哇我有超能力呀!!但係點解得五秒咁撚少?!: chapter.36 死亡
「阿ming，同羅馬果次一樣。」connie吩咐我要小心，同時將手上一支透明試管狀物體交到我手上。
「我好似係第一次親眼見到阿ming用佢既五秒超能力？」阿星響側邊講。
「阿ming...」eva響我身邊細細聲咁講，其實eva唔講我都知佢諗咩。
我地一行四人黎到位於金鐘站附近既添馬艦政府總部大樓，以維修人員身份走入大樓東翼二樓既一個暗角位。
阿星呢一刻佢套起特製既頭套，個樣完全變左另一個人，以免比周圍既人認出，畢竟，琴日先有報紙大大隻字寫住佢就係通緝犯。
據阿星所講，呢個黑核質製既頭套係一個死左既研究員開發，頭套會自動記錄附近30米範圍內所有經過既人既樣貌，可以隨時翻查而且轉換外貌。
我提起右手凝望，我諗緊，如果我呢一刻就收手唔做，會發生咩事？
我諗左好多好多，但係我得出既結論係弊大於利，始終之前已經做左個開頭...唔做好個結尾...我會後悔，而且有個神父同我講，只要今日呢一刻有一絲既後悔，呢一絲既後悔會響未來既日子不停放大，後悔既感覺會更加更加濃烈，我好怕軟弱既我響未來會比呢份沉重既後悔感覺壓死。
「啪！」
我全神貫注響手中既試管上，用平穩既力度將試管上既制推入去，同時我見到紅色既血液流入試管中，禁到最後停低，然後我將試管安放響地下，五秒過去。
「嘆為觀止。」阿星第一時間講。
「嘆為觀止？」connie開口。
我見到connie同eva都望住阿星。
「當然，對於我地三個黎講，只係好純粹見到阿ming由企響度突然就變成踎響地下，無爆炸，無火花，無巨響，好平凡，」阿星繼續，「但係對於我黎講，係時間同能量既流動規則巨大變化，你地都知我手上既錐刺...或者旁邊呢位小姐未知。」阿星望住eva。
「我手上既錐刺係穿越時空既科技產物，可以回到過去或者穿越未來，同時亦可以瞬間轉移，聽起上黎好神奇係咪？但係所謂既神奇只不過係未可以用科學黎解釋，又或者係根本唔明白當中既科學原理先會指一件事物非常神奇。」
「其實錐刺只不過係響固有空間中產生超出空間承受能力既能量，從而製造類近黑洞既扭曲空間，扭曲空間既能量會帶領物質穿梭空間，換言之，我手上既錐刺亦都只不過係能量流動既另一種形式。一種大大超出呢一個時代能夠達到既境界既形式。」
「但係阿ming既右手超能力，係將佢自己以外既能量流動停低。我既時代一直都研究緊點樣加強再加強能量流動既速度及質量，但係對於能量停止流動，即使係最強首席研究既我，亦都無任何頭緒。或者我用實例去說明，而家有一支點著左既火柴，火柴燃燒會產生光同熱，然後產生出黎既熱能會令火柴下面既部份繼續燃燒，直至全支火柴燒完為止，因為『燃燒』本身係一個大自然定律：只要有足夠既溫度，氧氣，同燃材就可以『燃燒』。呢個定律就係令火柴既木材能量流動成為光同熱，無任何一個可以阻止呢個大自然既必然定律。」
「你地或者會諗只要吹熄，只要浸水，只要斷絕氧氣來源，支火柴就會熄，但係呢d只係『拎走』火柴必定燃燒既原因，而唔係『阻止』火柴響有呢d原因既情況下燃燒，阿ming既超能力，正正就係『阻止』火柴燃燒既表現。」
「對於能量流動既停頓，相比極大度既加強能量流動，係一個完全相反而且非常可怕同無比困難既議題，佢可怕在於，如果可以掌握能量必然流動既定律，自遠古幾億年前就開始既地球生態體系，當中既萬般諸樣大自然規律都可以被擾亂：樹木靠泥土養份成長，如果泥土養份既能量流動被停止呢？所有動物透過大腦傳達訊息控制肢體活動，如果大腦傳達訊息既能量流動被停止呢？實在有太多可能性，而且每一個可能性都具有極大破壞力，只不過，停頓能量流動亦都困難無比，因為本身我地人類就係一個能量流動體，能量流動體本身要去停止能量流動原本就係天方夜譚既諗法，最簡單既問題係，點樣可以停止身體吸取食物營養既本能？」
