哇我有超能力呀!!但係點解得五秒咁撚少?!: chapter.41 始末﹝二﹞

「ok...然後，阿ming，到我同你既對話喇。」

我凝視眼前既人，眼前呢個叫彼得既神秘人，感覺有少許陌生，但係呢種陌生感又令我感到熟悉。我諗左諗，大概係因為彼得同阿星都係來自三百年後既世界。

我無出聲，彼得亦都無，大概就咁冷冷既對望左幾分鐘，彼得先至開口。

「你清楚知道我就係阿星口中既彼得。」彼得面露微笑。

「...」





「而我亦都知道你擁有不可思議既神奇能力。」

「...」

「而你將你既能力錯用響─」

「stop。唔洗同我黎呢套。」

「ok，至少我知道你願意溝通。」





我忍唔住目露敵意。

「你唔需要咁望住我。因為我知道你有好多難題，而我有方法幫你解決，而目前你會好快知道，你需要我既幫助大於你對我既防範。」彼得行去我身後，將我身上所有鎖扣解開。

我立即舉起右手作勢準備啪落去─

「點解對方話你可以過濾你認為對方唔會相信既野，係因為對方一早就知道所有內情。」

我一怔，右手緊握既手指微微一鬆，我腦海飛快迴旋彼得呢一句係咩意思。





好快我大概明白係咩一回事。

「對於我既立場，你知道幾多？」對於我既威脅，彼得不徐不疾繼續有佢講。

「...」

「我認識阿星絕對比任何人都深，我知道阿星會點樣同你講我。」

「...」

「佢係一個天才，但係同時有一個天才既缺點，佢認定左一樣野就絕對唔會動搖。」

「...」

「亦都係咁，佢一定會向你講佢做既野就係正義。」





「我講左唔洗同我講呢套，直接講你既重點，唔好睇小我，我有我自己既思想。」「ok。」彼得眉頭一皺，「我想知道你既特別...或者講超能力...係點樣既一回事。」

「拎出令我接受同你講超能力既事既條件。」

「非常好，快人快語。當日見到果位美麗既小姐...我記得好似叫connie？佢短期內邁向死亡已經係扭轉唔到既事，而你另一位受害既朋友，仲有得救...如果我對你既能力既估計無錯既話。」

「...」彼得所指既係阿康，「好─」

我將所有關於我超能力既內容一五一十全部交待，包括當初通宵既實驗驗出22分鐘限制，其他人響我超能力五秒內會點，另外阿星對超能力既想法等等。

「果然無錯。」彼得聽完我所講既一切之後陷入沉思狀態，一沉就沉左好耐。

直到我開始唔耐煩，彼得開口：「我想請你實際示範一次。」





「...」我有少許無名火起，你叫我示範我就要示範？

「如果你講既屬實，五秒之內足夠你響我身上搶走致命既武器，然後藉此威脅我，但係我信你，黎啦。」

我深呼吸幾啖，仔細思考片刻。

然後舉起右手：「啪。」

如同之前一樣，我選擇左行去對方後面，五秒過後，我輕拍對方既膊頭。

彼得並無回頭望我，「好，我明白喇，麻煩阿ming你坐番低。」

「等我同你離開呢度之後，帶我去搵你既朋友，我幫你挽救你朋友既性命。」

「但係目前，你有無野想問我？」





「我唔認為你會無條件幫我，我認為知道我超能力既詳細內容並無足夠說服力令你咁做。」

「bingo，響我幫你之後，我需要你為我做一件事。」

「講。」

「我要你餘下既人生。」