係同屋室友?定係同居密友?: (S4)10. 條JJ呢

產房對門打開，連麗琴係床上被推出，而小祺就瞓係佢身邊
 
剛哺完母乳嘅連麗琴好攰，而小祺就食左奶後立即補眠，係呀，補眠好呀，長大後每個人想補眠瞓多D嘅機會都冇，除非你係柒頭
 
連麗琴合埋雙眼休息之餘，仲非常心驚，因為自己生嘅係一個女而唔係屋企一直期望嘅仔
 
由於嬰兒係女嬰關係，醫院會幫佢沖完涼後，用粉紅色毛巾包實。而果個時段，係得連麗琴一個孕婦
 
梁老太見到連麗琴推出黎，好興奮咁走過去「俾我抱下我個寶貝孫仔!!!」
 




護士見狀立即阻止，原因係嬰兒剛瞓著需要休息
 
「丫!點解唔俾人抱架，麻鬼煩!!」
 
「個孫仔剛剛瞓著，俾佢休息下啦，將來大把機會俾妳抱啦」
 
「我地一陣再入去，不過點解我個乖孫用粉紅色毛巾架?明明係男仔」
 
「可能人地唔夠毛巾者」
 




大約一個鐘後，到左探病時間，梁老太同梁奮成一齊行入去病房
 
男嬰用粉藍色，女嬰用粉紅色毛巾
 
梁老太好興奮咁衝入去病房
 
「寶貝乖孫仔，麻麻黎啦」
 
當時連麗琴幫女嬰換片中，梁老太好開心咁走過去
 




「我黎換我黎換!!!」
 
「奶奶…等陣..」連麗琴未開得切口，梁老太已經行到埋黎，當佢滿心歡喜咁想睇下條小JJ果時，佢當場呆左
 
佢眼前何來JJ?
 
「阿琴，妳做咩幫其他人個女換片呀?我個寶貝孫仔呢?」
 
連麗琴低頭不語，梁老太望清楚眼前個女嬰，明明已經同佢個仔同新抱好似樣，佢都要話
 
「一定係醫院搞錯左，叫佢地換返我個寶貝大胖小子黎!!!另外換返個字，唔係女，係仔!!!」梁老太指住去牌講，其時有護士入黎
 
「呀姑娘，呢個唔係我寶貝乖孫，我果個係大胖小子黎架嘛，妳睇!都冇慈姑靛嘅!仲有睇下!!個丫頭片子左邊臉有胎記!!根本唔係我個孫仔!!醫院一定係搞錯左!!阿琴!!放返低個女俾人!!」
 
連麗琴驚到唔知點同梁老太講，相反姑娘一片冷靜




 
「邊會有錯?妳新抱生嘅係一個女嬰，妳果個係孫女，我地醫院冇搞錯，BB出世時妳新抱確認左係女，而且果個時段，產房得佢一個用，俾埋VIP服務佢，唔會有錯」
 
「點會唔係有錯?明明係仔黎架嘛!!!佢個肚果時咁尖!!點會唔係仔!!!」
 
「阿婆，我講多次，妳新抱生嘅係女，妳果個係孫女，醫院冇搞錯」
 
梁老太瞪大雙眼望住連麗琴，佢只可以輕輕點頭
 
梁奮成企係梁老太身後，一臉錯愕
 
「唔係仔黎架咩?點會係女?」梁奮成心中默默講道
 
梁老太忍住脾氣，深呼吸左幾下。本來佢想大鬧連麗琴，不過佢見到現場有好多護士同埋病人，以免家醜外傳，佢決定忍一忍
 




梁老太見住眼前嘅女嬰，10個月黎嘅興奮同期望一次過都冇哂。佢非常嬲咁轉身就走，唔打算再留低，亦唔打算抱下佢新出世嘅孫女，連準備好嘅利是都唔打算俾，一氣之下走出病房，梁奮成跟住梁老太離開病房，只剩下連麗琴同埋佢嘅千金