【愛情】如地下情一樣嘅癮，係我對你嘅定義: 07. 夥伴

星期六晚清場後嘅炸雞店

黎昕淇企喺一邊將每一枱嘅餐具盒執番齊嘢，放番啲刀羹叉入去，執到一半嘅時候，忽然有嘢喺後面撞到佢嘅鞋

「撞到我啦。」黎昕淇拎轉面就見到拎住地拖嘅江清懿

「Sorry～」江清懿嘅道懿完全冇歉意可言，「唔小心～」

「點睇都唔似係唔小心囉～」黎昕淇笑道，擰轉身繼續執餐具，然後又拎轉頭望咗江清懿一眼，「你特登撞過嚟。」





「吓～我點會呀～」江清懿嘅手放喺地拖嘅棍頂靠住，「我似啲咁嘅人咩？」

「似呀。」黎昕淇冇一秒嘅猶疑直接回答，「你似呀。」

「你咁諗我都有㗎⋯」江清懿嘆一口氣

「你仲唔拖地？陣間遲收工呀。」黎昕淇望一眼江清懿拎住嘅地拖

「你等埋我？一唔一齊搭車番去？」江清懿企好準備繼續工作，順口問咗一句





「我冇咩所謂呀～」黎昕淇擰轉頭望一眼，江清懿仍然企喺原地，「不過你太晏嘅話我就唔等啦⋯」

江清懿點一點頭，拎起地拖又繼續去拖地，黎昕淇望多一秒就繼續分佢嘅餐具

江清懿好快就拖好地，什至比黎昕淇先一步去換衫收工，出嚟坐喺門邊嘅枱等埋黎昕淇

「咁快嘅你⋯？」黎昕淇行去換衫嘅時候，一臉訝異咁望住翹埋雙手等緊嘅江清懿

「梗係。」江清懿挑起眉滿臉自豪，望住黎昕淇將戴喺頭上嘅頭巾除落嚟





呢種三角頭巾睇起嚟好似麵包店職員咁，戴住一條倒三角形嘅頭巾喺頭上，喺馬尾下綁個結之餘仲要用髮夾固定

黎昕淇將番工嘅制服換咗落嚟，將頭髮散番落嚟，用手抓一抓頭髮將頭髮梳番整齊

「Okay啦～」黎昕淇開門行出嚟之後行到江清懿面前，「行得。」

江清懿企起身嘅時候，黎昕淇就轉身行；江清懿忽然加快步伐上前，但冇即刻行到黎昕淇嘅身旁，反而伸手反一下黎昕淇嘅斜孭袋嘅孭帶

黎昕淇感覺到有人戳咗佢嘅背一下，擰轉頭望見到江清懿企喺佢嘅斜後方

「帶反咗。」江清懿講道，黎昕淇伸手摸一摸背後嘅孭帶，手摸到嘅時候孭帶都已經順番

「Thank you～」黎昕淇自然地講咗一句

「好攰，今日明明都唔係咁忙，做咩會咁攰㗎⋯」江清懿嘆一口氣





「聽日咪星期日，放假啦。」黎昕淇笑道，拎出耳機，打開耳機盒嘅瞬間，諗到啲咩一樣又收番起耳機

「你聽日做咩唔番工呀～」江清懿問道

「星期日我一向都唔番工，休息。」黎昕淇將耳機收番入袋入面

「懶你就懶啦！」江清懿伸手輕力咁拍一下黎昕淇嘅後尾枕

「喂呀⋯！」黎昕淇嘅左手伸手摸自己嘅後尾枕，側一側身用右手拍咗江清懿嘅手臀一下

江清懿只係笑，但冇還手，黎昕淇瞪佢一眼之後就耷低頭睇手機：「仲有4分鐘先有車⋯」

「哦。」江清懿冇所謂咁點一下頭，企喺黎昕淇嘅身後偷睇佢睇緊咩，「你想去踩roller？」





「少少啦，不過我唔識踩。」黎昕淇擰轉頭抬頭望向江清懿道，「所以都只係睇下。」

