【愛情】如地下情一樣嘅癮，係我對你嘅定義: 17. 選擇
「佢send咗message問我⋯」黎昕淇緩緩咁搖頭，然後打咗個喊露，「仲係好眼瞓⋯」
「瞓多陣。」陸修然將櫈轉過去面向床
「醒咗唔想瞓。」黎昕淇坐喺床睇手機，伸手喺陸修然嘅手心打咗一拳
「做咩咁攰？琴晚咁早瞓。」陸修然問道
「番工嘛⋯」黎昕淇輕嘆一口氣，「好攰，琴日好忙。」
黎昕淇忽然安靜咁定睛望住陸修然，陸修然有啲困惑，伸手輕輕咁拍咗黎昕淇嘅額頭一下
「喺學校要再保持遠啲嘅距離⋯」黎昕淇拎起放喺書枱上陸修然嘅學生會扣針，只係一個寫住「Students’ Union」嘅橙色金屬牌
陸修然伸手將學生會扣針從黎昕淇嘅手上拎走，黎昕淇望住比人搶走嘅扣針撅一撅嘴，雙手捧住陸修然嘅臉頰
陸修然將黎昕淇嘅手撥開，黎昕淇又即刻將雙手放番喺陸修然嘅臉頰上捧住，陸修然冇撥開，只係微微將頭抬起，下意識想避開
今次黎昕淇先主動，上身前傾湊近，水潤嘅唇悄然咁主動輕碰一下，陸修然望住黎昕淇嘅眼神中有一絲愕然，黎昕淇好少主動⋯
喺黎昕淇想縮手之際，陸修然捉住佢雙手嘅手腕，然後凝視住黎昕淇嘅明亮嘅雙眸輕嘆一口氣
黎昕淇感到不明所以，但好快佢就知道陸修然嘆氣嘅原因⋯癮起啦，比佢撩起啦⋯本來今日陸修然完全冇做過任何想錫嘅舉動，但係宜家⋯
陸修然將黎昕淇嘅手從佢臉頰上移開，只係輕力咁拉咗佢一下，黎昕淇又一次傾向佢
放喺枱上嘅手機忽然間又震起嚟，黎昕淇嘅注意力即刻落喺書枱嘅方向，陸修然伸手將手機拎到黎昕淇面前
「要唔要聽？」陸修然淡然咁問咗一句
黎昕淇抬眼望向陸修然，陸修然唔問佢嘅話佢會聽，但宜家陸修然問咗佢，佢都唔知佢要聽定唔聽好
「唔洗⋯」黎昕淇嘅嘴微微撅起，怯怯咁低聲回答道，「佢陣間會send message同我講㗎啦⋯」
黎昕淇自己都覺得心裏鬱悶，明明只係揀聽唔聽電話，但環境氣氛令佢有種要揀去唔去赴死一樣嘅感覺，唔係只係聽電話呢件小事咩⋯？
陸修然將黎昕淇嘅手機放喺枱上，陸修然拉一下黎昕淇嘅手，睇起嚟，癮嘅程度完全冇降低⋯
⋯
陸修然嘅面前放住已經食完嘅碗，今日佢同莫淮禮出咗去食飯，距離佢地平時番學校嘅時間仲有少少空檔
「化學嗰份功課我仲未做晒，佢係唔係今日上堂check？」莫淮禮邊睇手機邊問
「係，佢話今日上堂check，你陣間番去做埋？」陸修然拎住杯凍奶茶，飲管放喺嘴邊，正打算飲埋剩低嘅大半杯
「佢唔收嘅話就唔特登認真做，抄你嗰份。」莫淮禮笑一笑道，「都唔計分。」
「哦。」陸修然只係淡淡咁回應咗一下
「你有冇follow黎昕淇IG？」莫淮禮忽然間問道
「有呀，做咩咁問？」本來專心睇手機嘅陸修然一頓，然後抬頭望向莫淮禮
「冇呀～睇真啲就覺得其實佢幾靚～」莫淮禮聳肩道，「但好似冇咩人追佢。」
「你有興趣？」陸修然輕笑一下問道
「又未到呢個地步，你同佢喺同一個學生會都冇興趣啦。」莫淮禮笑道，「我見你同佢同鍾安而都經常一齊出現。」