「或者簡單d，你要點樣令你一隻手指尾靜止不動？你可能覺得好簡單，但係我可以話比你聽，你手指尾唔郁係你大腦傳達訊息令手指尾靜止，但係大腦傳達訊息本身就係一個能量流動，所以你會發現，你根本無任何方法令能量流動停頓，或者係大腦能量流動停頓，但係事實擺在眼前，阿ming既超能力的確有辦法令大腦能量流動停頓，而證明就係我地三個，會響你超能力既五秒時間內失去知覺。」「當然，呢d都係以停頓能量流動為假設前題，而另一個假設前題係阿ming你既超能力其實係無限極大化既加速能量流動，不過呢個假設好快我就ban左，因為根本無可能。」
「呢個假設係阿ming你既五秒之內，你既動作將會快過光速，所以響你既視線內見到其它所有野靜止不動，同時旁邊既人就只係見到你好似瞬間移動。但係問題在於，所有活動皆帶有能量，一個正常人係無可能承受達到光速移動既巨大能量，即使係可以，呢個人既動作亦都會帶有巨大既慣性作用力，所有比呢個人接觸既物體都會因為巨大既慣性作用力而摧毀。因為咁，呢個假設完全不成立。」
「亦因為咁，對比我...容許我自大，我響科學知識上係超越你地好多，所以充份明白同感受到阿ming呢一份超能力背後既巨大意義。而另一個問題係，到底呢一個超能力...或者講係一個巨大意義既來源─」
「...」holy shit，我同connie仲有eva原地聽左阿星一輪嘴講一大堆我明一半唔明一半既野足足十五分鐘。
「阿星...」connie開口。
「嗯？」
「我地搵個地方坐低食野啦。」
「嗯...好。」
connie開口令阿星停低唔再講落去，我同eva都響側邊苦笑。
「阿ming...呢個阿星平時都係咁？」eva細細聲問。
「唔係既...我諗呢d就係科學家同藝術家特有既古怪行為...掛？」
於是我地四個人從容行出政府總部大樓，準備去搵地方食d野，就好似返工放lunch咁，而唔係十幾分鐘前準備好要襲擊政總大樓既沉重心情。
「hi，阿星。」前面傳黎一把好似聽過既男人聲。
「...！係你！」阿星開口。
「無錯，係我，彼得‧衛斯理，你最好既拍檔...」
我望向前面，呢個人...我認得佢，兩日前我響阿mark度返工果時佢行過入黎睇，我記得佢係因為佢仲高過我少少而且青靚白淨標準靚仔一名。
佢就係彼得？
「你想點？」阿星。
「我想點？呢個問題我應該問返你先真。你到底諗緊咩？」
「多餘無謂既野我唔想講，黑核質研發科技上你嬴唔到我，口才方面亦都唔會，憑你唔洗旨意說服我。」
「咁呢邊呢個女人就要犧牲下，等你記返起貝蒂，記返起佢都係─」彼得左手一揮，一道黑影閃過，「為左黑核質而犧牲！」
黑影直穿connie個肚，響connie身上穿出一個拳頭大小既血洞，然後connie雙手掩住肚既傷口跪低。
「彼得！你‧無‧資‧格‧提‧起‧貝‧蒂！」阿星咆哮同時響褲袋抽出一堆黑珠，向彼得扔過去。
然後阿星拎起同彼得手上一模一樣既黑棍，經阿星一舉，黑棍分裂成無數黑色幼絲，每一條幼絲都接觸到散開響彼得眼前既黑珠，然後阿星再抽出錐刺，錐刺變形成為一個黑色大罩，罩住我地四個人既位置，「轟隆─」罩外巨響傳出。
黑罩縮小變返做一支錐刺，我望出去，外面一片濃煙，濃煙好快散開，我見到彼得全身血肉模糊企響度，但係佢身上所有恐怖既傷口都以肉眼可見既速度癒合緊，講起上黎，我未認真見過白色藥丸真係發揮功用既過程，我諗呢個彼得就係白色藥丸其中一個受惠者，因為呢種恐怖既情景只有白色藥丸先解釋到。
而響我側邊既eva已經完全嚇親，佢捉實我左手並且用塊臉緊緊貼住。
