【愛情】關於我一覺瞓醒發現喺初戀屋企⋯！: 125. 夢醒
我下意識就擰轉頭望，我都未反應得切，已經有人迅速咁撲入我懷中，我比佢嘅舉動嚇親，背脊貼住佢屋企嘅大門
「你今日，點解過嚟接我？」浩宜呢個問題，係第二次問
「因為你同事話你飲醉咗，話要番屋企，所以叫我嚟接你。」我如實咁復述一次比佢聽
「唔係因為你在意我？」浩宜問
「在意係一定，但今日就算係其他人，係知珩又好，樂恩都好，我都會去。」我解釋，「安全嘅問題，冇可能掉你自己一個喺嗰度。」
「我同知珩對你嚟講一樣咩？」浩宜嘅眉頭輕皺一下，佢唔滿意我答嘅嘢
「唔一樣。」我亦如實回答
「卓思齊，你係唔係想做我男朋友？」浩宜追問我
我瞬間安靜咗落嚟，空氣就係咁樣凝固落嚟，屋入面只有冷氣機嘅聲音
「你今日飲醉啦。」我覺得今日唔係講呢個話題嘅適當時候，我講出上次佢對我講嘅說話，「下次等你清醒再講。」
我一隻手捉住浩宜嘅手臂，另一隻手伸手想去摸門鎖，但浩宜見到我嘅舉動之後第一時間係比我更快咁伸手㩒住門鎖，一扭就將門鎖上，我呆咗一下
「就要今日。」浩宜堅決要我今日就比個答覆佢
「我唔想你係因為飲醉咗所以咁樣問，我亦唔想喺呢個情況下答你⋯」我無奈咁輕嘆一口氣，「你睇下你連企都企唔穩⋯」
「嗯，好似係⋯」佢定睛望住我嘅時候，我唔知道佢諗緊咩
下一秒佢主動咁湊近，將唇主動湊近，落喺我嘅唇上；佢嘅雙手自然嘅攬住我嘅頸行後幾步，將我同門嘅距離拉遠
我唔知道今日嘅佢發生過咩事，我以為佢係單純酒精上腦；我怕佢跌，雙手就自然咁扶喺佢嘅腰
佢今日係唔係因為飲咗酒嘅關係，所以變成咁？佢嘅吻，我唔敢回應太多，但佢今日嘅吻太強勢、太具侵略性⋯
我捉住佢嘅雙臂將佢推開，佢踉蹌咁後退咗兩步，企穩之後又行番嚟攬住我，我今日身上係有磁石？
「你仲係中意我係唔係？」浩宜又一次提起呢個問題
「係。」我見佢咁執著，我怕我唔答佢，佢唔放我走，「點解你會覺得我轉個頭就會唔中意你？」
「咁你要開心啦⋯」浩宜用指尖輕劃過我下巴，然後愈湊愈近，近到我可以感受到佢嘅呼吸，「我已經，考慮清楚啦⋯我好似⋯中意你啦⋯」
啱啱⋯佢係咪話佢中意我⋯？我有冇聽錯⋯？
「你—」我正開口想問清楚嘅時候，說話比佢用唇直接推番番去
比起啱啱嘅吻，嚟得更強烈、更深入⋯我諗應該冇聽錯⋯
⋯
⋯
⋯
一大清早我就醒咗，頭又痛，腰又痛，琴晚全晚都瞓梳化，仲要坐喺度瞓⋯
「腰好痛呀⋯」我坐起身，先伸個懶腰，然後望一眼仲瞓緊嘅人
雖然話我覺得瞓梳化唔舒服，不過佢應該瞓得仲唔舒服，我琴晚壓住佢半個人瞓
我先一步起身，輕手輕腳咁去梳洗一下，順便沖個涼換番衫，出嚟嘅時候趁佢未醒，偷偷地喺佢臉頰上錫咗一啖，心入面都係期待同佢一齊
唔知點解今次比之前知道有男朋友嘅時候嘅感覺更開心，我琴晚應該唔叫借醉行兇⋯？
