《ASSO回憶錄》: 第七節
(7)
隔左成個星期, Tiffany都無提起補償呢野樣, 我地成組人如常有講有笑, 我如常同Tiffany都係無乜幾句…
有一日放學, 大家如常講再見…
但係, 明明我同Tiffany都唔同路, 今日佢同我同一條地鐵線…
我: [你去邊?]
Tiffany: [關你咩事姐]
……
我: [咁神秘]
去到觀塘站, 我地都無再講過野…
( 下一站藍田…)
我: [我走啦, 聽日見]
Tiffany: [你返屋企?]
我: [係呀, 拜拜]
正當我想行出車廂既時候…
Tiffany: [企係度!]
我停低左腳步, 回頭望佢…
我: [呀?]
Tiffany: [你唔係呢個站落車]
我望一望出面, 明明係寫住藍田…
我: [我住藍田架]
( 車門即將關閉…dododododo…)
Tiffany: [你唔走得, 你今日要補償返比我]
下…
我: [而家?]
Tiffany: [係, 幫我拎野]
明明諗係返屋企沖涼打機…
我真係完全捉摸唔到Tiffany, 我同佢都無乜兩句, 佢竟然叫我幫佢拎野?
但係我又真係應承左要補償比佢, 無辦法…
結果, 我無落到車, 地鐵繼續行…
我: [去邊度拎?]
Tiffany: [關你咩事, 總之你跟住我]
……
我: [你係咪仲嬲緊我姐?]
Tiffany: [總之你今日係我既, 我叫你做乜就做乜]
死港女…
雖然佢今日講野特別mean, 又無黎禮貌, 不過…
能夠同到一個咁靚既女仔行街, 我覺得自己都算賺到, 賺到D尊嚴…
我: [你當我係搬運工人呀?]
Tiffany: [緊係唔係, 你高級D, 你今日係我呀四]
有咩分別…
但係Tiffany講完呢句之後補左一下微笑, 我又嬲唔落…
我地去到一間琴行…
Tiffany: [唔好意思, 我訂左一個琴…]
琴…? 仆街, 我點拎呀?
琴行職員: [係, 請你等等]
我: [我點拎一個琴呀, 咁大]
Tiffany: [你諗方法啦, 你今日係要補償比我]
我: [做乜唔叫運輸送呀?]
Tiffany: [運輸佢要收多我250蚊, 咁不如我自己拎]
睇黎我買架手推車都未必掂…
呢個世界有冇超人?
正當我仲諗緊有咩方法既時候…個職員行返出黎…
琴行職員: [小姐, 你個琴]
我望一望個琴, 車…原來係一個電子琴…
好彩, 都唔算好大姐…
我: [嚇我一跳]
Tiffany: [嚇你一跳?]
我: [我以為你買左個鋼琴…]
Tiffany: [你係咪傻架? 鋼琴點拎呀]
我: [我以為你想罰我…]
Tiffany: [哈哈, 罰你幫我拎住, 唔準整爛!]
我拎起個電子琴, 原來都唔輕, Tiffany一定拎一陣就會哎累, 都係男仔拎好D…
Tiffany: [仲有野要買]
我: [買咩?]
Tiffany: [買自己野]
成日都唔答我…
行行下, 我地行到去85度…
Tiffany: [不如食小小野先]
我: [哦, 今日你話哂事]
我地搵左個位坐低, 我幫佢買左個cheese cake同黑糖奶茶小甜, 我就叫左個黑森林同紅豆奶茶
其實我都係第一次同Tiffany獨處, 感覺有D怪, 因為我同佢交流唔多, 唔可以好似Vicky一樣咁自然…
食到一半…
Tiffany: [岩先我既語氣係咪嚇親你?]
我: [哦…原來你自己都知既]
Tiffany: [我唔惡D你點會幫我拎個琴]
其實你唔惡, 我都會幫你拎
我: [其實你係咪真係嬲我?]
Tiffany: [嬲你? 哈哈, 我做咩要嬲你?]
我: [嬲我上次講錯野…]
Tiffany: [哈哈, 講笑咋, 傻佬, 我見你無啦啦同我say sorry, 我咪諗住打蛇隨棍上]
我: [哈哈, 打蛇隨棍上你都識]
Tiffany: [聽你地D男仔講得多]
我: [咁姐係你完全無嬲過我啦喎?]
Tiffany: [無呀, 我似咁小氣咩?]
我: [你又靚又大方]
Tiffany: [但係我講左出黎你會唔會唔幫我拎個琴架?]
