(亂寫的) 短篇小故事: 短篇 107 《撞到一隻嘢》1-3 / 10

短篇 107 《撞到一隻嘢》1-3 / 10

////// 7 Jun 2026

《撞到一隻嘢》

01

一個落雨嘅晚上，喺一條濕滑嘅公路，有一個開車開到恰眼瞓嘅的士司機。





突然——嘭！

強烈嘅衝擊，佢成個人都衝向前。

安全氣袋「砰」一聲彈出，狠狠咁塞住佢塊面，擋住咗視線。

佢雞手鴨腳咁推開個袋，一邊講住四字真言一邊走出車，諗住要鬧爆前面嗰個司機。

但係，當佢踏出車門嗰一刻，雨突然停咗，地下係乾嘅，氣溫驟降，凍到打咗個冷震。





佢雙手搓臂取暖，緩緩抬頭，望向車頭被撞到嘅嘢，嚇到呆住咗——

一隻足足有兩層樓高嘅黑色龐然巨物，嘴巴濕潤，沿住幾十隻參差不齊、又長又尖嘅牙齒滴落嚟嘅濃稠口水，發出令人作嘔嘅酸臭味。

呢隻嘢，目光轉向的士司機，用一對血紅嘅眼睛，狠狠咁望實佢。

——

02





「呢、呢隻係咩嚟？！」的士司機嚇到腳震住咁退後兩步，然後左腳棘右腳，跌埋落地。

怪物緩慢咁向佢進逼，每踏一步，都好似地震一次咁，地動山搖。

吼——

怪物突然張開血盆大口，向住司機重重嗄咗一啖氣。

嗰陣酸臭口氣，混雜咗腐肉同硫磺味，連同深綠色嘅霧氣向的士司機步步進逼。

的士司機嚇到腳仔軟，隻腳真係郁唔到，唯有轉身爬走。但係爬唔夠兩步，嗰堆霧氣已經將的士司機成個人籠罩住。

「呀⋯⋯我⋯⋯我唔得喇⋯⋯好⋯⋯臭⋯⋯」的士司機頂唔住陣臭味，白眼都反埋，「噗」一聲臭到暈咗。

——





03

怪物一步一步，向住暈低咗嘅的士司機行過去。

當佢行過車門嗰陣，嘭！嘭嘭！嘭嘭嘭！

的士車門突然發癲咁又開又閂，不斷撞擊怪物隻腳。

怪物嚇親，向後退咗一步，嗚低身望入車廂。

呢個時候，後座嘅男乘客終於開到車門，慢條斯理咁行出嚟，仲一邊伸懶腰一邊講：「點呀！搞掂未呀？趕時間㗎⋯⋯」

乘客同怪物嘅距離只有一隻手掌咁近，佢抬頭望到呢隻兩層樓高、滴緊口水嘅怪物，沉默咗兩秒，冷靜咁吞咗啖口水：「你哋⋯⋯傾掂數先⋯⋯啦⋯⋯慢慢⋯⋯」





講完佢就慢慢走返入車廂，安安靜靜咁閂返車門，喺離怪物最遠嗰邊坐低。

吼————！！

怪物隻腳仲有少少痛，向住乘客大叫一聲，發出震耳欲聾嘅吼叫，用力一頭撞向的士。

——