【愛情】關於我一覺瞓醒發現喺初戀屋企⋯！: 86. 閃粉
⋯
⋯
⋯
「嘩！咁夜啦⋯做project做到瞓著咁濟⋯」我身邊嘅朋友撞咗我一下，伸手搭住我膊頭，夾住我同佢一齊去車站
「冇計啦⋯邊個叫我地組有free rider？」我無奈咁嘆氣
聽朝早就係呢份group project嘅deadline，我同另外兩個朋友一齊喺學校做埋份project先走，已經係第三晚喺11點先離開學校
「阿銘，聽日你記得交份嘢上去⋯遲交嘅話我揼你呀。」我反手拍一下企我隔離嘅阿銘，「你唔好浪費我地心血。」
「知啦知啦！我陣間就番去交啦好唔好？」阿銘迷迷糊糊咁點頭
我番到屋企附近先同朋友分開，然後我打算去老麥，買個宵夜番屋企食
「好彩聽朝早係10點堂⋯」我望一望手錶，我番到嚟呢邊都差唔多11點9，「快啲買個嘢食就番屋企啦⋯食咩餐好？」
街上面都冇咩人，好偶爾先會見到有一兩個人喺度行，我喺綠燈開始閃嘅時候小跑行過斑馬線
「唉⋯已經夠眼瞓⋯仲要我跑⋯」我一行到對面即刻剎掣停落嚟
有架的士停喺路邊，因為街上面車都冇幾架，所以佢一停車，我就下意識望過去
會唔會係邊個去完旅行番嚟？成12點先番嚟？不過唔好話人，我都差唔多12點先番到嚟屋企附近⋯
「唔該司機～」一個女仔落車，身上著住裇衫，下身著住包臀嘅黑色短裙，腳上著住「豆零踭」嘅高踭鞋
「嘩⋯非禮勿視、非禮勿視⋯！」我即刻收回目光，成個人綁緊咁加快腳步向前行
等陣先⋯我忽然感覺到有啲奇怪，啱啱嗰個人，我好似見過⋯？
我擰轉頭望一眼，望住嗰個女仔飲醉酒咁左左搖右擺，貼住欄杆由馬路邊兜番入嚟行人路，好危險⋯
好彩宜家係夜晚，朝早嘅話啲車行嚟行去，佢咁樣行喺馬路邊幾危險？
佢行番入嚟行人路之後，好似冷靜緊個人一樣企喺原地深呼吸，手伸去拍一下額頭，但拍咗一下之後又唔係幾企得穩
佢嘅手摸住額頭，我同佢都有一段距離，佢嘅手由額頭往上往後掃，將擋喺臉前面有啲亂嘅頭髮一次過撥到後面
露出正面嘅佢嘅目光唔知幾時落到我身上，佢定睛望住我兩秒，我企喺原地望住佢，然後佢輕皺起眉頭好似要睇清楚我個樣一樣
「咦⋯嗨～」佢醉意滿滿咁邁步，行過嚟嘅時候嘅步伐超唔穩，我覺得佢下一秒都要仆低
「靚姐姐？」我企喺原地望住佢一步一步走向我
「嗨～卓思齊⋯？」佢半信半疑咁叫出我嘅名
我認得佢，佢係知珩嘅朋友，上次嗰個靚女姐姐，嗰個點都唔肯話我知叫咩名嘅姐姐
「嗯係呀，姐姐你okay嘛？」我側住頭望佢
佢身上傳嚟濃烈嘅酒氣同香水味，而且仲⋯散發住成熟嘅味道；佢抬頭望我嘅時候，眼神有啲迷離，可能因為醉意嘅關係⋯
「Okay呀～小朋友～」佢望住我，然後露出帶住醉意嘅笑容
佢呢個充滿魅力嘅笑容，無疑係令我心跳加速啦⋯呢種魅力，係喺我身邊嘅女仔都搵唔到嘅魅力，可能因為佢比我大幾年⋯
佢企喺度嘅時候個人都可以比風吹到搖嚟搖去，佢再行一步都要跌落地一樣嘅感覺，明明咁成熟嘅佢，點解會有種好容易比風吹散嘅感覺？
我呢頭咁樣諗完，轉個頭佢向後踏咗一細步，踏後嘅左腳膝頭嘅微微一曲，成個人都墜咗一下
「小心⋯！」我即刻伸手捉住佢嘅手肘扶住佢
「呀⋯唔好意思⋯」佢嘅手捉住我嘅手臂，搵番平衡點支撐住自己成個人，「有啲頭痛，企唔穩⋯」
「唔緊要，你住附近？」我心入面有啲擔心佢一個，始終係女仔，飲醉咗仲要喺呢啲時間點
「嗯⋯嗰邊！」佢有啲迷惘咁擰去左邊望又擰去右邊望，最後指住左邊
「姐姐我送你番去啦。」我先問佢到佢嘅同意，然後先扶住佢番去佢屋企嘅方向
我陪住佢番到去佢屋企樓下，佢屋企樓下嘅大堂係落地玻璃嘅大堂，睇起嚟就係有啲錢嘅人住嘅地方
嘩，我都希望我將來出到嚟搵到份好工，買到樓比自己住，住到呢啲高級嘅地方嘅話最好
「麻煩你送我番嚟啦，小朋友～」佢對我微笑道，我即刻覺得有啲衝擊一樣，心臟縮咗一下
「唔緊要，你係知珩嘅朋友嘛⋯」其實我都唔知有咩關係，可能係因為太夜又做完project，個腦有啲唔清醒
「拜拜啦～」佢口講再見，但係卻一手拉住我嘅衫領將我往下拉
臉頰上傳嚟柔軟嘅觸感，我瞪大眼同時大腦瞬間清醒，因為我feel到我成個左邊面都熱辣辣，呢種熱度由左邊傳到右邊，心臟緊縮一下然後開始用力跳動
「拜拜～」佢鬆開我然後瀟灑咁行入去大堂
我呆咗咁企喺原地，思緒有啲亂，心跳有啲快，成個人都有啲熱⋯我伸手摸一下啱啱柔軟觸感所落嘅位置，然後我望一望我嘅指尖
「閃粉⋯」我望住指尖震驚到淨係講咗兩個字，然後諗起啱啱嘅佢嘅唇上有閃粉，「唇膏⋯」
所以，我比佢錫咗啦？嘩⋯！咩發展呢個⋯？我係唔係發緊夢？我即刻搣咗自己嘅手臂一下
「呀嘶！」刺痛感即刻從手臂傳嚟，「好痛⋯唔係發緊夢⋯」
我比知珩嘅靚朋友錫咗一啖，心跳完全減慢唔到⋯！
⋯
「嗒！」阿銘伸手喺我面前嗒一下手指，「卓思齊！」
「嗯？」我猛然回神望向阿銘，「做咩？」
「你發咩呆？你個飯要凍晒啦。」阿銘指住我碟飯
「哦，冇嘢，諗緊嘢啫。」我搖搖頭
我個腦入面全部都係琴晚發生嘅事，佢會唔會記得自己做咗啲咩？佢唔會係中意我掛？定係佢對個個都可以⋯
「唉！我唔知呀！」我煩躁咁嘆氣
「唔知咩呀⋯？」思淼不解咁皺起眉頭望住我，「份project唔係周一銘交咗啦咩？」
「唔係呀⋯」我搖頭
「咁係咩呀？你未做assignment？你唔係交咗啦咩？」阿銘又開始一齊估下我嘅煩惱係咩
IG Link: https://www.instagram.com/nd_cotttoncandy/?hl=zh-tw