(亂寫的) 短篇小故事: 短篇 106 《地球發燒了》 1-3 / 6

短篇 106 《地球發燒了》 1-3 / 6

////// 30 May 2026

《地球發燒了》

01

地球發緊燒，喺軌道上緩慢轉動。





火星：「你點呀？唔舒服就抖下啦。」

地球病到懵懵下，好攰，但都撐住：「唔得呀，幾十億粒塵喺我身上，點都唔冧得。」

因為軌道上面唔停得，火星無奈咁轉走咗：「咁⋯⋯你自己take care 喇。」

但係火星回頭一望，見到得地球一個喺度死撐，轉得時快時慢，月球又唔理佢，實在好擔心佢。

究竟，火星會唔理地球？定係會行過去抱吓佢？





——

02

火星停低咗，望住地球發燒發到赤道發紅，啲火山都就嚟爆：「佢就嚟紅過我塊面。」

於是火星默默咁call咗水星：「喂，借啲水嚟吖，救地球呀。」

「我個名叫水星啫，邊有水呀？玩嘢。」水星啱啱經過佢哋，佢仲提一提火星：「你都快啲行啦，啲引力畀你搞到亂晒。」





地球軟弱無力，仲係好努力咁轉緊：「呀⋯⋯好熱呀⋯⋯」

火星真係好心痛，走埋去抱住咗地球，想用表面溫度幫地球降溫。

但係地球嘅熱氣令到火星瞬間熱血沸騰，同時地球表面慢慢變白，仲有好多水蒸氣冒出嚟。

咁樣，得唔得㗎？

——

03

火星攬住咗地球，原本想幫地球降溫，點知令到兩個星球熱上加熱。

地球嘅火山開始爆發，海水都開始蒸發。





火星表面原本紅色嘅三氧化二鐵發生高溫熱還原，變咗做黑色嘅四氧化三鐵。

面紅紅嘅火星，即刻變咗深黑色嘅星球，同時產生極強嘅磁場：「對唔住呀地球，我以為我可以幫你降溫⋯⋯話晒我係負60幾度⋯⋯點解會咁㗎？」

金星離遠經過，見到黑色嘅火星：「喂呀，搞咩咁型呀你？呀——」但係金星被火星嘅磁場吸引，吸咗埋去。

地球被兩個星球包圍住：「我唔得喇⋯⋯好熱呀⋯⋯我想⋯⋯爆喇⋯⋯」

——