鏡像密語: 第十六章、我的END大人來襲

七點半

洛妍出左門返工，但佢搭車既時候舉起左部電話，隔三秒又放返低，呢套動作大約重複左4-5次。

（好唔好打比佢問佢起左身未？）

（散完心應該知要放低既⋯⋯）

（都係既）





最終洛妍係舉起電話第6次前成功阻止自己打比亦言。


八點半

洛妍坐係自己位，準備開電腦工作，呢一切看似簡單平常既流程，今日有啲唔同，可能因為冇打電話、冇一齊行返公司，洛妍總覺得今日個心好似一個完整既拼圖少左一塊咁，但又未至於好難過，總覺得奇奇怪怪咁，反正佢形容唔到個種感覺。不過佢唯一知既係，由搭車到行返公司，直到依家返埋位，佢個心都跳得好快。

「喂！」亦言主動走近洛妍個位打招呼。

「？」洛妍一拎轉頭就見到琴日佢好掛住既面容。





「做咩朝早唔覆我？以為你唔返工！」

洛妍用好佻皮既語氣係亦言耳邊講左句：「surprise?」企圖掩飾自己既唔自然同反常表情。

（知唔知，我有幾大力禁住自己唔去搵你？）

（係估唔到自己原來都幾大力下⋯⋯）

（但太大力有時又會後勁不繼地失手）





（而一失手就會禁唔住自己，禁唔住自己就容許左自己覆你好多個最後一次）

（可惜呢啲你都唔會知）

（因為你眼見既係我返工個時同其他同事仲有講有笑，眼見既係我唔知點解對你好似忽冷忽熱咁）

（你唔會感受到我個心每一日都係來回地獄又折返人間咁）

（我個心每一分一秒都係掙扎緊，我既理智同欲望每日點樣重複拉扯，我既理性同感性都係因為你而失去左準則同標準）

（原來我個心⋯⋯不知不覺已經做到去呢個地步⋯⋯）

（我發現我個心愈黎愈唔肯聽我話）





⋯⋯⋯⋯

「妍姐，一陣一齊食飯啦」煇爺係茶水間撞到啱啱入黎飲水既洛妍。

洛妍遲疑左幾秒：「⋯⋯好吧。」

（如果我唔去，大家會唔會察覺出我既異樣，繼而估到我既心事？）

（唉，頂硬上啦唯有⋯⋯）

如是者，佢地成班後生仔一齊食lunch，亦言揀坐左係洛妍既隔離，而坐洛妍既對面係迪仔。

平時迪仔同洛妍冇咩兩句，直至今餐煇爺主動提出話題：一次最深刻且難忘既追女仔經驗，兩人開始展開左一次正式又正常既同事對話。

「我中學試過聽到個女仔咳左兩聲咋，我飯都唔食就跑去7仔買京都念慈菴放係佢櫃桶到」迪仔好正經咁憶述往事。





「嘩，睇唔出你咁貼心喎迪仔！」

「仲有一次丫⋯⋯我試過拼左一盒全部都係佢中意食既朱古力比佢，仲親手整左個新包裝，個包裝好特別好靚嫁！」迪仔show左張相比洛妍睇。

「係喎⋯⋯不過以買禮物黎計，你地都唔夠我以前男朋友咁叻豬」

呢句令眾人都感到好奇。

洛妍繼續解話：「佢去旅行呢唔知我中意邊枝唇膏但又唔想問我，想比個驚喜我，結果佢睇最多人買既買比我」

「車，都冇啲心思既」迪仔悔氣咁話。

（可能因為我冇讚佢？所以佢悔氣左掛，哈哈）





成餐飯亦言都好少搭話，洛妍都唔敢主動問佢為女朋友做過啲咩，係因為佢唔想自己聽完會唔開心。

直到大家食完飯一齊行返公司等lift之際，三人又還原返食飯個位置咁，迪仔係洛妍對面，亦言係迪仔隔離。

迪仔係呢個時候似乎想逗趣下洛妍，慢慢行近洛妍又一直注視住佢，迪仔既眼神同視線都令洛妍唔舒服，特別係迪仔愈行愈近、愈貼愈埋，洛妍下意識退後，但絲毫冇令迪仔停止呢個行為。

