【愛情】關於我一覺瞓醒發現喺初戀屋企⋯！: 69. 小睡片刻
「唔⋯」
我迷迷糊糊咁睜開眼，眼前嘅電視喺閂晒燈嘅廳入面顯得超級刺眼
我真係喺廳瞓著咗啦⋯阿立係唔係怕我會怕黑，所以冇閂到電視？
「嗯⋯？」我正想坐起身嘅時候，發現頭頂有啲重、頸有啲痛
我嘅視線自然咁望住下方嘅時候，見到一對舒適咁交搭住嘅腳，我緩緩咁將個人退出嚟少少
「阿立都瞓著咗⋯」我望住側住頭瞓嘅阿立，阿立雙手隨意咁放喺大髀上面，「我一直咁樣靠喺佢膊頭瞓⋯？」
我正想要伸手拍佢將佢叫醒番房瞓嘅時候，我嘅手懸喺半空一頓，又慢慢放番落嚟，我成個人慢動作咁移番正個人，偷偷咁又將頭靠到阿立嘅膊頭上合埋眼
「好香⋯」我合埋雙眼，就可以聞到阿立身上嘅味道
明明我同阿立都用同一隻沖涼液，但點解阿立身上嘅味道會香咁多⋯？可能係因為混埋佢自己嘅味道
「好安心⋯點解⋯」我感覺到我成個人打從內心深處平靜落嚟，冇一絲波瀾
阿立忽然郁咗一下，深呼吸一口，然後帶住迷糊嘅低沉聲音喺我耳邊傳嚟：「幾點⋯2點幾⋯」
我都唔知點解我會扮自己冇醒，一直合埋眼，有啲好奇阿立會點做，應該都係好似上次咁拎張薄被幫我蓋好
我感覺到阿立嘅手放喺我同佢膊頭之間，將我個頭溫柔托起少少，睇嚟佢真係打算起身拎被
「沙沙—」隔離嘅坐位冇人起身但傳嚟移動嘅聲音，阿立應該係調整坐姿？
下一秒我又慢慢咁靠番住佢嘅膊頭，佢隻手喺我面前將擋喺我面前嘅髮絲以輕柔嘅動作翹到我耳後
「佢係打算繼續咁樣瞓⋯？」我喺心入面產生咗個問號，真係由得我同佢自己咁樣喺廳瞓，「算啦⋯反正我個頭要靠嘅高度同佢膊頭嘅高度差唔多⋯」
兩個有床嘅人唔瞓床，偏要用一個咁唔舒服嘅姿勢喺廳瞓
我再醒嘅時候，已經係聽到擺喺房嘅鬧鐘鬧醒我嘅時候⋯我坐起身嘅時候，阿立都比我個鬧鐘一次過嘈醒
「唔⋯！」阿立皺住眉頭摸一摸後頸
「頸痛啦？咁樣瞓咗一晚。」我擰轉頸望佢，我仲坐喺梳化等我嘅大腦醒過嚟，好似等緊佢開機運作咁
「少少⋯」阿立耷低頭，手拍一拍後頸，「起身啦⋯要番工啦⋯」
「你今日都係番呢個時間呀？」我行得愈近我間房，我把聲就漸升
「嗯，陣間可以一齊出門口？」阿立嘅聲音有啲細，可能因為佢喺自己房，有道門隔咗一隔
「好呀～」我換好衫行出房，拎住化妝袋去廁所化個妝，而且都未刷牙洗面
我行到去廁所嘅時候，阿立企喺洗手盆前刷緊牙，見到我行入嚟嘅佢邊刷牙邊行出廳
轉個頭阿立又行番嚟廁所，見到我拎住牙刷：「我以為你要去廁所⋯」
佢靠住喺門框上刷牙，兩個刷緊牙嘅人對望一眼，阿立行到我隔離拎起水杯漱個口，開住水喉用手接水洗個面
「你唔好用件衫抹面啦⋯！」我望住佢閂水喉嘅下一個動作係將件衫掀起抹乾面上嘅水
「是旦啦，平時都係咁。」阿立冇所謂咁聳肩
我地仲有時間一齊食個早餐先出門口，喺阿立著鞋嘅時候，我對住門邊嘅鏡整理一下衫同頭髮，順便睇下今日個妝好唔好睇
「都話係你用多。」阿立單膝跪喺地上綁鞋，帶住淡淡嘅笑意抬頭望住企喺鏡前嘅我
「勁啦～咁都比你估到啦～」我捉住袋嘅孭袋一個90度轉身面向佢，「行得未呀？」
「行得！」阿立企起身轉身開門，「今晚要唔要出去食？」
「今晚？好呀～」我爽快答應佢
我同佢每一日嘅開始同結束都係呢度，如果當初係第二個女仔同佢合租嘅話，故事又會變成點？
⋯
⋯
⋯
「阿瑜阿瑜！」喺我差唔多行到番公司樓下嘅時候，一個人影快速接近我，「早晨！」
我回頭一望，係Ella⋯一大清早就咁精神，我仲係有啲攰，而且頸都有啲痛⋯
「啱啱見到你啦～」Ella擰轉頭指一指後面嘅方向示意，「見到你同個女仔一齊⋯」
「哦⋯係呀。」我都唔知我要答佢啲咩，但下意識就答咗佢係
「又話冇女朋友嘅～」Ella擺出一個準備講啲咩窒我嘅笑容，側住頭問我，睇起嚟好似問緊我做咩要講大話一樣
「又真係冇女朋友。」我笑一笑回答
曾經係女朋友，宜家唔係女朋友，但以後都會係我女朋友，我對呢件事有莫名嘅自信，就算對手係邊個都好，我都有種感覺佢會同番我一齊嘅自信
「唔係女朋友仲一齊番工？佢都係番呢頭㗎？」Ella好奇咁追問，「你單戀人地呀？定係你地係曖昧緊呀？」
「都唔係⋯」我無奈咁搖頭
一齊番工係因為我地一齊住，雖然佢的確係番呢頭；我同佢亦唔存在單戀定暗戀定明戀，因為我地嘅狀態已經處於重新開始嘅復合考慮期，曖昧⋯可能都算嘅⋯？
「佢番咩工㗎？」Ella嘅好奇心仲未消失，一直追問我，係抱住打爛沙盤問到篤嘅氣勢嚟追問
「你唔好咁多嘢想八卦得唔得⋯一朝早你唔攰㗎咩？」我用講笑嘅輕鬆語氣問佢，我感覺到只要我一郁個頭，啲骨就會咔咔聲
「唔攰呀！好精神！」Ella面帶笑容咁擰頭
我都唔知點解佢可以咁精神，因為佢比較後生？定佢天生係咁活躍？但望住佢，我就會諗起以前喺我面前嘅知珩，當所有人都講緊佢好似氣質又仙氣嘅時候，對我嚟講只係可愛又活潑
「望咩？」我嘅餘光留意到Ella一直望住我，我望一望佢問道
「冇呀～你有冇拍過拖呀？」Ella搖搖頭之後，突然又轉咗個話題
「咁大個人，都應該會拍過下拖？」我對於佢呢個題問有啲無語，但至少對我嚟講係正常事，「問嚟做咩？」
「就係好奇一下～」Ella抬頭直勾勾咁望住我，用一個仰慕嘅眼神，「優秀嘅人，通常都好難拍拖。」
「所以我唔係優秀嘅人。」我聳肩
我冇太在意自己優唔優秀，因為優秀呢樣嘢太難定義，點先為之優秀？係要各方面都做得出色，定係專注喺一方面做得出色？
IG Link: https://www.instagram.com/nd_cotttoncandy/?hl=zh-tw