係同屋室友?定係同居密友?: (S4)02. 新加坡林明禎

苗學嬛去到果條柱，伸個頭去望一望，果然!果個男仔仍然係到，佢亦同苗學翹所形容一樣，該名男同學的確係條褲爛左，如果用飢寒交迫黎形容當時嘅佢，係真係冇用錯
 
係苗學嬛注視緊佢果時，男仔都發現左苗學嬛嘅存在
 
兩個人對咁對望住，並沒有少女小說咁，男女主角心跳加速，一見鍾情嘅場面，相反，只有苗學嬛努力忍笑，講清楚D係應該恥笑嘅場面
 
「你…拿!俾你遮住」苗學嬛將佢係hall特登帶出黎嘅風褸遞俾個男同學
 
「咦…妳點會知….」係個男仔正不解點解眼前呢個女仔會知道自已發生左咩事之時，佢嘅思想俾對方打斷左
 




「你打算成晚都坐係到丫?定係等到半夜先返hall?」
 
個男仔回一回神後，接過苗學嬛手上嘅風褸後，將佢綁係褲上，遮住爛左嘅部位，然後起身行出黎
 
「唔…唔該妳呀」
 
「唔洗，唔通要你係到等到半夜咩」
 
苗學嬛轉身同個男仔一齊行
 




男仔覺得苗學嬛有d面熟，所以鼓起勇氣各對方問「妳住咩hall架?」
 
「我住Hall three」 「我同妳一樣喎，但我好似唔太見過妳咁嘅?」
 
「我住女hall層，上個sem住雙人房，今個sem住單人房，你未見過我，或者一d都唔奇，我唔鍾意參加hall活動」
 
「咁唔怪得未見過妳」
 
佢地兩個人經連接橋行到去Hall three門口，一齊入lift。因為男同學係住男女混合層，所以同苗學嬛係唔同層數
 




「叮!」lift門打開，苗學嬛住高層，所以佢首先出Lift
 
「呀….我要點樣…」男仔未開口講完，苗學嬛已經答佢
 
「你用完件褸先啦」Lift門關上，lift內剩低男仔一個人。佢聞到lift中有陣陣香味，當佢返到房後，發現香味係來自苗學嬛件風褸，究竟係苗學嬛身上嘅氣味?定係件衫嘅洗衣液味?
 
苗學嬛返到自己房，拎起自己乾淨嘅衫後去浴室沖涼
 
半小時後，苗學嬛拎住自己嘅衫，著住對人字拖行返入房，佢將自己嘅衫放係一個小袋之中，方便聽日拎俾苗學翹返職員宿舍洗，坐係書檯前，又開始一晚嘅溫習同埋準備功課
 
另一方面，李文灝亦順利返到房，除低苗學嬛借俾佢用黎遮嘅風褸，換上條新褲後先去食晚餐
 
當晚，佢沖涼過後亦都拎起哂所有衫去洗，然後晾係自己房間晾衫嘅地方
 
果時發現，佢所聞到嘅香味，應該係來自苗學嬛身上，而唔係洗衣液




 
當佢行出去common room，搵班朋友時，佢一入到去就俾人捉埋一邊
 
「頭先果個女仔!!!你係唔係識佢!?點識佢??識左幾耐?講!」
 
「咩…咩呀?你講咩?」李文灝有點支吾以對
 
「仲想扮野!?頭先我地明明見住Marni借件風褸俾你返hall喎!!!」佢係一眾朋友下被迫供
 
「Marni?我而家先知佢叫咩名喎」
 
「下?佢你都唔識?」
 
李文灝有d糊塗「點解我要識佢?」
 




「佢咪就係文學院語文系嘅新加坡林明禎囉!!!你咁都唔識」
 
李文灝恍然大悟，原來其他人一直所講嘅語文系之花、新加坡林明禎就係剛才打救佢自己嘅女仔