(亂寫的) 短篇小故事: 短篇 106 《地球發燒了》 4-6 / 6

短篇 106 《地球發燒了》 4-6 / 6

////// 30 May 2026

04

無辜嘅金星，淡黃嘅表面被逐漸侵蝕，變得灰灰暗暗：「喂呀，你哋啲火山灰呀！」

黑色嘅火星，不停吸引太空垃圾、星體碎片、細小嘅衛星。火星變得愈來愈重，精神慢慢變得散漫：「呀⋯⋯我喺邊呀⋯⋯」





白色嘅地球嘅溫度不斷升高，蒸氣、煙霧、火山灰，全部都噴晒出嚟。佢體內嘅熔岩滾吓滾吓，蓄勢待發。

呢個moment，地球板塊之間有不穩定嘅碰撞，準備要爆喇——呀——

喺旁邊嘅星體，都不禁來回踱步，望住漲大咗嘅地球同火星，仲有攬埋一舊嘅三個星體，唔知點算好，如果三個星體一齊爆炸，成個太陽系一定會粉碎，全部星體都會冇命。

喺佢哋議論紛紛，傾咗好耐都諗唔到咩對策，佢哋聽到：

「讓開——！」





——

05

「讓開——！」

冥王星壓線趕到，停喺安全距離之外。將身體上結冰嘅氮氣，不斷發射到三個星球身上。

嘶嘶嘶——！！！





固態嘅氮氣吸收熱氣化成氮氣，五顏六色咁飄散喺太空之中。

「哇⋯⋯」此情此境，仲靚過放煙花，實在歎為觀止。

最後地球、火星同金星嘅溫度徐徐下降，回復原來嘅溫度。火星嘅磁力場冇咗，地球都好返冇再發燒喇，金星⋯⋯依然全身都係灰。

火星勢估唔到，當初被太陽逐出九大行星嘅冥王星會返嚟救佢哋：「多謝你，冥王星⋯⋯」

「我唔係冥王星，我係小行星 134340，普通嘅太空碎石。再見。」冥王星講完之後，默默咁返去自己嘅軌道。

眾星體望住冥王星嘅離開嘅背影，同當初佢離開太陽系嘅背影，多咗份滄桑。

——

06





大家都好感謝冥王星不計前嫌咁出手相助，望住遙遠、暗淡嘅冥王星，心裡面萬分感激。不過佢哋知道，冥王星不嬲都好低調，所以暗暗咁透過光波，將感謝傳送畀佢。

星體們各自返去自己嘅軌道，引力回復正常。

地球雖然退咗燒，但係身體仍然好虛弱，裡面有好多垃圾要清除，需要慢慢調理。

呀啾——

突然，地球打咗個冷震，打咗個乞嗤。

原來，因為表面氣溫急降，地球感冒了。


完。





——

後記：喺今日寫完咗，但係故事未完，地球幾時先好返？或者，可能唔會好返。

——