【愛情】關於我一覺瞓醒發現喺初戀屋企⋯！: 53. 暗自高興
「唔去，仲係好飽。」我搖搖頭，將手機收入入袋，「而且都番到嚟樓下啦⋯唔想再行一轉⋯而且我前兩日先買咗雪條喺屋企。」
「都係。」阿立點一下頭，「番去食完雪條唔嬲啦？」
「我又唔係嬲啲雪條，食唔食都唔嬲佢地。」我知道阿立嘅意思，不過就係唔想明
⋯
半夜
「想去廁所⋯」我輕皺住眉頭掀開被坐起身
床頭嘅燈仍然開住，喺半夜嘅時候就算較到最暗都顯得有啲太光⋯算啦，去完廁所再講⋯
我將房門打開，等枱燈嘅光可以滲出走廊，我向來怕黑，都要開住燈先瞓得著；我嘅手摸住牆，靠住牆行到去廁所門口
沖廁嘅水聲喺半夜特別嘈特別刺耳，我行出走廊之後好快咁將廁所門閂埋
廁所對面嘅房門虛掩，橙黃色嘅燈光喺門縫滲出嚟，我鬼使神差咁行到房門前，從門縫望入去，阿立伏喺書枱上面，枱上嘅電腦都變咗睡眠狀態
「嘎—」我輕力咁推開房門，房門突然發出有啲刺耳嘅一聲，我成個人即刻僵住喺原地
我企喺原地望住阿立嘅背影，阿立冇比門發出嘅聲音嘈醒，仍然好安穩咁伏喺枱上面瞓
「阿立？」我輕手輕腳行入佢房，柔聲叫佢一聲但佢都係瞓得好冧冇醒到，「上次張薄被⋯」
我左望右望，我記得阿立有一張薄被，上次我都蓋過，唔⋯
「喺度⋯」我拎起比人亂糟糟咁掉喺床尾嘅薄被，將被打開對摺好，然後行到阿立身後
我怕我會嘈醒佢，特登再將腳步放輕啲，當腳步放輕嘅時候，連呼吸都會不自覺咁跟住一齊放輕
我喺將對被輕蓋喺佢背上之前向右邊探頭望咗佢一眼，然後行到窗前將窗簾拉埋
「唔⋯」
我聽到阿立出聲以為佢醒咗，陣間點解釋我點解會喺佢房？
我迅速擰轉頭望佢一眼，雙手仍然捉住窗簾，阿立將雙臂一縮，雙臂間嘅空位即刻收窄咗，但佢只係咁樣郁咗一下，冇真係醒過嚟
「呼⋯」我捉住窗簾嘅雙手放鬆垂落嚟
我又一次行到阿立身後，拎起滑落嘅被再次蓋番上佢嘅背上面
會關心對方明明好正常，見到識嘅人都會關心多兩句，但點解我就會咁心虛？
「真係冇醒係唔係？」我行過兩步探頭又望阿立一眼，「咁攰仲做嘢⋯」
我打量一下佢貼咗出嚟嘅相，有啲係佢自己影嘅相、有啲係同朋友嘅合照、有啲係以前中學影嘅相
「仲以為佢會貼咗同游巧盈一齊嘅相⋯」我有啲失望見唔到佢地一齊影嘅相，但更多嘅係輕鬆，「好彩真係冇⋯」
諗起今日喺女廁游巧盈嗰個態度，我就覺得唔舒服，憑咩覺得佢自己一定贏⋯？我對佢講嘅嘢都只不過係一大堆事實，都唔係大話
我唔係話我肯定阿立係搵佢做我嘅代替品，只係⋯對我嚟講，阿立會中意佢都真係好意外嘅事，我聽到恩舒話佢兩個一齊過嘅時候，心入面都希望阿立係搵佢做我嘅代替品
但諗深一層，阿立對我都冇feel，仲搵佢做我嘅代替品做咩⋯？我係打從心底討厭游巧盈，望佢一眼都會喺心入面反白眼嗰種程度
「唉⋯真係難明⋯」我望住伏喺枱上瞓得安穩嘅阿立就忍唔住嘆氣
我遲疑咁伸手，偷偷地摸阿立嘅頭髮一下，我連力度都唔敢太大，只敢輕輕力掃一下
我呀⋯都應該要番房瞓，我本來都只係出嚟去個廁所⋯
我輕手輕腳咁行番去佢嘅房門口，將門細力咁虛掩埋，睇起嚟就好似我冇入過去一樣
⋯
⋯
⋯
我同Ella食完飯行番公司，咁啱經過知珩番工嘅cafe
「咦？呢間就係Mavis話佢成日嚟嗰間cafe呀？」Ella探頭望一眼cafe嘅招牌，「咁啱我打算買杯咖啡～咁就呢間啦～」
我都未開口講嘢，Ella直接一手捉住我拉我入去陪佢買咖啡
我企喺一邊等佢，佢買完咖啡拎住張單，兩步一回頭咁行近我，仲有幾步到我面前嘅時候小跑過嚟
「嗰個係唔係就係Mavis講嗰個靚女咖啡師？」Ella低聲問我，偷偷指一下水吧嘅方向
知珩著住cafe嘅圍裙企喺水吧嘅咖啡機前面，動作都好熟練，一沖完一杯就放喺隔離等出單
「嗯。」我點一下頭
「Mavis話上次嚟諗住又嚟識佢，但比個同事阻止咗，叫佢唔好阻住。」Ella低聲笑道
「佢唔好阻住人做嘢啦⋯」我望住個知珩嘅方向無奈咁講，「面皮冇佢咁厚真係做唔出成日撩人講嘢⋯」
「Mavis話終有一日個咖啡師佢比佢嘅誠意打動到喎⋯」Ella有啲嫌棄咁講
唔會囉⋯咁樣唔係叫死纏難打咩？人地都唔理你，做咩仲要自討沒趣咁繼續⋯？Mavis嘅思想方式我真係搞唔明⋯
「算啦，佢面皮咁厚⋯佢都唔介意比人拒絕⋯」我輕嘆一口氣，只係因為我都唔知可以再講啲咩
「Mavis叫我幫佢拎佢IG⋯」Ella踮起腳尖靠近我，細聲問：「我要唔要試下？」
「你唔好陪佢癲啦。」我阻止咗佢呢種行為，陣間人地以為我地公司啲人都咁癲，成日周圍打擾人
「通常靚女都係冇男朋友，你估下佢有冇男朋友？」Ella又問我
我嘅視線從手機螢幕上移開，望咗Ella一眼，知珩有男朋友同冇男朋友都一樣⋯你估佢真係會比手機號碼或者IG你⋯？
不過我肯定佢冇，一定冇，我知佢一定冇男朋友，唔好問我點解會知⋯
「叮鈴鈴～叮鈴鈴～」「咦⋯我聽個電話。」
Ella拎住電話喺我前面經過，順手就將佢將單遞比我：「陣間有嘅話幫我拎一拎，我出去聽電話～」
我伸手接過佢張單，佢就匆匆忙忙咁拎住手機行出cafe，行到出去行人路聽電話
「065。」
我望咗手上嘅單一眼，單上面就係用黑色粗體寫住「065」，我拎住張單行過去
「065。」知珩又嗌咗一聲，我將單遞比佢嘅時候佢先抬頭望我，「係你呀？」
IG Link: https://www.instagram.com/nd_cotttoncandy/?hl=zh-tw