我都算係鼓起勇氣啦，喺酒吧嘅時候同幾個成日一齊去酒吧嘅女仔一齊，佢地知我要勇氣，即刻獻計
「唔洗飲到醉晒，半醉可以啦！」
「真係玩咁大呀⋯？」
「你要勇氣嘛？醉咗咩勇氣都有啦！飲啦飲啦！」
就係咁樣，用荒謬到極嘅方式得到勇氣值，我都唔太記得佢地倒咗幾多杯比我
「喂你唔好醉晒！手機手機！我call佢！」
佢地講到呢度嘅時候，我已經迷迷糊糊咁靠住我另一個同事，佢地到底倒咗幾多比我？
我記得卓思齊嚟到之後，佢地已經急不及待咁將我塞咗比卓思齊，我擰轉頭望佢地嘅時候，佢地都叫我加油
仲加油，酒都湧到上心口啦⋯一行出酒吧已經忍唔住嘔⋯到底倒咗幾多杯我飲啦！？
「唔⋯」佢好似都瞓醒，眉頭皺咗一皺，睜開眼回個神
我坐喺隔離安靜咁望住佢，等佢見到我；佢同我對上視線嘅瞬間，即刻坐直起嚟，然後耷低頭撥一撥頭髮：「早晨⋯」
聽佢嘅語氣，除咗係啱啱起身所以有嘅迷糊，仲好似做錯事比人發現嘅小朋友一樣
「早晨～」我抿住唇唔笑佢，只係側住頭留意佢嘅反應
「琴晚，我真係只係接你番嚟⋯！」佢連忙緊張咁解釋，「我咩都冇做過㗎，只係因為最後你唔肯放我走，我先⋯仲喺度⋯」
「嗯，明白啦。」我扮認真咁點頭，只係想稍微咁整蠱下佢，「食唔食早餐呀？煮埋你嗰份。」
「唔、唔洗啦⋯！我番去啦，唔打攪你咁耐⋯！」佢即刻企起身，周圍搵佢個背囊喺邊，一見到放喺梳化旁嘅背囊就急不及待咁拎起孭上背，「我都要番去換、換衫沖涼⋯」
「喺我度唔可以換衫沖涼咩？」我翹住腳、托住下巴故意調戲佢一下
我望住佢羞澀嘅反應，臉頰嘅紅霞將耳仔都染紅，但係唔爭氣咁吞一啖口水，喉核上下滾動咗一下
佢咁可愛，我就會忍唔住想調戲一下、整蠱一下，我算唔算係壞姐姐？
「琴晚我講嘅嘢，唔係飲醉酒亂講。」我見到佢嘅慌張，唔忍心再玩佢，伸手去拉佢嘅手腕，「係真係考慮清楚之後比嘅答覆。」
佢瞪大眼望住我，似乎仲係有啲意外，佢係唔係懷疑緊自己係唔係聽錯？
我企起身，從佢嘅正面伸手攬住佢，雙手喺佢嘅後腰交搭，喺離佢咁近嘅時候，又可以聞到佢身上好清新單純嘅味道
「所以，你陪唔陪我食埋早餐先番去？」我又問多一次，湊近佢嘅耳邊低聲道：「最多開隻新牙刷比你？」
我見佢仍然未回神，似乎仲諗緊呢度係夢境定現實，我鬆開佢之後轉身去廁所，從櫃中拎咗隻新牙刷，然後遞到佢面前
「開個包裝呢啲咁簡單嘅事，唔洗姐姐教掛？」我拎起佢隻手，將全新未開嘅牙刷塞到佢嘅手中
「唔洗⋯」佢搖搖頭，半信半疑嘅開口：「咁⋯我去啦⋯」
「好呀。」我點點頭，伸手輕輕咁推咗佢一下，「你快啲去啦，如果唔係陣間煮好早餐就唔預你啦～」
佢轉身向廁所，行咗兩步又猶疑咁拎轉頭望一望我，佢係咪仲係以為自己發緊夢？
IG Link: https://www.instagram.com/nd_cotttoncandy/?hl=zh-tw