【愛情】關於我一覺瞓醒發現喺初戀屋企⋯！: 21. 道歉
我抬起頭打量阿立嘅睡房嘅每一個角落，我基本上好少入嚟阿立間房⋯上次、上次嘅事只係意外⋯！
佢間房好整齊好乾淨，喺門邊嘅水松板上釘咗幾張相，佢書枱前嘅白牆上掛咗一個網格架，用一隻隻木夾夾住一張一張相
「我坐呢個位可以完完全全咁見到阿立嘅側面⋯」我望向坐喺我正前方嘅阿立
我嘅左手邊係裝飾櫃嘅雙玻璃門，裝飾櫃嘅左邊係一個幼身嘅層架，層架嘅隔離係阿立嘅工作枱
阿立嘅房淨係開咗枱燈，橙黃色嘅燈光照亮嘅範圍將半間房都包圍起嚟，床只係染到淡淡嘅柔和燈光
「要講咩好⋯」我默默咁坐喺度，但根本唔知要講啲咩
喺房入面只有阿立用mouse工作執相嘅聲音，如果佢唔㩒mouse，房內就會變成一片寂靜
「Sorry呀，喺你做嘢嘅時候阻住你⋯」我低聲抱歉咁講
「唔緊要～我都只係做緊少少手尾嘢。」阿立講嘅時候，眼睛完全冇離開螢幕一秒，「你可以照講嘢，我會聽到。」
「張畢業班相你有夾出嚟呀～我嗰張都收起咗啦⋯」我起身行到佢身後望住網格上夾住嘅相
「係呀，一直都冇換落嚟⋯」阿立望向夾喺上面嘅班相，「咁快又25歲啦⋯」
「Okay呀～都未到30歲，差唔多嘛～」我提手猶疑咗一秒，然後先輕拍佢嘅膊頭
我眼尾忽然瞄到夾喺成個架嘅右下角嘅一張相，我由阿立嘅左邊，行到佢右後側
「呢個咪⋯以前屋企樓下個遊樂場⋯？」就算張相落咗濾鏡、tune過光影、tune過色，我都可以一眼認出呢個公園
「係呀，以前小學嗰陣放學一定去玩，玩到黃昏先番屋企⋯」阿立先一步提起以前小學嘅事
以前仲係小朋友，我同阿立讀同一間小學，咁啱大家都係住附近，所以放咗學之後，我地再加幾個同學都會喺嗰度玩一陣先再番屋企
「搬咗之後都冇再番過去⋯」阿立微微點一點頭，然後好似思考咗一下先再耷低頭望電腦
唔知係唔係我嘅錯覺，佢啱啱嘅語氣聽起嚟，好似喺平靜嘅語氣中不自覺咁夾雜咗一份少少嘅歉意⋯
房內寂靜一片，佢嘅呢句好似踩到啲咩唔應該踩嘅區域一樣，令我同佢都自然咁安靜落嚟唔講嘢
我喺沉默中行番去豆袋坐低，攬住放喺豆袋上嘅蕃茄造型抱枕
佢係唔係都同我諗到同一件事⋯諗起當初佢自己嘅不辭而別⋯？我都可以感覺到氣氛一瞬間凝固
「Sorry⋯」阿立喺空氣凝固半分鐘後突然道歉，面對佢突然間拋出嘅道歉，我有啲愕然
「做咩要道歉⋯？」我輕皺一下眉頭，「點解⋯要say sorry⋯？」
「唔知道，我唔知你有冇嬲我咩都冇同你講就搬走咗⋯」阿立嘅表情有啲沉重，「但我覺得我應該要同你say sorry⋯可能當時你都唔覺得有所謂，但，就係咁樣⋯」
「嬲呀，好嬲！」佢聽到我咁講而擰轉頭望向我嘅時候，我已經定睛望住佢，「你點可以咩都唔同我講就走咗去⋯」
你知唔知道因為你嘅不辭而別，我有幾傷心？你唔會知道呢件事我諗咗幾耐⋯
我唔明白，你不辭而別嘅原因⋯係唔係因為分咗手，所以連咁多年嘅朋友都唔再係⋯？
「我什至係喺你走嗰日，媽咪同我講我先知道⋯」我微微耷低頭，視線落喺我攬住嘅抱枕上面
佢搬屋嘅嗰一日，我到宜家都記得好清楚⋯我當下嗰種難受、愕然、錯愕、痛！我都記得⋯我居然咩都唔知⋯！佢居然咩都冇講⋯
我記得好清楚，佢搬屋嘅嗰一日，係放榜之後嘅嗰一日⋯
「你唔洗去送阿瑜咩？」媽咪推開我嘅房門行入嚟之後忽然間問我，「我仲以為你一定會去。」
「阿立？送佢？去邊呀？」本來因為同阿立分咗手而消沉緊嘅我坐好起嚟問道
我都唔知發生咗咩事，媽咪忽然一問，我都一頭霧水
送阿立⋯？佢要去邊呀⋯？佢可以去邊⋯？
「你唔知咩？我仲以為阿瑜有同你講添！」媽咪輕皺起眉頭，語氣中係滿滿嘅愕然，好似係我應該要知嘅事一樣
「講咩⋯？」我嘅心裏突然不安感來襲，最近我同阿立都冇講過嘢已經，我完全唔知咩事，「咩呀⋯？」
「阿瑜佢地一家搬屋嘛！我同阿姨仲話你一定會去送佢，畢竟由細玩到大嘛～」媽咪笑笑口咁打開衣櫃，將收番嚟嘅衫都擺番入去
「搬屋！？」我震驚到對媽咪講嘢嘅音量都大咗，「幾時嘅事呀？點解冇人同我講㗎？」
「我地以為阿瑜同咗你講咋⋯」媽咪一個「咁大聲做咩」嘅表情望住我，「阿瑜冇同你講咩？」
「幾點呀？幾時走呀？」「今日囉！差唔多啦應該，阿姨話呢啲時間。」
我即刻有啲慌張，媽咪行出我房，房入面只有我一個人啦⋯
阿立要搬屋，但點解從來都冇同我講過⋯？佢係特登唔同我講⋯？點解⋯？
就算係分手之前⋯佢都冇同我講過佢要搬走⋯佢要搬去邊？係唔係要搬去好遠嘅地方，新界之類⋯？以後要見一面，咪會好難⋯
「見面嘅話會⋯」我忽然好似發現啲咩一樣，無力咁坐低喺床上，「阿立係預咗以後都唔見我，所以咩都冇同我講⋯」
我即刻拎起手機，搵到阿立嘅電話號碼就打過去
「你所打嘅電話號碼暫時冇人接通，請遲啲再打過啦～」電話裏頭傳嚟我唔想聽到嘅嘢，唔係接通嘅聲
求下你聽電話，話比我知唔係真⋯話比我知你唔係特登唔同我講⋯話比我知你對我唔會咁狠心⋯
IG Link: https://www.instagram.com/nd_cotttoncandy/?hl=zh-tw