《ASSO回憶錄》: 第三節
(3)
其實開頭一直都認為好似Titifany咁既香港女仔，又靚又好身材，眼角一定好高，睇唔起人同自我，始終做得靚女，咩類型既男仔都會想識佢，正常都會有啲架子...
但識落其實又唔係想像中咁，經過左3個星期既聯誼，Tiffany可能係靚女行列中最無架子既一個，斯文大方，勤力好學，樂於助人，笑點又低，興趣係煲劇，做運動，護皮膚同玩手機，所有野都好正面，好健康，而且佢33c 24 34 既身材，168既身高，好自然地，佢好受人注目，特別係上Lecture 既時間，好多男仔慕名而來坐係佢周圍想認識佢，甚至有人試過送花比佢，送花喎，副學士喎，洗唔洗咁誇張，更無奈既係有男仔特登同我地埋堆，原來係為左識Tiffany....
夜場有厹，校園都一樣...
我好羨慕Tiffany，點解我唔係陳冠希，我都想比女圍...
講左咁耐，好似介紹過Vicky...
Vicky，雖然係一個普通女仔既面孔，用明星黎易容，佢就好似弱化版蔚雨芯，163高, 34b, 25, 35, baby fat，好鐘意梳ABC既37分卷起留海長髮look，亦唔介意派小小福利你睇，佢性格非常開朗，好吹得，男仔頭性格，完全唔怕醜，亦唔介意好男仔玩得好親近，同我果代既形容詞，三個字，[世界女]，不過呢一種性格開朗，各方面都好平均既女仔，先至係最多男仔追，因為靚女難高攀，呢種又而更容易得手，同埋難聽啲講，用下面諗野男人，見到一個女仔咁和藹可親，同你玩得咁放，又有福利睇，好自然會對Vicky存有多少好感同霞想，不過身經百戰既我一早睇通哂佢條路，引我唔到既...
陳老師: [咁多位同學，提提大家兩個星期後要交第一份功課，係佔學科10%架]
我地第一份中文功課就係要拍一個短劇但係要有修詞手法, 播完條片之後要用PowerPoint 列出黎， 最自然同最多手法先會高分，Vicky約左我地陣間放學留低係學校傾一傾先走
經過我當日好深入既討論，最後我地決定拍一套以英雄救美為主題既愛情動作片…
19歲係諗呢啲架啦，青春既野你唔會明...
而拍攝既地點就係位於新界區最西面，全屯門第2長既海灘，後來被附近居民投訴好臭既屯門蝴蝶灣...
無計…Vicky住天水園，Tiffany同呀豪住屯門，呀俊住大埔，佢地話係蝴蝶灣拍方便大家喎，見人見智啦，我住藍田…
拍攝當日係星期六，我預早左時間出門，因為得我一個住得遠，同埋遠程車，一係唔遲到，一係就遲好耐
今日都算熱，26度，我由屯門輕鐵站慢慢行入去，只要一步出輕鐵站，你就會身處美麗既蝴蝶灣海濱公園，海濱公園既左邊可欣賞到蝴蝶灣泳灘既迷人景色，飽覽一望無際充滿貨櫃船既海景，而右邊有一個較舊式既商場，經過商場之後更可以欣賞到兩旁的花草樹木，與海風雙映成趣，秋天行一定非常舒服，絕對係情侶拍拖既聖地。再者，蝴蝶灣有好多康樂設施，例如石春路，兒童遊戲場等，高興既甚至可以即場燒野食，絕對係吃喝玩樂既好地方
行左十分鐘，我終於行到公園中間既小食亭，雖然我都遲左十五分鐘，但係...都冇理由係我第一個到達呀…
睇黎大家既時間觀念方面...，我等多左十五分鐘，但係本身我已經遲十五分鐘，而天氣又熱又曬又得我係度呆等呢一籃子因素既影響下，我滿腦子都係恕恨同責罵，我直頭想用文字式洗腦大法去改變佢地對時間觀念既睇法，而當我正想開始自言自語既時候，係遠處終於見到兩個熟識既人影，Tiffany 同 Vicky…
遠望佢地，Vicky著左一件藍色背心加一條淺灰色熱褲，貼身既背心更展露同突顯出佢既身型，而佢仲係不經意之間露出條黑色bra帶，好有睇頭，配搭平時既ABC頭髮造型，完全散發出青春外國少女風，一種好熱情卉放既態度。相反Tiffany著左件紅色斜膊TEE配襯一條藍色窄身牛仔褲，雖然著得冇Vicky咁熱情，但都掩飾唔到佢既身段，一條黑色珠形頸鍊，一個露出額頭既髮型，淡妝但配上迷人眼線以及桃紅色唇膏，展現出一種冷艷既香港女性美，散發住一種成熟既韻味...
