【愛情】關於我一覺瞓醒發現喺初戀屋企⋯！: 51. 挑釁
我知道，同阿立分咗手之後嘅我邊個都唔係，佢大學要拍拖我都冇資格嬲，因為我自己都有拍拖，但聽到佢同我游巧盈拍拖嘅事，我都係忍唔住嬲
原來所有人都知，只有我唔知佢同游巧盈一齊過；所有人包括阿立本人都知，我係真係討厭游巧盈呢個人，但阿立偏偏，就係同咗佢一齊
成餐飯，我都冇望過阿立一眼，呢件事如鯁在喉，令我冇辦法沉住氣好大方咁笑
「恩舒，我去個toilet。」我拎起搭喺我大腿上嘅餐巾放喺枱上面然後起身
我入廁格去完toilet之殷打開門，一打開廁格嘅門就見到游巧盈企喺洗手盆前整緊耳邊嘅碎髮，佢從鏡中望咗我一眼，我同佢都冇打招呼
「聽佢地講，你今日同許翊瑜一齊嚟？」游巧盈先開口，但佢呢句喺我耳中聽起嚟，點聽都係挑釁緊我
「嗯，係呀。」我一望到佢呢個正要挑釁我嘅笑容，我嘅好勝心即刻冒起，「做咩？知我地一齊嚟，你好失望啦？」
「你地又唔係一齊番，有咩好失望？」游巧盈微微一笑，「又冇人話你一定贏。」
「做咩，你仲中意阿立？」我挑起眉，我感覺我下一秒頭頂都要出煙，但我一定要忍住，「冇人話我會贏，亦冇人話我會輸。」
「你好似唔知道我同佢一齊過係唔係？」游巧盈行近我一步，故意提起仲要笑住問我，「你在意？都係嘅～我覺得佢會中意我都係正常。」
「我冇在意你有冇同過佢一齊。」我微笑道，但呢句係大話，不過下一句係真：「因為我，完全冇將你放喺眼裏面；而且，有邊個知道，佢係唔係搵你做我嘅代替品？」
游巧盈本來掛喺面上嘅笑容即刻僵住，睇嚟，我講中咗佢最介意嘅嘢，睇嚟，亦唔係得我一個人咁樣講過
「你唔洗在意我，畢竟我同阿立小學已經識，我對佢嚟講，同你對佢嚟講一定係唔一樣，你唔洗怕同我一樣。」我微微抬起下巴，我絕對係特登咁樣講，睇佢呢個得戚樣唔順眼
「呵，李知珩，你原來會咁樣講嘢？」游巧盈冷笑一聲，「宜家選擇權喺許翊瑜嘅手上面，佢會揀番我定你，都係未知之數；邊個係邊個嘅代替品都未知。」
如果呢個時候有人入嚟廁所，大概會呆咗一下然後轉身走，以為自己睇緊電視劇情節
「哦，你要爭嘅咪爭，爭得贏咪爭。」我諗起阿立問我嘅一句重新開始，嘴角就自動上揚，「不過，我諗你都係做定輸比我嘅準備啦。」
同其他人比我都唔敢咁肯定講，但同游巧盈，我就敢肯定我贏面大啲，我唔知佢同阿立拍過一段時間嘅拖，佢都唔知道我同阿立宜家一齊住，彼此彼此
我洗完手就行番去間房同大家繼續食飯，我前腳入嚟，游巧盈後腳就行入嚟，我感覺到佢望咗我一眼，但我都懶得再望佢
⋯
食完飯之後，大家行出餐廳喺餐廳門口等埋一齊先再分開走
「咁下次再約啦，宜家要約齊人真係好難⋯」今次嘅搞笑無奈咁嘆一口氣，「睇下大家下年幾時得閒再食飯啦⋯！」
「好呀～」「好！」
唔知係大個咗定出咗嚟做嘢嘅關係，好容易就聽得出呢啲回答都係客套說話，只係講住先，畢竟去到下年，大家又唔一樣啦嘛
「搭地鐵番去？」企喺我前面嘅阿立自然咁向後行咗一步，企喺我隔離低聲問我
「唔⋯地鐵啦，地鐵近啲。」我點一下頭
「做咩？」阿立探頭望我
「冇做咩。」我平靜咁回答，平靜到好似冇事發生過一樣
行到地鐵站入面，原來我地同大家搭嘅方向都唔一樣
「我同知珩搭嗰邊。」阿立先開口同大家講
「你地都嗰邊呀？」有男同學有啲訝異，因為真係得我同佢住嗰邊，都冇其他人同我地同路
「哦係呀。」我正要開口嘅時候，阿立又搶先一步開口
對面月台嘅車啱啱好嚟到，我擰轉頭望咗一眼飛快駛入月台嘅列車，伸手拉一下阿立嘅衫角示意有車
「我地有車啦。」阿立擰轉頭望一眼，「行先啦我地。」
「拜拜～」「拜拜～」
阿立轉身行嘅時候，好順手咁捉咗我隻手一下，我順住佢嘅動作轉身行，小跑起嚟到對面月台
「嘟嘟嘟嘟嘟嘟嘟嘟—」
車門閂上，我背靠住玻璃企，阿立企喺我面前微微側住頭望我：「做咩唔出聲？」
「冇嘢要講咪唔出聲。」我淡然咁講咗一句
「唔⋯」阿立望住我，好似有咩要同我講但又講唔出口一樣，我抬眼望一望佢，佢先開口：「你⋯有冇嘢想問我⋯？」
「我可以有咩問你⋯」我特登望向窗出面，我怕我嘅眼神會表達出我嘅心虛
「真係冇？」阿立又再問我一次，「完全冇？」
喺呢個咁近嘅距離，佢微微耷低頭講嘢嘅時候，用只有我聽到嘅聲量，心臟⋯都噗噗跳⋯
「冇⋯有咩好問⋯」我將自己嘅視線定住喺窗外
「你就唔想知鄭恩舒講嘅係唔係真？」阿立嘅左手插喺褲袋，佢嘅表情睇起嚟就係好想我問
「你又知恩舒同我講咗啲咩？」我嫌棄咁望佢一眼
「憑你望我嗰個眼神同表情，都知道鄭恩舒大概講咗啲咩。」阿立好有自信咁講，「所以，你有冇嘢要問清楚我？」
「所以，係唔係真⋯」我選擇退一步，我喺佢面前要面子都冇意思，但我亦唔願意100%低頭
我有一刻希望佢會話我聽係假，恩舒講嘅嘢係假，佢大學嘅時候冇同游巧盈一齊，冇特登開一個IG account po同游巧盈有關嘅嘢
話我知，呢啲事係假，只要係你親口講，我就會信⋯
「係真㗎。」阿立一句，將我心入面本來燃起嘅一個小火苗直接吹熄
IG Link: https://www.instagram.com/nd_cotttoncandy/?hl=zh-tw