「做咩喎迪仔⋯⋯望住我做咩⋯⋯」

「⋯⋯」迪仔依舊一聲不吭。

（佢做咩望住我，望到眼都唔眨⋯⋯）

（佢想點喎⋯⋯）

（唔係想錫我丫嘛？）





（我好驚丫媽咪⋯⋯）

洛妍再次下意識扯左一扯亦言衫袖衣角，耷低頭就暱埋左去亦言既背後，但因為空間不足，所以洛妍事實上只暱埋左係亦言既手臂後面。

（人地話一個女仔如果受驚既時候下意識躲係一個男仔既背後既話，咁代表左個女仔認為呢個男仔比到安全感自己，所以先會躲係佢背後）

五秒後，洛妍只係見到一隻手伸左出黎，快速咁遮住左迪仔對眼。洛妍都未黎得切反應就笑到見牙唔見眼。

原來係徐亦言伸左隻手遮住迪仔對眼，洛妍就係呢一刻感覺到個心臟漏左唔止一拍。

（佢係咪保護緊我？）

（點解我會咁開心既⋯⋯）

（被保護既感覺真係好）

（原來比佢保護既感覺係咁美好）

（因為我太耐冇比人保護過，我真係好依戀呢種感覺）

洛妍個一刻知道左原來心動是長什麼模樣，就係當亦言伸手想去保護自己既時候，洛妍只係見到佢同自己中意個個動漫男主角納茲既身影慢慢重疊，最後同化。

（嘩，佢⋯⋯真係好man）

（同納茲大人一樣咁man！）

（唔係⋯⋯係超越納茲大人先啱！）

（佢原來咁有男友力！）

（因為佢平時好沉忍，咩都係得個諗字，唔會做到咁出面）

（頭先紅住對耳咁伸左隻手出黎）

（好可愛⋯⋯）

或者令洛妍最心動既係——唔會理任何事都要堅持去保護一個人既決心，唔理任何事都有呢一份想保護一個人既衝動。呢樣往往都係令洛妍最動容既野。

（佢係咪出於呷醋先遮住迪仔對眼？）

（佢之前同我提過話見到我同煇爺佢地傾計傾得好開心而有啲唔開心，我問佢點解答我話唔知丫，可能因為自己本身覺得同我最熟，而唔想有人會同我熟過我同佢）

（咁叫唔叫呷醋？）

（唉，我都唔知丫）

終於捱到架lift到左，洛妍以為終於可以甩難之際，迪仔罷脫左亦言之後又再黎過，又重複成套動作。

但係今次洛妍入左lift之後已經冇路可退，洛妍都唔敢望亦言多一望，唔知點解佢直覺覺得亦言好似好不爽，至於點解怕見到亦言不爽既原因連洛妍至今都未解答到。

所以洛妍面對住迪仔嘅騷擾性凝視，唯一可以做啲既係不斷迴避佢既視線，但洛妍唔知既係亦言一直都係到望住迪仔同自己。

或者其實洛妍係知亦言一直望住迪仔同自己但佢唔敢望多一眼亦言，因為佢知亦言生氣了。

（唔知望多一眼亦言佢會唔會更加嬲？）

（佢有咩可以嬲你先？）

（我唔知丫，我靜係feel到有啲殺氣咁款啦）

（我好驚丫媽咪⋯⋯我想返屋企⋯⋯）

終於到左4樓，一出lift迪仔就冇再望洛妍，專心向前行，洛妍鬆左唔知幾多口氣。

（呢程lift真係好漫長，長過marvel end game 4）

（唔知佢頭先諗咩呢？）

（如果佢真係為我呷醋，咁又代表住啲咩呢？）


（續）