「嗯，工作需要。」陸修然緩緩點頭，睇起嚟一臉認真
「你睇起嚟好寡慾清心，同好睇嘅人一齊又冇興趣，人地仰慕你又冇反應。」莫淮禮望住陸修然嘅認真覺得無奈又好笑
由呢個位置望出去嘅時候，咁啱見到黎昕淇同宋楚妍向學校嘅方向行緊，陸修然見到兩人有講有笑咁行過
「又唔係真係寡慾清心嘅⋯」陸修然垂眸，諗到啲咩一樣露出好淡嘅笑容，「番去啦，你仲要做嗰份功課。」
陸修然番到學校之後一如既往去咗會室打發下時間，坐喺佢平時坐開嘅位置，靠住櫈背睇手機
「叩叩—」門口傳嚟敲門聲，門由外面推開，果然係黎昕淇
「會長，你個牌。」黎昕淇從裙袋中拎出一個橙色金屬牌遞比陸修然
「原來真係你拎咗。」陸修然接過金屬牌，將佢扣番喺校呔上面，「拎咗又唔同我講聲。」
「我都係今朝要扣番先發現自己有兩個。」黎昕淇拉開櫈坐低，「所以今朝先同你講。」
「哦，你做咩過嚟嘅？」陸修然順一順番校呔，扣番個牌睇起嚟順眼啲
「我平時都會過嚟呀。」黎昕淇一臉困惑咁望咗陸修然一眼，「啱啱副會長搵你。」
「搵我？做咩搵我？」陸修然問道
「唔知，佢淨係問我有冇見到你。」黎昕淇回答重點，「不過如果係緊要事，佢應該會過嚟會室。」
兩人喺學校嘅對話永遠都係好簡單直接，一語中的，唔會好似普通朋友咁有講有笑傾計，大概係因為習慣咗要保持距離
「咦你唔係去搵會長咩？」鄭洛苡番到座位嘅時候見到鍾安而仲喺度就好奇一問
「啱啱問咗黎昕，黎昕話冇見到佢，可能佢未番。」鍾安而搖搖頭，將啱啱喺locker拎番嚟嘅嘢一疊放入櫃桶
「啱啱我見會長行咗去會室⋯」鄭洛苡擰轉頭指住會室嘅方向，「佢應該喺會室。」
「係呀？咁我宜家過去搵佢先。」鍾安而擺好佢嘅嘢就離開座位，「唔該。」
鄭洛苡坐低喺佢嘅座位，佢嘅座位就喺鍾安而嘅隔離；鍾安而行出課室去到會室嘅門口敲門，一打開門果然同預想中一樣，陸修然同黎昕淇都喺度
「會長。」鍾安而行入會室，行到黎昕淇同陸修然中間，「Miss Chung係唔係問班際籃球比賽嘅嘢？」
「佢今朝有提過，但佢話如常就可以嘛。」陸修然放低手機，黎昕淇移咗一個位，將自己坐緊個位讓咗比鍾安而
黎昕淇坐喺一邊冇留心聽佢地講嘢，只係坐喺度睇手機，睇起嚟好似同佢冇咩太大關係一樣
「黎昕，上次Miss Chung係唔係話okay可以過，但要講清楚規則？」鍾安而擰轉頭問黎昕淇，「然後就講週會請嘉賓？」
「佢今朝話班際籃球可以照去，但規則寫清楚啲，唔好好似上年SU咁比班捉住一條嚟講，然後就叫我地諗宣傳，早會嗰陣宣傳嘛。」黎昕淇放低手機，抬起頭稍作思考回想一下，「然後Miss Chung問起週會請嘉賓分享嘛。」
「咁同樂時講可以諗宣傳啦。」陸修然微微點頭，「星期四早會宣傳，都要預番啲時間比同學報名。」
「好。」鍾安而點頭，「今日放學洗唔洗call佢地嚟開會？」
IG Link: https://www.instagram.com/nd_cotttoncandy/?hl=zh-tw