施施然起身，搞呢搞路再搭車過去黃大仙站落車，等我上到connie間屋果時，connie唔響度，係佢細佬steven應門，佢話佢家姐落街買d野，又話我到左就入屋坐陣先。
我坐低之後，望一望connie屋企，三個字講哂：好平凡。
等緊唔知做乜既時侯，我好自然睇下果部開著左既電視，呢個時侯，我留意到門邊有一對細路仔既鞋，咁既size，唔會係connie，亦都唔會係steven架啦下話...？connie屋企有細路仔？
響我諗到呢度既時侯，steven撩我傾左陣計，問下我做佢家姐助手係咪好惡哽，然後又問下我之前做乜，再到我問下佢既野，我無意中透露左connie同我講過steven佢自己既事，於是乎steven笑一笑之後，講左更多佢自己既事。
原來響歐美非俄澳各國既大使館都有聯絡steven既電話，周不時都會有唔同國家既人想搵佢做隨行翻譯，原來做隨行翻譯唔簡單，有時仲要識d說服技巧，或者係一d談判技巧，甚至係防身武術，呢樣先係steven身價既最大價值。
響我地講左一陣既時侯，我突然有種好奇怪既感覺，呢個感覺令我轉頭望向connie屋企一間角落頭既房房門，望左一陣，房門打開，一個一米七左右，同connie差唔多高既男人行左出黎。
「佢叫阿星，我家姐既朋友...」steven響我側邊輕輕咁講。
但係我唔多留到steven講d乜，我只係知道我呢一刻個視線要全面集中響呢個人身上，當然我知道頭先見到果對細路仔鞋唔係屬於眼前呢個人。
而呢一個人，亦都回望住我，同我四目交投。
我同呢個男人對望左一陣，而佢只係輕輕講左兩個字，而且嘴角上揚一下，就轉身番左入房，佢講果兩個字...我聽得唔多清楚，但係睇嘴型，好似係講緊...『五秒』。
等個男人入左房之後，connie呢個時侯番左黎，同connie一齊入屋既仲有一個細路仔，個細路仔仲同connie有兩分相似。
「阿ming你黎左拿？進仔，叫ming哥哥丫。」connie握住個細路仔隻手郁一郁。
「ming哥哥...你好。」個細路仔呆呆地咁同我打招呼。
「...er...」我唔擅長應付小朋友。
「呢個係，我外甥，張宏進，平時我地叫開進仔。」steven睇得出我滿腦『呢個死o靚仔係乜水？』既疑問，佢響側邊補充一句。
等陣？外甥？外甥即係...即係...假如A先生有個家姐或者阿妹，而呢個阿妹或者家姐成左頭家，生左個B仔，而B仔就會叫番A先生做舅父，而A先生就會叫B仔做外甥，疑？！咁即係，咁即係，呢個係connie個仔？下？Connie有個仔？仲咁大個？
平時睇connie仲係青春可人，唔講佢二十九歲，齋睇樣係以為得二十出頭，真係估唔到原來connie生左個仔仲要個仔咁大，唔怪得connie身材咁好，原來人地講生完仔既女人身材更好係真既。
「嗯，我都未同過你講我有個仔添。」connie除低鞋。
「我真係...er...你個仔都幾得意喎。」如果我照直講『我真係估唔到你生過仔』好似有d唔禮貌。
「哈哈...阿ming，我記得你之前講你會考咪數學拎a既，可唔可以幫我做住一日補習老師先？」connie笑笑口同我講。
「下...？我？補習老師？」講真，當年考完會考就去左阿mark果度做，邊有做過補習老師呢樣野」
「係呀，進仔佢係數理方面特別學得快，我同我細佬偏偏唔熟呢方面，我諗起你講過你之前中學既成績，所以想搵你幫下。」
「哦...ok既。」咁又係，一個係攝影專家一個係語言專家，兩個都同數字呢樣野風馬牛不相及，要諗點樣教好一個細路仔唔係佢地既範疇，所以...我就即管試下誤人子弟啦。
等進仔番屋企跳跳紮紮左一陣之後，我同進仔坐低同台傾左一陣計，呢個細路仔係好活躍，但係反而講野唔多，我開始左我同佢既補習。
一開始我已經比佢嚇親，仆街！五歲細路仔唔係讀緊幼稚園或者小學一年班既咩？果陣我記得最多係教到千位既加減，連乘除都未教架喎，點解佢拎出黎果d書係講緊二元二次方程式，屌呀？你個塞豆窿明唔明架？
當我嘗試教既時侯，出奇地呢個細路全部都識，完全係跳哂級。
教左一陣進仔開始開口講得多野，我問下佢除左數學之外其它成績係點，佢話其它成績次次都唔合格...我聽完...乜咁熟口面既？咁似我以前讀書d成績...但係我無勁到跨級學習，眼前呢個可能係繼佢阿媽之後又一個天才...可能係。
連續教左兩粒鐘，當中我留意到steven就一路睇住八卦雜誌，有時佢會電話響，用d我完全聽唔明肯定唔係英文既外語傾左幾句收線，維持左兩三次，有時佢又會行入房一轉，然後又出番黎，connie就初初坐響電腦面前，之後行左入去果個男人間房度，無任何聲傳出黎，兩粒鐘之後又出番黎睇下我同進仔搞成點，呢個時侯我衝口而出問：「疑connie你屋企入面果位係？」我指一指頭先有個男人行出黎果間房既門口。
「佢係...佢我會遲d為你地兩個介紹，不過無咁快。但係我一定會為你地兩個介紹認識...」connie呢一刻露出一個沉重而深遠既笑容。
「...嗯。」
「今日到呢度先啦，唔該你阿ming。」
「嗯。」
「喂喂家姐你仲需唔需要佢？我代你帶佢落街食d野？」steven呢個時侯開聲。
「好丫，阿ming同steven落去一陣先啦，我呢度有d野要做。」
「哦...」我就好似比人賣豬仔任人舞，比steven帶左過黃大仙商場一間糖水鋪入面坐低。