【愛情】關於我一覺瞓醒發現喺初戀屋企⋯！: 88. 兒戲嗎？
「上次真係唔好意思。」佢忽然間開口，主動提起上次嘅事，「我冇心，只係真係飲醉咗。」
「哦⋯唔緊要，我知⋯」我有啲尷尬咁移開視線，佢係點做到咁冷靜？
「其實應該係我要請你食飯道歉就真⋯」佢露出充滿歉意嘅笑容，「成日都咁樣飲大咗⋯」
「你想請嘅話，我又唔介意呀～」我表面平靜，但心中暗喜，我都唔知我偷開心啲咩
「好呀，姐姐請得起。」佢聽到我咁講，隨即一笑
「咁姐姐你幾時得？」我見佢答應，即刻就追問佢，「就你時間。」
「下星期啦，下星期我冇咁忙，你得唔得？」佢拎出手機睇自己嘅schedule
「你電話幾號？」我問出呢句嘅時候都緊張死，同佢嘅從容完全唔一樣
「手機比我。」佢朝我灘開手心，我將手機遞比佢之後，佢將佢嘅號碼打喺我手機，然後打比自己，順便咁就拎埋我嘅電話，「嗱，Okay啦～」
佢將特飲飲完，然後拎起手機孭起袋，離開座位嘅時候對我回眸一笑：「下星期我都可以，你睇下你想邊日，諗到就同我講啦～拜拜～」
「拜、拜拜⋯」「叮鈴鈴鈴～」
我望住佢瀟灑離開嘅背影，忽然間有啲失落，但又有啲小得意，拎到佢電話啦～而且佢話下星期可以同我食飯，雖然係用嚟為佢嘅醉酒行為道歉
過咗大半個鐘左右，知珩食完飯番嚟，佢一行入嚟就自然而然咁望向浩宜啱啱坐過嘅位
「浩宜走咗啦？」知珩拎住圍裙喺休息室行出嚟水吧
「嗯，走咗啦。」我點一點頭
「進展如何？」知珩突然間企喺我隔離，低聲問我
「咩咩咩進展⋯？」我心虛咁轉身行去抹杯，扮聽唔明知珩講緊咩，雖然我都略略估到佢嘅意思
「你囉。」知珩用一個睇穿我嘅眼神望住我，望到我有啲怯，「見你咁shy咁～」
「唔⋯慢慢嚟慢慢嚟⋯」我比知珩咁樣一問，感覺耳仔都紅咗一半，「再講再講⋯」
我唔自在咁一直點頭，唔知仲以為我係跟住cafe嘅抒情音樂嘅節奏點頭，其實我只係有啲不知所措，怕比知珩睇穿我⋯
「加油啦小朋友。」知珩冇再講啲咩，只係拍一拍我嘅膊頭，但我覺得佢係睇穿咗我嘅心思
收工搭車番屋企嘅時候，我一直睇IG，睇緊人地嘅IG，嗰個人嘅IG⋯
淨係望住相，都有啲心跳加速，感覺好微妙⋯
「呼⋯」我重重咁呼一口氣，令大腦稍微清醒少少
我向來喺愛情中，一直相信人對另一個人產生愛慕係日久生情，一見鍾情只係見色起意嘅代名詞
但今次，我好似，真係對一個人，一見鍾情
⋯
⋯
⋯
「叫你唔好成日飲咁醉，玩出禍啦⋯」我拎住手機貼喺耳邊無奈咁講
「我冇心㗎，飲咗酒個腦唔清醒⋯」電話裏傳嚟浩宜嘅聲音，佢少有咁呢個時間喺屋企
「唉～我地思齊係個小純情，點招架得住你呀？」我覺得無奈又有趣咁嘆一口氣，「姐姐～」
浩宜似乎都無言以對，默默咁嘆一口氣
「不過佢係好男仔嚟，可能相處下，你會中意呢～」我接住講落去，「我撐你就係啦～」
「你係第一日識我？我向來都唔會姊弟戀⋯」浩宜緩緩開口，「而且拍拖好攰，唔想拍住⋯」
「都明嘅～但所有嘢又唔好講到咁死住，將來係點又未知嘅～」我拎出八達通拍卡出閘
「再講啦咁樣⋯」浩宜咁樣輕描淡寫嘅一句，我都可以諗到佢肯定係好頹嘅樣撥一撥手，然後托住頭，「你仲好顧我？顧掂你自己先啦⋯」
「我？我好好呀⋯」講到呢度，我就下意識一個深呼吸，「真係。」
「真係？我真係唔明你就真⋯」浩宜嘅語氣帶住少少嘅不悅，「佢係唔係真係好到咁？」
「誤會解開咗啦⋯總算係了咗一件放唔低嘅事。」我輕笑一聲，「佢真係好⋯」
「話你情人眼裏出西施就真⋯」浩宜不滿嘅表情我都可以幻想到，「仲唔同佢講復合？你唔好話我知要享受多一陣嘅曖昧呀⋯」
「可能係痴得你多，都會有呢啲想法～」我半開玩笑講道
我行出地鐵站，見到阿立迎面行過嚟，我同佢對上眼之後佢就小跑起嚟
「好啦，我唔講住啦，佢嚟接我。」我笑道
「知啦知啦⋯重色輕友⋯拜拜啦！」浩宜先一步收線
我拎住電話走向阿立，解開咗誤會之後，感覺我地嘅關係又近咗
「嗨～」我對阿立揮揮手，「你今日又會⋯過嚟嘅？」
「順路囉。」阿立聳肩，「行啦，想食咩？」
「你煮呀？」我有啲訝異咁問佢，「你食咗未？」
「買咗老麥。」阿立笑道
「咁我都要食老麥！」我指住對面嘅老麥講道
「好。」阿立無奈咁笑一笑，然後陪我去買今晚嘅晚餐，「諗好食咩餐未？」
「諗好啦，照舊啦～」我點點頭，阿立望向我比咗個okay手勢
最近我同阿立都冇再提起過重新開始呢件事，唔係冇咗呢個打算，而係好似係大家心入面有共識，算唔算係一種默契關係？
不過我覺得又唔太急，可能係出於我知佢心意同時佢又喺我身邊而帶嚟嘅安定感，我冇覺得不安
「偷笑啲咩？」阿立擰轉頭望向我，佢嘅嘴角因為我嘅笑容所以悄然上揚，「諗到啲咩好笑嘢？」
「冇呀～」我笑道，然後自然咁將手穿過佢手臂同腰間嘅位置，默默咁挽住佢嘅手
佢望向我，我地對望一眼，感覺又好似番咗去一齊嘅時候，就算係過咗咁耐，感覺仍然喺度
佢拎住我嘅麥當勞外賣，我只係跟喺佢身後就足夠，同佢一齊，我喺佢身後做被保護嗰個就夠
「你同游巧盈一齊嘅時候係唔係都會咁貼心？」我加快腳步追上佢，行喺佢隔離
「呀？」佢比我突然嘅提問嚇窒，然後認真沉思，「冇，佢淨係話我個人冇心又唔細心。」
「真係㗎？」我聽到之後忍唔住笑咗出嚟，心情突然間好好
IG Link: https://www.instagram.com/nd_cotttoncandy/?hl=zh-tw