【愛情】關於我一覺瞓醒發現喺初戀屋企⋯！: 70. 阻攔

所以，我向來都唔會以優唔優秀去評價自己嘅行為同工作，畢竟優秀都只係一個聽起嚟好聽嘅字眼，最後會變成因為你優秀，所以你嘅責任多啲

「我唔係呢個意思呀！」Ella即刻有啲慌張咁擰頭擺手，好似怕我會介意會嬲一樣，「你都好優秀！」

「唔洗擦鞋啦⋯」我望佢一眼，「有嘢未做完定點呀？」

「你錯啦～我做晒啲嘢啦～番去比你睇下有咩要改呀～」Ella一個沾沾自喜嘅表情對我講道

「嘩，你真係Ella呀？」我意外咁望住佢，佢最近嘅工作表現都真係令人有啲愕然，「Mavis到底同你講咗啲咩，可以令你咁大改變咁勤力？」





「呃⋯唔⋯」Ella耷低頭支支吾吾唔知點開口講，抬頭望我嘅表情都好似係觀察緊我嘅反應一樣，「就係好普通咁點醒咗我⋯」

「哦，係咩。」我微微點頭，都只係有啲好奇Mavis同佢講咗啲咩

「我會努力㗎！你唔好同阿姐講要調走我呀！」Ella抬起頭，誠懇咁望住我懇求一樣，「跟住你學到好多嘢㗎⋯！」

「你肯努力嘅話，我又唔會同阿姐投訴嘅。」我拎出員工證拍卡，回頭望一眼跟喺我身後嘅Ella

「我會努力㗎！」Ella認真咁點頭





⋯

晏晝食lunch

「喂！陪我去買杯咖啡先！我真係頂唔順，朝早個腦完全轉唔郁卡住晒！」Mavis皺起眉頭投降一樣擺手

「哦，去囉。」我微微頷首

雖然佢口係咁講，但我其實唔太信佢嘅講法，今朝佢仲好精神又悠然自得咁企喺接待處撩我地接待員同事





估下佢想去cafe做咩？上次比人阻止咗一次，佢都真係唔尷尬，今日又想去再試一次？

唉，算啦算啦⋯佢呢種面皮成呎厚嘅人係可以做到屢敗屢戰，我都佩服佢嘅，佩服佢用呢招幫公司搵到好多大客

「我喺門口等—」「一齊行啦。」

我都未講完，Mavis已經拍一拍我膊頭，將我都推埋入去cafe

講真，我唔太想同佢一齊出現喺呢度⋯有啲擔心會影響埋我嘅評價⋯

「嗰個咖啡師，好靚女呀可？」Mavis喺排緊隊嘅時候低聲對我講，佢對眼完全冇離開過知珩，「不過佢份人幾cool㗎⋯」

「係咩。」我半敷衍咁回答，因為我真係冇咩太感興趣

知珩唔係cool，只係佢喺外面自然會將高冷嘅一面掛喺最外層比人睇，真實嘅佢先唔係咁樣





「唔知佢有冇男朋友呢？咁靚嘅女仔通常都冇男朋友⋯」Mavis一直喺度講，「我有冇機會？」

冇，冇機會，你由頭到腳都唔係知珩中意嘅類型，再加上單憑你呢個開口就係要溝人嘅氣勢，更加唔可能

「你要唔要幫我？幫我拎佢ig。」Mavis輕撞我一下

「唔要。」我義正嚴辭咁拒絕咗佢呢個提議

先唔講我已經有佢ig所以唔會幫你，我亦唔想幫你追知珩，好可惜呀Mavis～

「唉，真係狠心⋯」Mavis低聲講一句

企喺我地前面落單嘅人行開咗，我地行上前，本來做收銀嗰個女仔唔知因為咩事行開咗，知珩行咗過嚟暫代佢嘅職務





「係，要啲咩？」知珩抬頭望嘅時見到Mavis，表情冇咩大反應，直到佢望到企喺Mavis隔離嘅我

知珩嘅雙眼明顯咁愣咗一下，好似問我「點解你會同佢一齊？你地係識嘅？」一樣，但佢好快就收起眼神，掛上職業微笑

等Mavis落完單，我同佢行到一邊等，Mavis一手捉住我：「我今日真係好好彩！」

佢呢個容光煥發嘅表情，我仲以為佢係唔係中咗六合彩

佢好興奮咁同我講，但我嘅視線一直停喺知珩嘅身上，目光完全移唔開

「嗯。」我只係敷衍咁應咗一聲

「你⋯你捉住我做咩？」Mavis終於見到我拉住佢衫尾嘅手，疑惑咁問一句

「免得你陣間又沖過去撩人地講嘢。」我平靜咁講咗一句，呢個都係事實嚟





「我唔會囉，嗰個經理出嚟啦。」Mavis向廚房方向微微抬一抬下巴

我望過去就見到嗰個叫阿逸嘅男仔行出嚟行到水吧，耷低頭同知珩講咗兩句之後就行咗去咖啡機前面

「睇嚟你飲唔到靚女沖比你飲嘅咖啡啦～」我面帶微笑低聲對Mavis講道，心入面有啲衰咁幸災樂禍

「嘖⋯」Mavis本來嘅好心情直接被催毁

「045。」阿逸嗌一聲，Mavis拎住收據上前拎咖啡

「行啦。」Mavis同我講嘢嘅聲線都變得有啲無力

知珩好似知道我地要走，特登抬頭朝我呢邊望一眼，同我對上眼之後對我微笑，係同職業微笑唔一樣嘅微笑





我同佢對望一眼，然後行出cafe，好彩Mavis睇唔到，陣間比佢知道又唔知點煩我

行喺番公司嘅路上咁啱見到Ella，唔知點解會變成我夾喺佢兩個中間行？忽然覺得心很累

佢兩個一直吱吱渣渣咁講嘢，喺我隔離左右夾攻我咁，只有我個口開都冇開過

「喂，你洗唔洗識番個女朋友？」Mavis忽然好friend咁搭住我膊頭




IG Link: https://www.instagram.com/nd_cotttoncandy/?hl=zh-tw