《ASSO回憶錄》: 第六節
(6)
我望住一片漆黑既海面,同燈火通明既燒烤場有一個好強烈既對比,我心裡面好開心,一來因為Tiffany竟然選擇左我,無返到去搵Nick,二來,今次可能係我地兩個第一次單獨相處,所有聲音同感覺都聚焦係我同佢之間...
我同佢貼住旁邊既欄杆,微弱既黃光映射住我地,大家都好靜...
我同佢就好似離開左煩嚚既地方搵到一點寧靜,係呢一刻,我同佢唔需要用對話交流,我地用心靈同氣氛去感受大家既存在,我好享受同佢一齊既呢一種感覺,特別係一位咁靚既女仔,我希望時間可以靜止,永遠停留係呢一個場景入面...
不過,現實角度,我知道呢一種感覺唔能夠永恆,亦可能只係我自己一廂情願,覺得佢同我既感覺一樣,我知道如果我再唔出聲,呢個場景好快會完,我要用說話去延長呢個場景...
我: [今日好熱呀可?]
我知呢個開場比較爛,爛到Tiffany完全無回答我,佢自己打開左另一個話題
Tiffany: [頭先個女仔邊個黎?]
女仔? 咩女仔?
我: [邊個女仔?]
Tiffany: [頭先燒野食坐你隔黎果個]
我: [你講白色Tee果個? 佢叫Sandy, 同Nick佢地一齊黎] 乜原來,你有留意我
Tiffany: [哦]
哦? 呢個哦字可圈可點,見佢咁既反應,搞到我補多左幾句
我: [我同佢無野架, 佢自己坐過黎, 我都唔記得同佢講過咩…佢…] 我怕Tiffany會誤會, 所以我好詳盡咁解釋…
Tiffany : [唔洗咁口震喎, 我問下咋] Tiffany 微笑咁打斷左我既對話
我: [廢是你亂諗啦]
Tiffany: [我點解要亂諗?]
我: [咁你又問我?]
Tiffany: [咁大家係組員,又係朋友,我問下都好正常姐]
咁其他組員都幾唔正常...
Tiffany: [你都可以問下我架]
我無再深究正常唔正常呢個問題,因為都唔會有答案...
我: [咁你覺得Nick點?]
Tiffany: [人一個]
我: [唔靚仔咩?]
Tiffany: [靚仔呀,但我對佢無興趣]
我: [點解?]
Tiffany: [靚仔無本心呀]
我: [你認真?]
Tiffany: [點解係靚仔就會有興趣?]
我: [呢個世界唔係睇樣架咩?]
Tiffany: [咁你同我做朋友係咪因為我個樣?]
我: [一部份係]
Tiffany: [如果我樣衰你係咪唔會同我做朋友?]
我: [我從來同人做朋友都唔會睇樣]
Tiffany: [咁另一部份係咩?]
我: [你性格好,肯幫人,友善,有禮貌]
Tiffany微笑 :[我都知]
我: [哦,好多人都咁同你講過?]
Tiffany: [又唔係]
我: [咁你會唔會同我做朋友?]
Tiffany: [點解唔會?]
我: [咁你同我做朋友係睇咩?]
Tiffany: [肯定唔係睇樣,哈]
我: [喂我都唔係好差姐]
Tiffany: [不過同你一齊個感覺幾舒服,可能你講野太無聊]
我: [唔係無聊,只係講野唔需要諗太多,想講咩就講咩]
Tiffany: [我就係鐘意咁,簡簡單單]
突然間,腦海閃左呀俊之前講既說話,我想問一個我唔係好肯定,所以我好想知道既問題
我: [咁你同男朋友點?]
話題突然之間轉移,我感覺到Tiffany有少少錯愕...
Tiffany: [你又知?]
我: [好多人都知呀,聽講佢接過你放學]
其實我亂講,等佢以為我知道啲野,但其實我都唔清唔楚,我覺得Tiffany因為我呢條問題打亂左佢既思維,我感覺到佢腦海過濾緊啲野...
我望住Tiffany既表情,佢個頭微微檸過黎望左我兩秒,又望返個海...
Tiffany: [你想知啲咩?]
