［搞笑］［打機］收錢幫人戒除網癮，幫到困咗喺遊戲世界: 二十七、近水能救近火

啱啱一直唔出手嘅我，為呢一刻默默做緊準備。

諗返都覺得，真係好對唔住八寶粥同埋莿姐。

一個活活燒死。
一個睇住愛人活活燒死。

我本身可以早啲出手，但我怕自己嘅估計係錯嘅，所以一直等等等，等到呢個自認為最佳嘅時機。我諗，如果我唔係咁謹慎嘅話，莿姐應該唔使死。不過，我寧願莿姐死，都唔想烏鴉因為我嘅魯莽而白白送命。

時間回溯到，我哋為朗仔呢單大生意做緊準備嘅時候。





當時我哋用咗大量水系史萊姆皮嚟整裝備，但我之後都係唔放心，拎多咗一大塊以備不時之需，諗住裝備有咩突發損耗嘅話，可以用呢一塊嚟補一補。

估唔到，會喺呢度派上用場。

史萊姆算係其中一種最低級嘅怪物，但呢一刻佢嘅力量足以撼動眼前呢個用火魔法嘅高手。

我哋係時候俾遠攻巫女睇，乜嘢係戰士同法師嘅完美結合。雖然我唔完全係一個法師，但我諗自己識嘅魔法已經足夠對付佢。

烏鴉好似莿姐咁衝上前，巫女暗自竊喜，以為又係一隻冇腦嘅蠻牛。烏鴉嘅動作比莿姐要敏捷好多，但喺遠攻巫女眼中都只係一隻行動快啲嘅蠻牛。





佢又再次閃身，拎起符紙打算故技重施，用佢嗰招消除魔法。

「消！」

咩都冇發生，佢仲俾烏鴉狠狠咁踢膝撞咗一吓，好在勉強防禦得切。

佢睜大對眼，難以置信咁望住烏鴉，佢無法想像自己嘅魔法竟然冇辦法收拾一個同九流法師合作嘅野蠻人

唔係佢嘅魔法失效，而係佢睇唔出佢嘅魔法生效。





我將嗰一大塊水系史萊姆皮撕開一塊塊，再用移動魔法將佢哋精準貼去符紙嘅落點，正因為咁，被消除嘅只會係史萊姆皮。

呢招雖然好用，但我哋都冇太多史萊姆皮支撐我哋一路咁玩落去。

我同烏鴉打打眼色，知道係時候要結束呢場戰鬥。

遠攻巫女俾烏鴉纏到心都煩埋，已經無暇顧及我嘅動作。我拎出一個穿大窿嘅圓形物體，趁佢雙手俾烏鴉控制住，將圓形物體笠落佢個頭。

呢個圓形物體類似水球，我將史萊姆皮開窿，再用魔法填水入去，呢啲水並唔會流出嚟。

笠落佢個頭之後，我再用淨低嘅細塊史萊姆皮封死任何空位。

就咁過咗一陣，紅玉龍血量顯示得返20%。





遠攻巫女已死。