鏡像密語: 第十五章、Fly me to the moon

三個鐘後，洛妍突然向外望一望天色，發覺自己真係忘記左一個人，係瑤瑤丫仆街！呢個時候洛妍先記得要開返電話聯絡瑤瑤。

可惜洛妍一開電話見唔到某人既message
不禁又再失落。

（係咪呢？叫你咪搞咁多嫁啦，你睇你依家似咩樣？）

（我都冇在意⋯⋯完全冇！）

（咁你又點解釋自己既失落）





（因為⋯⋯誒？我點解要解釋？！）

洛妍提醒返自己做左緊要野先！於是打返比瑤瑤。

「你行左去邊呢美女？」

「係H&M排緊隊比錢丫，嘩多人到呢⋯⋯」

「嚇死我啦，一行你就行左3個鐘，就嚟幫你報名參加三項鐵人，唔係講笑！」





「夠你恐怖？一坐坐3個鐘，都唔知有咩好睇，你都傻傻地既⋯⋯喂一陣食咩？」瑤瑤忍唔住調侃下洛妍。

「你揀啦好冇？我今日唔想用腦！」

「好好好，我一陣先黎搵你⋯⋯我買埋野飲先，你坐埋一邊等我丫」

「嗯嗯」

洛妍行出機鋪，係街邊搵左一個位坐低等瑤瑤，呢個時候竟然傳來一陣熟悉既電話鈴聲⋯⋯





（又係呢個名⋯⋯終於係呢個名⋯⋯）

（聽唔聽好？）

（你都等左一日，唔係為呢一刻咩？）

（問心，你唔開心咩？）

（不如就順從自己既心一次啦）

「喂！你去左邊？」洛妍耳邊傳來左一把好熟悉既聲線，洛妍瞬間紅左眼框，因為呢把聲安慰到今日苦苦硬撐既洛妍，可惜佢只可以聽到把聲，擁抱唔到呢把聲。

「我⋯⋯我咪話左去散心囉⋯⋯」





「去邊到散散咁耐？」

「唔話你知⋯⋯喂！你唔知頭先我見住個男仔玩跳舞機，好勁、好charm！佢跳得幾好嫁，我一睇就睇左3個鐘！」洛妍嘗試轉移話題。

「你咪繼續睇其他男仔囉⋯⋯」

（好似有啲酸⋯⋯佢係唔係呷醋？）

（我再試探下先？）

「哈哈⋯⋯你仲想問人地拎聯絡方法嫁，你知啦人地帶晒口罩咁有神秘感，唔問唔得啦！」

「哼！zzzzz」亦言發出左一聲悶聲後開始扮訓覺。

（咪繼續扮聽唔到囉）





（做咩咁想人地呷醋？）

（我想睇⋯⋯睇下佢呷醋個樣姐）

（想睇人地呷醋就假既，想睇人在唔在乎你就係真既）

（你咁講法，我唔認唔得啦⋯⋯）

「哈哈⋯⋯喂！咪訓住先啦！做咩打比我？」洛妍尷笑左。

「冇丫，想睇下你做緊咩囉？」

「我等緊人丫！約左人但佢未到，我咪坐左係街邊等囉。」





洛妍同亦言如是者閒聊左半個鐘。

「喂！你知唔知丫？今日月亮好靚！」

「係咩？但我呢到抬高頭睇唔到月亮丫！不如你影你個邊個月亮黎睇下⋯⋯」

（如果可以既話⋯⋯我都想去睇下你睇到既月亮，但係係同你一齊睇你睇到既月亮）

（肩並肩咁睇⋯⋯）

（手牽手咁睇⋯⋯）

（仲有⋯⋯）

「你個邊冇太可惜啦！」





「嗯嗯，但今日都唔係滿月，都靚咩？」

「係丫！」

「哦，係呢，做咩無啦啦講月亮既？」

「冇丫⋯⋯我想轉下個話題咋⋯⋯」

「哦⋯⋯哈哈，咁你又轉得幾快幾成功喎！」洛妍大笑但依然不解，不過佢冇再問落去。

洛妍突然見到遠處拎住一袋二袋既身影向佢揮手：「啊，佢到啦，我收線先啦喔」

「嗯。」亦言等洛妍禁結束通話個制。


（如果可以一齊飛上去個月球到，靜係得我地、得我同你就好）


(續）