【愛情】關於我一覺瞓醒發現喺初戀屋企⋯！: 22. 為什麼⋯？
「嘟嘟⋯嘟嘟⋯你所打嘅電話號碼—」
「嘟嘟⋯嘟嘟⋯你所打嘅電話號碼—」
「嘟嘟⋯嘟嘟⋯你所打嘅電話號碼—」
原來，佢係真係特登唔同我講佢要搬⋯係因為佢真係預咗以後都唔再見⋯
嗰一刻我先發現，原來阿立係一個狠心嘅人，狠心到對我呢個由細玩到大嘅好朋友、青梅竹馬、前女友都一句唔提就消失喺我眼前⋯
當下嘅痛，嚟到宜家呢一刻嘅我，都仍然可以感覺到刺痛嘅感覺⋯明明我有好多嘢想抱怨，有種想將我嘅委屈話晒比佢知嘅衝動，但你要我真係講出口嘅話⋯
「算啦⋯都過咗去啦⋯」我最後整頓好所有感情思緒之後，用一句最冇意思嘅說話去蓋過我所有嘅難過
我唔想望佢，呢一刻我臉上嘅表情，一定會令氣氛更尷尬⋯我地只係合租，佢已經冇聽我嘅委屈嘅必要
既然係普通人一樣，咁就同普通人一樣相處就係⋯
「嘎—」沉默嘅尷尬比一聲突如其來嘅聲打破，我雙眼嘅餘光見到佢將櫈推後
我餘光中可以見到嘅光忽然消失，只有最左邊同最右邊有光滲出嚟，中間最明亮嘅光完全比人擋住咗
「嗯⋯？」我微微抬頭，阿立離開咗書枱企喺我面前
佢突然間踎低喺我面前，垂眸嘅佢臉上係充滿歉意嘅表情，佢呢個表情，係咩意思⋯？
「知珩，你可唔可以原諒我當初嘅不辭而別⋯？」阿立盤腿坐喺我面前誠懇咁定睛望住我問，語氣柔和到好似當我係小朋友一樣咁氹
「都咁耐啦，我都冇再嬲。」我平靜咁搖搖頭，只係心入面諗起都會有啲唔舒服，時間的確會沖淡一切
我明明已經講咗我冇嬲，但阿立就側住頭望我，好似唔信我講嘅嘢一樣
我真係冇嬲，但嬲唔嬲同原唔原諒，係兩回事⋯至於你話我原唔原諒⋯
「真係冇嬲啦⋯」我再重複一次，今次更加堅定咁講，「都過咗咁耐，嬲都冇意思⋯」
「咁你原諒咗我未⋯？」阿立追問我，我呆咗一下
「嗯⋯」我下意識就點頭，其實早就唔存在原唔原諒嘅問題，「都咁耐啦⋯」
既然要搬屋，一定係一早就決定好嘅事，喺放榜前我地根本都未分手，有好多個機會可以講，但最後⋯
「你點解咩都唔同我講⋯？」我又問多佢一次，我執著嘅點，係呢個
我嘅手放喺膝頭上托住臉頰，但我始終冇望佢，唔知係我冇勇氣望佢定因為我怕自己會點樣⋯
「你⋯識咗第二個？對我厭啦⋯？」我望向佢，講出曾經我考慮過嘅原因，宜家終於有人可以比一個解答我，「定太突然間決定⋯？」
「唔係。」阿立一個堅定嘅表情、肯定嘅語氣回答，「唔係因為咁，總之唔係你諗嗰啲原因⋯」
呢一刻嘅佢，似乎冇打算話比我知佢嘅理由，佢只係好肯定咁話我知，唔係厭倦、唔係背叛、唔係突然決定⋯
「嗯⋯好。」我緩緩咁點一點頭，望向佢嘅同時將嘴角撐起少少，「原諒你。」
「嗯，你仲未眼瞓呀？」阿立企起身，轉身行番書枱嘅時候好順手一樣摸咗我個頭一下
「瞓唔著⋯」我細聲回答佢嘅同時，伸手將髮絲翹到耳仔後面
「明知自己細膽就唔好睇恐怖片啦～」阿立望向我輕輕一笑，然後坐低喺書枱前繼續執相
我定睛望住阿立，突然間做咩摸我個頭，雖然唔係討厭，但感覺好似小朋友先會做嘅嘢一樣⋯
⋯
放喺床頭嘅手機一直喺度響，明明我今朝先閂咗一次鬧鐘⋯
「喂⋯？做咩呀⋯？」我趴喺床上面拎起手機放到耳邊
「十萬火急呀！！！」阿逸好大聲咁講，大聲到我要拎開手機但都聽到佢講嘢
「咩事呀⋯我今日Day off呀⋯你搵樂恩啦⋯」我懶洋洋咁轉咗個身
「樂恩喺度啦，差個沖咖啡⋯」阿逸嘅語氣無奈到冇得再無奈
「上次咪教咗Abby⋯」我拎住電話灘喺床，但感覺我都冇可能瞓得番，「我同佢一齊嘅時候，佢都冇咩大問題⋯」
「Abby突然間話陣間臨時有緊要嘢做呀⋯要走兩、三個鐘先再番嚟⋯」阿逸突然間細聲咁，「你番嚟頂兩、三個鐘得唔得？」
我靜咗落嚟，慢慢爬起身坐喺床上面，伸手摸一摸額頭、將垂喺臉前面嘅頭髮向上梳去後面
「知珩呀～唔該你啦～最多請你飲奶茶啦好唔好？」阿逸把聲聽起嚟都急到要喊出嚟一樣
「嗯嗯嗯⋯」我忍唔住笑，睇嚟佢真係好急要搵人番去，「我盡快啦⋯」
⋯
我行到離cafe唔遠嘅地方，都未到cafe嘅大門，已經見到一條好～長嘅隊喺度
明明我地cafe唔細，面積都幾大，但都可以有咁長嘅隊就知生意有幾好，同埋阿逸點解要我番嚟救命
「叮鈴鈴鈴～」我行到隊嘅最前，直接推開cafe嘅大門，cafe嘅員工一聽到呢個聲下意識就望過嚟
「嘩～救星番嚟啦⋯！」樂恩見到我即刻大嗌道
「嘩⋯你終於番到啦⋯」阿逸一個攰樣喺廚房行出嚟，「我幫你拎個袋入去，你快啲換圍裙！」
阿逸喺休息室拎住我嘅圍裙出嚟，伸手指一指我個袋示意我將個袋交比佢
「水吧位得卓卓一個⋯？」我邊綁圍裙邊行去水吧，卓卓一個人又要出甜品又要沖嘢飲仲要落埋單
「知珩姐救命呀～你番嚟就好啦～」卓卓一見到我即刻就嚟喊出嚟一樣，「睇下啲單長到⋯！」
「唔怕唔怕，你落單啦，呢度我搞得掂。」我先安撫一下卓卓，明明都番咗半年，但一忙起上嚟佢都會慌慌張張咁
我梳起馬尾，紮好頭髮之後洗個手，然後拎起垂落嚟長長嘅單，望一望有咩咖啡有咩特飲先
IG Link: https://www.instagram.com/nd_cotttoncandy/?hl=zh-tw