我: [會呀…到我嬲呀而家, 玩左我一日]
Tiffany: [哈哈, 走囉]
我: [走, 我實走! 幫你拎埋個琴就走]
Tiffany: [傻佬]
佢買埋佢D女仔野之後, 我就同佢行去地鐵站…
Tiffany: [你累唔累呀? 不如我幫你拎一陣?]
我: [唔洗, 我OK]
Tiffany: [我幫你拎一陣, 你幫我拎住袋野]
我: [哦]
當我將個琴遞比佢果陣, 佢隻手唔覺意掂到我隻手, 我心跳左一下, 我地對望左幾秒…
佢隻手…好軟, 感覺好舒服…
我望住佢個樣, 真係好有天使下凡既感覺…
我唔想等佢講Sorry, 我想件事自然D, 所以我比佢更早出聲
我: [有冇過到電?] 純粹搞下笑
Tiffany: [唔該你照照鏡先]
洗唔洗講得咁認真…
之後佢遞佢袋野比我…
唔知係咪D血上唔到腦, 我之後落黎既行為連我自己都唔知做緊乜…
我捉住左佢另外一隻手…
我: [咁呢隻呢?]
其實一D都唔好笑…不過…
佢望住我, 呆左一下…
……
佢會唔會想打柒我?
氣氛好怪, 因為我只係純粹想搞下笑, 但係佢既反應令我覺得自己好似咸濕佬…
但係唔捉都捉左, 好似搞埋落去好D…
我: [電到你個樣都呆埋呀?] 好爛既對話…
唉…死啦, 唔知佢咩反應喎, 佢會唔會下一句就鬧我, 打我一巴跟住就走?
佢有男朋友架啦, 玩咩呀係度…
Tiffany無鬆開我隻手, 我仍然捉住佢…
Tiffany: [你平時都係咁識女仔架?]
我: [唔係呀, 係對住你咋]
Tiffany: [咁你捨得拎住袋野未? 我好重]
我: [哈哈, 玩下姐, Sor Sor]
又無鬧我又無拒絕我?
但係之後佢再無出過聲…
……
唉, 屌, 我勁似咸濕佬囉…
佢會唔會因為咁而唔再理我架? 頂, 好心唔玩啦, 扮咩搞笑姐, 真心覺得自己低能, 吹多幾句就扮熟!
我同佢一齊搭地鐵, 係地鐵度, 我同佢都係講左兩,三句廢話…
( 下一站藍田…)
我: [咁…我走啦, 你一個人拎ok嘛?] 我其實好想離開呢個地方, 因為成件事…好靜…
Tiffany: [嗯, 我ok, 唔該哂你今日陪我]
我: [傻啦, 我都無做過D咩…]
我將袋野還返比佢…
但係, 我見到佢一個女仔, 揹住個袋, 又拎住袋野, 仲要拎埋個電子琴…
如果我真係走, 好似好對唔住佢…
你係咪一個真男人, 就睇而家…
但係, 岩先件事咁柒, 如果我再同佢講[不如我送埋你返屋企]…
成件事我更加似咸濕佬…
但係佢拎住咁多野…
( 車門即將關閉…dododododo…)
Tiffany: [你仲唔走? 就關門啦]
就係因為呢句問候…
我講左句好廢既廢話…
我: [我要去屯門買D野]
Tiffany: [下?]
屌…下乜鳩呀?
仆街, 仲柒過頭先…
唔係因為你, 我洗咁…
我望住佢, 騼大左自己隻眼幾秒...
我: [呀…我…突破間…醒起…要…去屯門…做D野]
我自己都忍唔住笑左下
Tiffany: [你去做野定買野架?]
我: [哎…你理我姐, 我幫你拎返袋野]
Tiffany: [唔得, 你要話我知你去屯門做乜!]
係咪個個女仔都需要問得咁清楚呀, 想送你返屋企囉…仲問…
我: [關你咩事姐, 你知唔知我地班果個呀偉同左Mancy拍拖…]
Tiffany: [下…佢地好似識左一陣咋喎]
我: [其實佢地係O camp已經玩得好埋架啦…]
Tiffany: [唔怪得知佢地…]
哈哈, 我轉移話題既能力真係高…
結果我同佢傾呢個話題傾到落車, 我幫佢拎左個琴返到佢屋企樓下, 跟住我就返屋企…
夜晚, Tiffany wtsapp 我…
Tiffany: [隻手斷左未?]
我: [痴線, 我平時起樓都係用手起, 拎個琴仔, 太簡單]
Tiffany: [你起咩樓, LEGO? 咁下次幫我拎埋個鋼琴]
我: [下, 真係有鋼琴架?]
Tiffany: [講笑咋, 多謝你今日幫我拎野=], 下次請你食野]
就係因為呢個地鐵奇緣, 我地熟左好多…