係同屋室友?定係同居密友?: (S4)11. 小柔的鼓勵

連麗琴抱住自己個女低聲哭泣，佢好嬲自己，將個女帶到黎呢個世上，但佢又唔受家人重視。就連佢爸爸都唔黎抱自己個女一下，咁個女出世仲有咩意義?
 
眼淚不停流出，滴落仍然係強褓之中嘅小祺身上。小祺彷彿知道自己媽媽喊緊，於是佢就自己打開眼，對媽媽輕輕微笑
 
然後，病房床簾輕輕拉開，來者係大伯一家以及姑媽一家人
 
「細嬸!!!俾我抱下bb可以嘛?」
 
「嗯，妳小心佢個頭呀」
 




「噢~係妹妹黎架」依然著住校服嘅梁小柔，好開心嘅抱住自己個堂妹。係佢懷中嘅梁小祺，亦好鍾意佢呢個堂家姐
 
大伯一眾大人們見到弟婦生左個女，都不禁擔心起黎
 
「阿媽同阿成知道未?」大伯問
 
連麗琴輕輕點頭「奶奶知道係女之後好快就走左，佢連個孫女都唔望一眼」
 
所有人都知道原因點解，梁老太見個新抱個肚咁尖，一心以為佢係陀住個仔，如今生出黎嘅係一個孫女，佢仲邊會有心情。10年前失望過一次，到自己個女生嘅又係外孫女，如今又多個孫女，如果佢地仍然係鄉下農村生活的話，佢地一家會俾其他人睇唔起
 




伯娘坐係連麗琴身邊安慰佢「之後日子妳會好辛苦，又要湊女，又要應付奶奶同阿成」
 
大伯聽到自己老婆咁講，不免有點氣意上頭
 
「阿琴妳放心，阿媽同阿成我都同妳搞掂佢」
 
「阿琴妳而家要先坐好月、養好個身先」
 
一回想到要坐月，連麗琴都唔知道點算。原本梁老太以為有個孫仔，所以先叫連麗琴出院後直接由佢照顧自己坐月，由梁老太親自照顧佢地兩母子
 




如今佢自已生左一個女出黎，梁老太肯定唔會幫自己。而自己老公同娘家關係一般，冇可能叫外家過黎照顧自己坐月，而家請陪月都請唔切
 
「阿琴妳唔洗擔心坐月問題，我同阿妹每日都會過黎照顧妳」大伯娘同姑媽異口同聲咁講
 
有時候，梁老太對大新抱同個女嘅冷嘲熱諷，反而令佢地更團結
 
梁老太經常羨慕其他街坊有兩個甚至三個男孫，相反，其他街坊就覺得，梁老太嘅孫女梁小柔係上天送俾梁家嘅禮物。試問下一個普通家庭，有一個女不論運動、音樂、讀書上都極有天分，而且梁小柔好細個已經係一個小美人，不過係梁老太眼中，呢個長孫女做乜都係冇男仔咁好，如果自己有個男孫，成就一定會比起孫女更好
 
抱住小祺嘅小柔伸個頭過黎「細嬸!如果阿麻同細叔都唔肯照顧阿妹嘅話，妳將佢送黎我地屋企，我地會好好照顧佢。」
 
「傻女!!咪亂講野!!!」
 
係小柔懷中嘅小祺，可能知道家姐講咩，所以展露出可愛嘅笑容，不過開心還開心，小祺只係出世一日，所以佢要食好多奶。呢一刻佢又再肚餓，佢張開小口，隔住校服去咬小柔個胸
 
「細嬸，佢要食奶啦，妳要餵佢食多d呀」




 
「乖啦小柔，我會好好照顧妹妹，唔會俾佢受到委屈」
 
呢一句話，係多年後，會再一次講出黎，不過係由梁小柔講出