聽到呢度,我都幾肯定佢有男朋友,我之前諗既無謂野而家清楚哂,我好似放低左個包袱,雖然有小小唔開心,但我知道,既然做唔到情侶,做個好朋友等其他同學羨慕下都係一件好事,呢張卡我收...
我: [有冇佢個樣黎睇下?]
Tiffany諗左幾秒,慢慢咁打開一直係手上面既電話,搵左一陣,比左張相我睇...
我終於明白點解佢對Nick睇唔上眼,洗唔洗靚仔到咁...
佢男朋友,完全係張智霖既翻版,佢係咪開錯相呀?
我: [呢個真係你男朋友?] 我忍唔住要補問一句
Tiffany: [我知你想問咩,係]
我: [咁真係好靚仔喎]
Tiffany: [多謝,不過靚仔,未必好]
我睇得出Tiffany微笑既背後收埋左一啲野,但我呢一刻冇追問,我知道佢如果想講,自然會講出黎,佢唔講,姐係佢唔想講...
我: [拍左幾耐?]
Tiffany: [兩年]
我: [咁應該好穩定]
Tiffany 冇再講落去,我地望住前面漆黑一片既大海…
Tiffany: [不如,返去囉?]
我:[好呀]
行返去果陣…
Tiffany: [頭先我男朋友既事你唔好同人講]
雖然唔係好明白點解佢要收埋,但我理解每個人都有佢唔想分享既事...
我: [放心,我把口好守得袐密,有咩你都可以同我講架]
Tiffany微笑:[你仲想知啲咩?]
我:[咩都想知下咁啦]
Tiffany:[好似好關心我喎]
我:[咁…我地係朋友嘛]
Tiffany: [好呀,朋友,你既Vicky等緊你]
講完之後佢就行左去搵Nick, 留低左我自己一個…
我感覺到佢係有啲心事,我想關心下佢,但我覺得佢對我住有啲戒心,或者可能未太熟啦
Anyway, Tiffany離開之後我先發覺自己成晚浄係食左隻雞亦同幾粒牛丸…個肚打緊鼓
但我唔知應該坐邊度,見到所有人都有著落,我唯有求其咁搵個角落位住低燒腸仔,開心既係Vicky走左過黎陪我燒…
Vicky: [同Tiffany咁岩傾既?]
一開口就問呢樣...
我微笑: [無呀…傾下閒計姐]
Vicky: [你知道Tiffany有男朋友架可?]
我: [咁點呢?]
Vicky: [無野呀…]
我: [你想講D乜?]
Vicky: [你條腸就食得啦]
我: [係喎] 我立即搽左兩下蜜糖
Vicky: [有一條係咪我架?]
我: [你頭先都無留比我]
Vicky: [我係想留比你架, 咁岩撞到個fd咋]
我: [都知我地唔係朋友黎]
Vicky: [係呀, 我地唔係朋友,我地係好好好朋友]
Vicky講完之後成個頭訓左係我膊頭,因為佢訓落黎既同時件衫會在低左,
我忍唔到偷望左佢個波罅...
呢D功夫真係...
我: [拿隻碟黎啦]
Vicky: [知道!]
行去坐小巴既時侯Tiffany同Nick仲係傾得好開心,Janice因為要同男友去另一個地方, 所以唔方便車我, 而我,因為地完全唔順路,所以係火車站就分道揚鑣, 我就同其他唔係好熟既同學坐火車返藍田方向...
返到屋企,唔知點解好想wtsapp一下Tiffany, 仲15,16緊既時侯,我發錯一個句號比Tiffany, 我都未有時間講打錯,Tiffany就已經回返個問號比我...
既然開左頭...
我: [返到屋企?]
Tiffany : [岩岩沖完涼]
唔知下一句講咩好...
但我唔想咁就完,我又ALL IN 左一次
我: [我可唔可以約你睇戲?]
由心而發,我都唔知點解我咁大膽,但明明佢有男朋友,其實我約佢都唔會有咩進展,哂自己時間...
已讀,Tiffany一直都在線上
一分鐘後,佢離線...
......
下下賭身家,輸死你呀...
原本都打定輸數諗住打機...
Tiffany : [我想睇80分鐘死亡直播] 呢個信息係5分鐘之後先覆我...
恐怖片? 我唔得架,我好X驚鬼,我要同佢講...
我: [咁岩我想睇呢套]
做人既野假D好....