係同屋室友?定係同居密友?: (S4)12. 名字的由來

梁奮成幫太太係病房內執好行裝後，就連同剛出世嘅女一齊搭的士返屋企，係返佢地自己屋企
 
連麗琴清楚知道，今日開始，佢絕對唔會好過
 
的士司機見到剛出世嘅女嬰係車上，亦改為慢慢行駛，今程就做一個安全有禮貌嘅的士司機，佢仲係落車果時，對住乘客講左句「恭喜哂」
 
話佢係攞景定贈興好呢
 
連麗琴返到屋企，佢一入門口已經見到，原先佢自己嘅行李
 




可幸嘅係，BB床已經清潔好裝好
 
「張床，姐夫黎幫我地裝好左，仲有大哥送左小柔細個嘅衫黎，佢地保存得好好」
 
「嗯…」
 
「薑水煲好左，妳去沖涼先。飯同湯我都跟家姐指示煮好哂」
 
「嗯…」
 




連麗琴梳洗同用餐後，佢繼續餵母乳。因為飲左青木瓜鰂魚湯，所以連麗琴上奶好快
 
梁奮成入到房，望住自己剛出世嘅女，同佢想像中嘅畫面有極大出入，而且當日離開醫院後，佢仲俾梁老太鬧左一大輪，所以唔多唔少，都有少少嫌棄佢眼前嘅親生女
 
連麗琴望到呢一切，佢完全明白丈夫嘅心情
 
「你唔想抱佢，可以唔抱，個女仲好細，我怕你抱佢會整到佢」
 
連麗琴俾個下台階自己丈夫，不過即使係女，梁奮成都打算抱一抱佢
 




梁奮成抱起佢自己個女，望一望左邊面上嘅胎記，輕嘆一聲之後，都要接受現實
 
「以後仲有機會嘅」佢心中暗自講
 
放低個女後，佢開始繁忙嘅一日，要打電話BOOK母嬰健康院，約入境處準備拎出世紙
 
最重要嘅係，幫個女改名
 
唔怕生壞命，最怕改壞命，所以佢地都去廟祝度問一問
 
當日佢地去完母嬰健康院檢查後，順路去問埋廟祝意見
 
廟祝拎住通勝睇，再問埋時晨八字後，寫左幾個字出黎「思、婷、欣、敏、祺」
 
五個字之中揀一個做名




 
梁奮成返到屋企，同連麗琴一齊睇
 
「個女妳好用力咁生佢出黎，個名交俾妳改啦」
 
其時BB女發出聲音「ki….ki…」好似自己幫自己改名咁
 
「個女自己講左，就叫祺啦」
 
「單字一個祺呀?唔好聽喎」連麗琴係到講
 
「咁我都知嘅，中間個字等我諗下，妳去餵個女食奶先啦」
 
果一刻，bb女又係到喊，時間都差唔多啦，2個鐘食一次奶，而且食完奶後仲要去沖涼
 




係梁奮成諗到頭都大埋果一刻，屋企門鐘響起，佢打開門，係大哥一家人黎睇bb
 
「個女暫時冇野?」
 
「冇啦，所有野都搞掂哂咁滯，差在未改好名」
 
「仲未有頭緒?」
 
「去問過廟祝，佢俾左幾個未我地揀，不過我地已經揀好個祺字」
 
「中間個字呢?冇理由由梁祺掛?」
 
「我諗過叫美祺嘅…」
 
「咁咪梁美祺….」




 
大家你眼望我眼
 
果時，梁小柔同個妹玩得好開心
 
「小柔呀，妳小心d唔好整到個妹呀，佢仲係好細，咩都未成長好架」
 
「知啦媽咪!!係喎!!阿妹D衫係我細個時果D喎」
 
所有大人都望住呢兩個小朋友，於是姑媽就講出左一句話
 
「小祺，就叫小祺啦，佢地兩個一齊時咁開心」
 
於是，呢個女嬰個名，就定為梁小祺