我不自覺咁吞左一下口水，因為今日既佢地比平時返學更加吸引...
[Sorry 呀, 我地遲到] Vicky 一個微微彎身既道歉竟然露出一條由黑色bra包圍既事業線…
原本想破口大罵既我，係佢咁既道歉下，心中既恕恨冇哂，呢種道歉...
我: [我...都係等左一陣姐，佢地兩個仲遲，要唔要買啲野飲先?]
Vicky: [好呀，頭先行入黎都唔記得買野飲]
再十分鐘後，呀俊同呀豪都到左...
呀俊: [Sor，遲到]
遲到?
我: [你地唔好再遲啲，下次可唔可以有返啲時間觀念呀!]
呀俊: [唔洗咁慶喎]
唔慶? 你試下等我成粒鐘
拍攝當日我地仲叫左班長幫手，一個肥仔黎，因為佢鐘情Tiffany，所以搵左佢幫手揸機拍攝。兵, 就係咁用架啦…
好! 人齊，開始今日既拍攝…
劇情係講我同呀豪做古惑仔就撩Tiffany同Vicky，最後長毛走出黎救佢地…
好，Action!
一出閘我同呀豪用比較調皮既古惑仔步法，慢慢行過去正在扮傾計既佢地
呀豪: [喂…靚女, 去邊呀去邊呀去邊呀去邊呀去邊呀去邊呀去邊呀去邊呀?]
呀俊大叫: [喂…豪哥, 做乜鳩呀, 修詞手法呀!]
再黎，Action!
呀豪: [喂…觀音一樣既靚女，行到揸車咁快咁趕住去邊呀?]
[Cut!!! 啲咩修詞手法黎架?] Tiffany忍唔住笑
Vicky: [呀俊作架…]
[哈哈哈...] 我講唔到野
[呀?…等我再諗諗，拍左追佢地果分段先] 呀俊笑笑口咁講
但就係因為拍追既呢場戲，又點會諗到，竟然造就左我，Tiffany同Vicky一段微妙既三角關係…
劇情非常簡單，就係Tiffany同Vicky想離開，但我地窮追不捨，最後呀俊出場救人
好，Action!!!
Tiffany: [你地唔好再騷擾我地啦]
[你地唔好走啦，等埋我地啦] 我地邊追邊態度輕佻地講
突然之間，係小食部出面一個好空曠既空間，Tiffany因為要望向我地所以絆到地下一舊突起左既石頭，佢成個人準備向前仆之濟，由於佢繞住Vicky隻手既關係，變相拉埋Vicky向前仆，但可能Vicky唔太高既關係，個馬紮得好穩，好利害咁拉返Tiffany上黎，但因為太過用力，Vicky失去重心，變左兩個準備向後仆...
精彩!
但係，情況非常之危急，我唔應該係度讚美呢場表演，因為我同佢地兩個既距離係最近，我絕對有時間救其中一個，所以，照道理我救靚啲嗰位，姐係Tiffany，然後由Vicky趺係地…
估唔到拍一次假既英雄救美片，變成一次真既英雄救美，我今次仲唔嬴哂? 經過今次，我好肯定Tiffany會加我分，諗起都興奮。
我好手咁咁上前，單膝跪低，準備雙手迎接住我心目中既Mary Jane...
但係，又點會估到既係，我抱住既並唔係Tiffany...
點解? 點解會係咁?
呢個舉動完全破壞哂我腦海既所有部署，只要抱住Tiffany，我就係整間學校所有男性所羨慕同妒忌既對象，香港版新一代既蜘蛛俠，可能仲會有一幕同場加映既經典接吻環節，但係而家，我竟然抱住呢個平凡既Vicky，我一定係比佢今日呢身造型同頭先既事業線所迷惑，如果唔係我一定唔會咁做...
但現實係我真係抱住左Vicky，我半跪狀態從後抱住Vicky，佢訓左係我強而有力既手臂，呆左咁望住我，我由佢小小紅既臉上睇得出因為我竟然選擇抱住佢而驚訝既表情，筆竟呢個英雄救美既動作，有幾多機會會出現，一種預左趺低但最後無事而流露既喜悅同感激，因心跳加速而對我仰慕既衝動，時間停左係我同Vicky既對望之中，我握住佢既肉臂，由於佢著住背心既關係，訓係我度既同時不經意地露出因心跳加速而震動得比較激烈既北半球，打從心底仰慕既眼神再配上因天氣熱而散發出既濃烈香水味…
我...有小小扯，因為我已經有好幾年未試過咁接近地接觸女仔，仲要係一個咁年輕既女仔，仲要著成咁。係呢個咁浪漫，咁勵志，咁娘既情景下，我好近距離地凝望佢，我從來都未試過認認真真望佢一眼，原來…佢都唔係想像早咁差，估唔到佢皮膚都幾白滑，手臂亦好有彈性，我以前忽略左佢，我相信今次既事發生之後，我會對呢位貌似平凡既Vicky改觀，我絕對同大部份男性既諗法一樣，呢個有身材，又性格開朗又玩得又唔介意派福利既女仔，又確實係唔少男仔既對象...
