［搞笑］［打機］收錢幫人戒除網癮，幫到困咗喺遊戲世界: 二十六、離

「破。」佢想趁機貼符紙落八寶粥身上，如果呢吓中咗嘅話，佢應該會好似莿姐個盾咁，消失得無影無蹤。

我推斷，佢呢種魔法只可以令符紙掂到嘅嘢消失。不過，咁樣就已經強到犯晒規，更何況，佢仲有其實唔需要符紙嘅遠程攻擊。

關鍵時刻，遠攻巫女揸符紙隻手俾莿姐拉住咗，不過，因為咁，符紙最後落咗喺莿姐身上，佢成套裝甲消失咗。

而家嘅佢，基本上冇乜防禦力可言，巫女見到八寶粥冇人保護，已經廢事再浪廢時間用需要符紙嘅魔法，想用火球燒死佢。

八寶粥好似受驚過度，完全冇辦法避開呢吓算係簡單易避嘅攻擊。佢就嚟俾火球打中嗰陣，又係莿姐出嚟幫佢擋咗呢一吓。





同近攻巫女嘅攻擊一樣，佢技能生出嚟嘅火係唔會燃盡，我哋就咁眼白白睇住莿姐被活活燒死。Angel過咗去蛇仔明身邊，我哋呢邊嘅補師對呢個情況束手無策。莿姐到死嗰刻都選擇背對八寶粥，烏鴉睇唔過眼，一手揪起佢，叫身後其他嚇呆咗嘅補師一齊撒退，支援另一邊嘅隊友。

美其名曰支援，但其實，我哋好清楚佢哋已經捱唔到落去，都係搵個地方休息好過。

隊伍人數已經銳減到得返150人左右，入面仲有部分可能已經做咗逃兵。

遠攻巫女呢邊嘅戰線，得返我同烏鴉。

全靠莿姐嘅經驗，我確信我哋兩個可以戰勝巫女。