【愛情】關於我一覺瞓醒發現喺初戀屋企⋯！: 87. 心動
「唔係呀唔係呀⋯！你地幫唔到我㗎啦！」我食多兩啖飯，個飯都未凍，都仲熱
我個腦有啲混亂，因為琴晚嘅事有啲⋯慌張⋯我係第一次，比女仔咁樣捉住，錫咗一啖⋯！
放喺我手邊嘅手機螢幕一亮，我望咗一眼，我部手機好厲害，佢即刻用咗我人面解鎖，通知嘅詳情都即刻打開
「邊個⋯？」我望到IG DM嘅第一反應，係呢個人係邊個
我仔細咁睇佢嘅message：「琴晚唔好意思，飲醉咗個腦有啲唔清醒」
琴晚⋯飲醉⋯？係知珩嘅朋友靚姐姐⋯！
我即刻緊張咁拎起手機，佢居然會主動搵我⋯！？
「唔緊要」我覆佢，加多個掩嘴嘅emoji
「今日冇番工嘅？」佢好似順口問多句咁樣，不過，佢今日有去cafe？
我忽然間心入面有啲失落，原來佢今日有去到cafe，大概係要為琴晚嘅事道歉⋯
「今日番學，所以冇報更番工」我帶住少少嘅失落感回覆佢，「你今日去咗cafe？」
「係呀，打算搵你賠罪」佢嘅回覆加多咗個笑喊嘅emoji，令成件事顯得自在啲
「賠罪就唔洗」我like咗佢嘅message，但就叫佢唔洗賠罪，因為有另一樣嘢想知：「你叫咩名呀？知珩一直唔肯講」
我望住輸入中嗰個灰色省略號一直跳動，然後又冇咗，然後又跳番出嚟，睇到我個心噗噗跳
「佢係唔係唔想講我知⋯？」我喺心入面問
「睇咩睇到你又唔食飯？」坐喺對面嘅思淼問我，「睇到咁專心。」
「鬼有！我咪一直食緊飯！分隻手出嚟睇手機啫！」我反咗個白眼，食飯睇個手機都比佢兩個窒兩句
正當我吞咗口入面啖飯打算食下一啖嘅時候，我嘅餘光就望到，對話框彈咗一個好短嘅message出嚟
「周浩宜」
我望到呢個message，笑意就忍唔住掛上臉，都無心思去理坐喺我對面、一個關懷智障眼神望我嘅兩人
「Okay～下次你嚟cafe請你飲嘢」我回覆咗一句
⋯
過咗幾日之後
「叮鈴鈴鈴～」我推開cafe嘅門行入去，今日係我嘅day off同時係我嘅番工日
最近都唔知咩事，cafe一直都冇好忙，番到嚟都係行行企企，無無聊聊咁打發時間
「佢番嚟啦。」知珩同坐喺佢面前嘅客人講咗句，隨後目光落喺我身上
「嗨～」坐喺佢面前嘅女仔擰轉頭望過嚟，然後對我一笑
「嗨⋯！」我不禁愣一下，佢點解喺度，「你喺度嘅？」
「今日過開嚟呢邊，順便探下班。」佢提手灘開手心，指尖向住知珩嘅方向，「順便嚟睇下有冇嘢飲～」
佢咁樣一講，我即刻就諗起我上次話佢嚟cafe嘅話我請佢飲嘢
「你去換衫先啦。」知珩嘅嘴角微微上揚，帶住少許嘅笑意
「哦，好好好⋯」我連忙點頭
喺我行去休息室嘅時候，聽到佢兩個嘅對話
「浩宜！唔準恰卓卓呀！」「我冇呀～」
我閂埋休息室嘅門，企喺鏡前著好圍裙，整一整衫領，順手咁抓一抓頭髮，拉好身上嘅衫，然後先再行出去
「你要請我飲咩呀？」佢就好似冇事發生一樣，坐喺水吧前嘅吧枱托住下巴問我
「你中意飲咩？」我行到落單機前面回頭望佢
「我想飲新嗰個青提梳打特飲。」佢指住餐牌上面嘅「新推介」
「Okay。」我比咗個okay手勢，呢張單就入咗我數
「請。」知珩灘開手心，示意我去沖
「Okay⋯」我無奈咁點點頭，然後不禁偷偷地望咗周浩宜一眼，佢同知珩唔知講緊啲咩笑得好開心
佢睇起嚟其實完全唔似25、6歲，嗰種成熟唔係外表嘅成熟，而係⋯成個人散發出嚟嘅感覺
忽然間佢望向我呢邊，我即刻二話不說以最快嘅速度收回視線⋯！嚇咗我一跳⋯搞到我個心都噗噗跳⋯！
「青提特飲⋯」我將一個圓形嘅杯墊放喺佢嘅面前，然後小心翼翼咁將有三層漸變色嘅青提特飲放喺佢面前
「唔該～」佢露出甜美嘅笑容，目光跟住我手上嘅特飲移動
見到佢嘅笑容嘅瞬間，我嘅心跳，漏拍啦⋯我唔會係，真係，心動啦掛？
「哦～好飲呀～」佢嘅目光同我對上，我心跳嘅漏拍顯得更明顯
「你中意就⋯得啦～」我故作輕鬆咁笑道，邊個知我都緊張到手心出汗
佢嘅指尖輕扶住飲管，飲管口上有豆沙色嘅唇膏印，望住飲管上嘅唇膏印，嗰晚落喺我臉上嘅唇膏印嘅畫面喺我嘅腦海中浮現出嚟
「呃⋯」我下意識就出咗聲，佢有啲疑惑咁抬頭望我，我掛上笑容，「呃⋯我可以點叫你⋯？」
「跟知珩叫就Okay啦，不過如果你中意叫我姐姐嘅話，我又唔會拒絕你嘅。」佢輕輕一笑，從容嘅笑容顯得佢好輕鬆自然，就好似⋯情場高手一樣⋯
「哦好呀～」我爽快就答應佢，「你都係喺呢頭番工？」
「係呀。」佢頷首，同知珩對望一眼
「知珩，你放飯啦。」阿逸喺廚房行出嚟，「卓卓睇樓面。」
「Okay～」「收到！」
我望住知珩企喺廚房門口唔知同阿逸講緊啲咩，可能係問阿逸洗唔洗買飯之類，有時阿逸唔出去食都會叫我地買飯比佢，唔洗急嗰種
「咁我去食飯啦～」知珩拍一拍我膊頭，然後望住浩宜，「你唔好恰佢呀⋯」
得番我一個喺水吧位，心入面突然間覺得有啲唔自然，隨手拎起放喺咖啡機隔離嘅布，唔自在咁抹咖啡機
「叮鈴鈴鈴～」我望住知珩行出cafe門口，下一個瞬間係自然咁望向佢嘅朋友
「佢會唔會都差唔多走⋯？」我喺心入面諗，「有啲可惜⋯」
IG Link: https://www.instagram.com/nd_cotttoncandy/?hl=zh-tw