不過，係抱住Vicky既同時，我感覺到旁邊既Tiffany因趺左係地下而散發出一種具有影響力既眼神，令我打從心底裡留低左一絲牽掛，我可能明白佢既感受，係二揀一既情況下，點解你唔救我要救件扒? 呢種心情比著係我都會流露出意想不到既失望同沮喪，但係呢一刻我理唔到Tiffany，因為我而家確確實實係抱住Vicky，我亦比Vicky一身造型同表情吸引住，所有焦點都停留左係Vicky身上...
我: [你無事嘛?]
Vicky: [無…無事] 佢仲未回到神, 我感覺到佢既心跳從佢說話之中增加…
我: [無事咁你仲唔起身? 你好鬼死重…] 我微笑地隱藏住我手臂其實唔係好夠力既事實
Vicky: [啊…]
佢打左我心口一下, 起身之後就立即去探望Tiffany既情況…
Tiffany由呀豪扶起，班長，呀俊都詢問Tiffany既情況，我無直接詢問，因為我存有一絲內疚，好彩，Tiffany只係個Pat Pat撞親，其他地方咩事都冇…
而當我正想起身既時候，我感覺到我左邊膝頭有小小清涼既感覺…
Vicky : [你流血呀]
我? 所有人既焦點轉左係我身上，我望一望自己條褲，係左邊膝頭位置穿左個小洞同埋擦傷左，流左小小血，不過都唔係重點，頂，我條褲新買架...
[妖，好心唔救啦!] 我心諗…
因為呢次意外，我地冇繼續拍落去，班長同Vicky陪Tiffany返去，而我就柒住咁同呀俊呀豪去食野，食完先返屋企…
呀俊: [唔係呀…條褲咁著都幾型呀] 呀俊係行去食野果陣安慰我
真係多謝你咁真心，姐係有人會係條穿窿褲D窿度貼塊膠布囉...
搭車返去果陣，我回憶返Tiffany當時趺左係地既眼神，我覺得佢應該會嬲我，因為我無選擇救佢，我成程車都諗應該點樣同Tiffany解釋當時既情況同我選擇Vicky既理由，其實我心裡面係好在意Tiffany，始終Tiffany又係校花，係所有男仔心目中既理想對象，包括我...
於是，我發左個wtsapp比Tiffany :[今日Sorry，你仲有冇事?]
但估唔到回覆我既係Vicky...
Vicky: [對唔住呀, 你隻腳仲有無事呀?]
見到呢個女仔既訊息，唔知點解有一種好感由心入面漫延出黎，腦海突然諗返佢訓係我度既情景...
我: [隻腳無事啦，小事姐]
Vicky: [同埋多謝你今日救左我=)]
我: [唔洗咁客氣啦，應該既…我都多謝你塊膠布=)]
Vicky: [都係我唔好啦，搞到你咁樣，我買返條褲比你] 好喎，唔洗錢有新褲著!
我: [唔洗啦，你都唔想，最緊要你無事，唔洗買褲比我啦，條褲著左好耐，我都想換過條，而家穿左仲好，快啲買過，哈哈]
Vicky: [咁我搵日放學同你去買=]]
Vicky: [不過我想問你做乜會救我唔救Tiffany?]
呢個問題問得好好，我自己都諗左好耐，我亦都好想知點解我潛意識會選擇救Vicky，我諗好大可能係佢今日既造型...
我: [因為我想救你，就係咁簡單]
Vicky: [冇其他原因?]
我: [你想知啲咩?]
Vicky: [冇呀，我無諗過你會救我，你今日好Man]
我: [不嬲都咁Man，你平時太少留意我]
Vicky: [姐係你想我留意你多啲?]
我: [唔好啦，我怕你愛上我]
Vicky: [好爛，你平時都係咁溝女?]
我: [冇呀，我邊度有溝女?]
Tiffany之後有回覆我話無事，有心，我地傾左幾句之後就再無傾落去...
而Vicky，唔知係咪佢太世界女既關係，呢晚，我同佢傾左幾個鐘頭，亦都因為今日，我同Vicky打左開大家既門，感情大進左一大步...