「學下囉，人生咁長要學下啲自己唔識但又有興趣嘅嘢先有樂趣。」江清懿一本正經咁解釋，黎昕淇見到佢正經嘅一面反而有啲意外

「你會咁正經？令人好意外。」黎昕淇一臉懷疑，「你發燒呀？」

「我不嬲都咁正經⋯」江清懿無奈咁講道，「真係太唔了解我。」

「好可惜，你平時都唔正經⋯」黎昕淇帶住懷疑嘅眼神望住江清懿搖搖頭，江清懿反咗個白眼

江清懿喺學校同好多人都熟，算係社交人嚟，同好多同學都有唔錯嘅關係，雖然有時有啲唔正經，不過係一個友善嘅人嚟

「好難想像你同副會長係兄弟，副會長咁文質彬彬，你咁唔正經。」黎昕淇由上而下收江清懿打量一番

「又唔係親兄弟。」江清懿聳肩，「異父異母，自然都會唔一樣。」





江清懿同鍾安而係因為家庭重組而成嘅兄弟，所以係異父異母、完全冇血緣關係嘅兄弟，就算兩個人嘅性格好唔一樣都好都係正常嘅事

「你地冇不和咩？」黎昕淇問道

「只係好少交集，但稱唔上不和。」江清懿諗咗一諗佢同鍾安而嘅相處，佢同鍾安而平時喺屋企都唔會特登傾計，但喺同一屋簷下又好難真係零溝通

⋯

番學嘅日子一旦開始就特別漫長，朝早番學嘅時候要有精神的確有啲困難

黎昕淇踏上梯級嘅腳步都特別沉重，佢嘅大腦完全唔清醒，大概都到可以做到邊行邊瞓嘅程度；江清懿手上拎住三文治從樓梯嘅轉角位行上去，一轉彎、一抬頭就認到行喺佢前面嘅人係黎昕淇

「早呀黎昕！」江清懿加快腳步行上去，行到黎昕淇嘅身旁





「早晨呀⋯」黎昕淇嘅反應都慢咗半拍一樣，聲線聽起嚟都係無精打采，「食三文治呀⋯？」

「係呀，做咩咁攰？琴晚做賊嚟？」江清懿探頭望一望黎昕淇

「琴晚完全瞓唔著⋯」黎昕淇苦惱咁搖搖，「最衰就係你，好地地send鬼故比我聽，搞到我成晚都囉囉攣瞓唔著⋯」

「你可以唔聽，咁都入我數？」江清懿無奈咁反個白眼，步速都放慢到同黎昕淇嘅步速一樣，「你自己細膽咋喎！不過瞓一日都唔緊要啦，反正你都唔會跟唔上。」

「好緊要⋯唔係你上堂瞓著你梗係唔緊要⋯」黎昕淇伸手用拳頭輕捶咗江清懿嘅手臂一下

陸修然喺度樓梯嘅轉角位行上嚟，一行到上嚟就見到行喺佢前面嘅黎昕淇同江清懿

「最多你唔識問我嘅話，我教番你。」江清懿好自然咁就提出呢個方法

「呵呵，最好你教到我，唔好到時問番我轉頭。」黎昕淇唔信任咁瞄江清懿一眼

「喂，你咩意思？」江清懿聽出黎昕淇話裏嘅意思，手踭輕撞黎昕淇嘅手臂一下，「我好歹都升到班。」

「原來升到班係你嘅目標呀？」黎昕淇冷笑道

行喺兩人身後嘅陸修然輕皺一下眉頭，然後加快腳步越過兩人，行咗喺兩人前面；黎昕淇自然見到陸修然，不過除咗當睇唔到之外佢咩其他選擇

「係喎，你係唔係想去踩roller？」江清懿忽然提起，「嗰日收工之後你唔係喺度睇緊咩？」




IG Link: https://www.instagram.com/nd_cotttoncandy/?hl=zh-tw