【愛情】關於我一覺瞓醒發現喺初戀屋企⋯！: 52. 不忿
「Okay⋯我冇嘢要問啦。」我點一下頭，然後抬起頭望住佢同佢對望
真係好煩躁⋯躁鬱嘅感覺由肚升到上腦，特別係聽到佢親口承認同過嗰個我討厭嘅人一齊之後，我更煩躁⋯
我因為感到煩躁而安靜咗落嚟，阿立似乎都因為冇嘢好解釋所以沉默不語，沿路上我地完全冇交流，行出地鐵站亦冇出聲，睇起嚟好似陌生人一樣
喺差唔多行到番屋企嘅時候，阿立叫咗我一聲：「知珩⋯」
我擰轉身望佢，阿立同我面對面企，佢呢個表情，係有嘢想講、係有嘢要解釋⋯
「你唔洗解釋啲咩⋯」我帶住沉重嘅心情呼一口氣，感覺好似有一塊大石壓喺心口一樣，「嗰陣我同你已經分咗手，你同邊個一齊都係你嘅選擇，我冇資格去講啲咩。」
「既然係咁，點解你要嬲？」阿立大概係問出佢沿路番嚟都想開口問嘅嘢
「冇，就係我單純咁討厭游巧盈呢個人。」我冷笑一聲，原因本來就係咁單純，我收起笑容直視阿立：「你都知㗎，一早就知。」
「嗯。」阿立面無表情咁回答我
「嗯，所以就係咁⋯」我嘆一口氣，連呢一口氣都係沉甸甸
「所以，因為我同過佢一齊，你唔打算同我重新開始？」阿立大步走向我，「就係因為呢個原因。」
企喺我面前嘅佢，將本來照亮我嘅街燈都遮住啦⋯我同佢嘅距離又變到好近，可以聽到佢嘅呼吸聲，睇到佢胸口因為緊張而頻密嘅起伏⋯
我抬起頭望佢，佢呢個直接了當嘅問題令我有啲意外，我心入面係想⋯但係我有啲猶疑⋯
「哼⋯」我輕哼一聲，同佢四目交投，「你唔係好了解我咩？」
「幾啦，識咗咁多年。」阿立認真咁點一下頭
我望一望佢，我都冇佢咁好氣⋯明知道我唔中意啲咩討厭啲咩都要照做，仲要理直氣壯咁話幾了解我
了解我又做我唔中意嘅嘢？仲要問番我轉頭點解嬲？許翊瑜你係唔係搞笑？
「你地唔係咩都要爭㗎咩？」阿立嘆氣問我
「你係人，我可以左右你嘅思想咩？」我輕皺起眉頭望佢，「你要同邊個一齊，我可以阻你咩？」
「個個都話，佢同你好似，唔係咩⋯」阿立低聲講咗一句
阿立講出呢句，我就知道佢諗咩，但係，好搵唔搵，搵游巧盈⋯
「宜家我講咩你都唔聽啦⋯」阿立無奈咁將視線移開
「渣男。」我握拳打喺阿立嘅心口
「喺你面前係好人咪得。」阿立即刻露出笑容
「唔係啦。」我輕哼一聲，又再打佢一下，「衰人啦係，你唔好諗住咁樣講兩句我就當冇嘢呀⋯！」
「你繼續扮啦～」阿立伸手托住我下巴，掐住我兩邊臉頰，「你估我唔知你諗咩？」
「哼⋯」我低聲哼咗一聲
我忽然覺得自己都要比佢拿捏住，就係因為佢太熟我！搞到我諗咩都比佢知個8、9成
我覺得浩宜講得啱，就算係想重新嚟過，都要欲拒還迎，如果唔係真係比佢拿捏到實一實
「許翊瑜你鬆手呀⋯！」我推開佢隻手，摸一摸自己嘅臉頰，然後毫不猶疑咁又打佢一下，「衰人⋯」
我自己都將自己搞唔明白，我做咩真係好似非佢不可一樣？有好多人都比佢好，但偏偏係佢最牽動到我嘅情緒
大學嘅時候，我都冇試過比李毅遠牽動住我嘅情緒走，佢對我係好好，但我仍然好理性、好理智去做每一件事
以前李毅遠問過我一個問題：「點解你咁完美？唔會無理取鬧、唔會發脾氣、又唔會有小情緒？」
但我諗唔係我冇⋯我唔係完美，我都會無理取鬧⋯都會因為好小嘅事而發脾氣⋯都會有小情緒嘅時候，只係⋯
「番去未？」阿立問我，「嬲完就番去啦～」
聽到佢語氣中嘅柔和嘅我，氣都消咗一半，呢個人真係好過份，當初一句冇feel同我分手，講到咁傷我心，宜家就想同我重新開始⋯
「冇嘢好嬲。」我直接就邁步行，但其實我仲係有啲嬲
「唉～」阿立追上我嘅步伐，行喺我隔離，「李知珩，你瞞唔過我。」
「哦。」我不悅咁望佢一眼，心入面仍然有啲唔高興，「隨便啦。」
我忽然感覺到放喺袋入面嘅手機喺度震，我好快手咁喺佢收線前拎出嚟聽
「喂？阿逸？」我將手機放到耳邊
「知珩你過唔過嚟食糖水？」阿逸問我，喺我正要開口嘅時候，阿逸開口補充一句：「樂恩同卓卓問你⋯」
「唔啦，我番到屋企樓下啦。」我回答，而且我都冇特別想食糖水，啱啱喺餐廳都已經食咗甜品
「唔緊要啦，佢兩個係咁叫我打比你問⋯」阿逸無奈咁笑，「你都快啲番去休息啦～」
「行緊番屋企啦～」我朝阿立望咗一眼，佢一直耷低頭睇緊手機，「下次先食糖水啦。」
「好啦，聽日見啦。」阿逸把聲聽起嚟好似拉遠咗啲：「知珩唔嚟，你兩個好煩呀真係⋯！」
我忍唔住笑咗笑，阿逸同佢地一齊，永遠都好似湊小朋友咁，樂恩同卓卓先20出頭，成日拉住阿逸呢個就嚟30嘅人又跑又跳
「知珩！聽日見！！！卓思齊你擋住我啦！」「聽日我都番工呀！！！」
電話裏傳嚟樂恩同卓卓大嗌嘅聲音，我即刻將手機從耳邊拉開，我已經幻想到佢兩個捉住阿逸隻手對住電話大嗌個情景
「得啦得啦！知珩聾啦！」阿逸制止咗佢兩個，睇嚟佢順利咁拎番手機：「拜拜啦，聽日番工見啦，佢兩個又發癲啦準備⋯」
「好啦～拜拜。」我笑道
平時樂恩同阿逸已經夠火花，加埋卓卓真係不得了⋯但佢兩個平時喺我面前好少咁樣咁嘈，多數對住阿逸先係咁，可能呢啲係化學作用嚟
「你要去食宵夜？」阿立嘅視線從手機螢幕上移開
IG Link: https://www.instagram.com/nd_cotttoncandy/?hl=zh-tw