係同屋室友?定係同居密友?: (S4)13. 被嫌棄的孩子

「嘭!!」一下清脆聲音係梁小祺屋企發出
 
「妳真係無能至極!!!生左個丫頭片子!!!生個女有咩用呀!」梁老太今日返黎，唔係黎睇剛出世嘅孫女，而係向連麗琴問罪，一向同佢地同住嘅梁老太，知道連麗琴生左個女之後，一怒之下返左連麗琴鄉下，係佢娘家不停數佢
 
因為梁老太為佢心中嘅孫仔準備左好多野，買哂衫褲之類，如今生出黎嘅又係一個女，令到自己非常冇面，好彩呢到唔係鄉下農村，否則自己會非常冇面
 
「明明個肚咁尖!!竟然又係個丫頭片子!!!妳同妳大嫂兩個女人想斷左我地梁家香火呀!?」
 
梁老太嘅咆哮令到連麗琴唔敢出聲，亦令到小祺不停咁喊
 




「妳睇下!個丫頭片子只係識喊!仲有咩用丫!!!」
 
梁奮成拎完出世紙，準備收好佢果時，梁老太見到入境處嘅信封上印住「恭喜」嘅字眼
 
梁老太一手搶過信封，睇完個名後，再扔走個信封
 
「恭喜喎?生埋個丫頭片子有咩值得恭喜呀!!」
 
梁奮成深知自己阿媽嘅性格，佢唔會唔認呢個孫女，不過想錫佢照顧佢，就肯定冇可能
 




「你睇下你個女丫，塊面仲有胎記，將來嫁唔嫁得出都成問題呀」
 
梁老太一邊評論小祺，一邊又話連麗琴湊女方法唔太好。佢放低小祺封利是後，就離開返回自己間房
 
連麗琴氹好小祺瞓覺後，自己坐低休息一下，畢竟照顧初生嬰兒係一件好攰嘅事。雖然自己奶奶唔鍾意自己個女，但係佢都已經出世，呢D可能係天意，佢而家可以做嘅，就係好好咁照顧小祺，得佢健康快樂咁成長
 
 隨住日子好快咁過，小祺由一個初生嬰兒，慢慢識發聲，擰頭，開始認得人，轉身，識爬，識行
 
係小祺兩歲半時，收到入學通知，好快小祺就要去幼稚園返學讀書寫字。到左小祺K1果時，連麗琴再一次經期冇黎
 




佢心慌慌咁再去驗孕，因為自小祺兩歲後，佢地兩公婆行房時係冇做安全措施
 
終於，格仔內出現左兩條線
 
連麗琴將呢個消息通知梁奮成後，佢地決定首先保持低調，過左排，連麗琴個肚開始尖尖咁突出，所以佢地認定胎兒係一名男嬰
 
連麗琴放下心頭大石，佢終於唔洗俾梁老太當仇人咁睇，近年來，梁老太不停叫梁奮成搵個二奶幫佢生個男孫，而家連麗琴仲唔吐氣揚眉?
 
確認左肚中胎兒係男嬰後，梁老太非常開心，佢立即裝香俾祖先
 
「祖先保佑…..梁家終於開枝散葉啦，我地梁家有大胖小子啦，個孫仔一定會出人頭地」
 
係果時，仍然唔知咩事嘅梁小祺，俾梁老太撞到跌低，再打潔左杯酒後，梁老太大發雷霆
 
「妳呢個冇用嘅丫頭片子!!!妒忌個細佬有才華!!!!我同妳講呀!!!妳細佬係我地屋企嘅一切!!!妳所有野都要讓哂佢!!!!佢係我地嘅希望!!」




 
係梁老太知道有男孫果一刻開始，小祺嘅不幸童年生活正式開始
 
當佢細佬梁國柱出世後，小祺生活情況開始變差，父母對自己態度，已經開始轉變。
 
任何玩具、食物處處都要讓細佬。雖然連麗琴講小祺知道佢已經係家姐，一定要讓細佬，但小祺心諗點解以前屬於佢嘅野，要全部分哂俾細佬
 
當兩個小朋友漸漸長大，梁國柱知道自己受到屋企寵愛，所以不停蝦佢家姐
 
小祺雖然係讀書上非常成功，當佢考試測驗滿分返屋企時，父母都唔正眼望佢一眼
 
係小祺9歲果一年，情況變得一發不可收拾…..