「阿星你同馬里亞納海溝果次唔同...出手重左好多。」好快彼得已經完好無缺，但係衣衫襤褸咁企左響度，「但係你仲有幾多黑核質原石可以用？1A？10A？比你有一千A呢個份量既黑核質，你都一樣係遲早會輸比我！」
「你果然會盜用我既研究資料，連白色藥丸你都已經整左出黎比自己。」
「係，無錯，原本我既自尊亦都唔容許我要靠你既研究資料，但係要搞破壞既人係你在先！我要做既只係阻你做既錯事！」
「我係錯？你根本唔明白，往後唔會有任何一個人同我一樣優勝而知道黑核質既末日！世上所有既事都會一步步走向滅亡，今日我就係要糾正錯事！」
「你自己就係一個錯！錯既人無資格去糾正任何野！而你做既任何野都將會比我阻止！」
「我...我唔會...我唔會比你阻止...阻止阿星。」connie企起身。
所有人既視線轉移到connie身上。
「哦...？呢個女人都吞左藥丸？」彼得將視線轉移到connie身上果個已經完好無缺既傷口，傷口上只剩返被破開既衣服，開洞既衣服露出connie腹部既白滑肌膚，「不過...呵。」
「阿星，睇黎你除左黑核質研究之外，令你身邊既女人死都係你既專長。」
「你咁講係咩意思？」
「阿星，你走得咁急，當然係無睇過同你一齊研究白色藥丸既基杜三兄弟所寫既最後報告。」
「最後報告？」
「無錯，報告上指出，一d遠離城市遠離人口密集既地區既生物樣本，會響吞左藥丸之後，有不同程度既壽命期減少。見到呢一點，代表白色藥丸仲有一定危險存在，但係你見到我都已經吞左白色藥丸，點解呢？」
「因為你覺得人同其它生物唔同？」
「錯，我並唔覺得人類有咩特別優異既地方，真正原因係，我用左少少時間實際試驗，呢樣係你無做到而唔清楚既野。經過我既試驗，白色藥丸會令生物壽命減少原因係...幅射，首先我發現實驗生物居住分佈離城市越遠，服食藥丸後會更加早死，然後我大膽進行一個假設：生物係承受唔住黑核質既幅射而加速老化身體機能。」
「然後？」阿星小心翼翼咁問，我見到阿星用右手向後面既我打手勢，示意要我用錐刺重施故技。
「然後係雖然事實上同我既假設有少許出入，但係我仍然得到一個結論：白色藥丸如果進入 一個未感染足夠黑核質幅射既生物體內，生物本身會因為突然太過接近黑核質幅射而加速身體機能老化。」
「你講大話。如果係咁，最早吞左藥丸既我一定係第一個出事既...人...」講到後面，阿星似乎都諗起一d野。
「你知唔知點解我地研究左咁耐黑核質，同黑核質有咁近距離接觸，而黑核質本身有強烈幅射，但係就唔會影響到我地？因為我地人體每一分每一秒都慢慢適應緊黑核質既幅射，由當初亞歷斯壯教授發現第一份黑核質原石開始，幅射就已經進入我地人類社會慢慢適應，呢種適應性會因為傳宗接代而慢慢累積...響黑核質一路發展既同時，黑核質既幅射亦都會被我地人體慢慢吸收，逐少逐少咁響人體裡面建立對黑核質幅射既適應性，所以當阿星你吞左白色藥丸之後，即使黑核質係直接同你體內血液，內臟，大腦，血管等等有零距離接觸，經過三百年既適應亦都會令你身體同黑核質可以完美融和。」
「...」阿星沉默。
「問題黎喇，我地三百年後既人有抗體可以免疫幅射，但係呢一個時代既人呢？」
「...」阿星仍然沉默。
「果邊果位美麗既女仕，你叫connie係咪？你吞左白色藥丸落肚係幾時既事？一個禮拜？一個月？三個月？」
「...我...唔會...唔會答你。我...一定...一定要幫阿星。」我見到connie虛弱無力，要借阿星先可以保持企響度。
「可憐...我諗你應該最少吞左白色藥丸半年以上，我好遺憾咁同你講，你將會好快死。死因係內臟及大腦承受唔住黑核質幅射而終於機能停頓猝死。」