係同屋室友?定係同居密友?: (S4)15. 驚動學校

由於小祺仍然係小學生嘅關係，所以救護員不敢怠慢，以穩定又快嘅車速將小祺送去瑪麗醫院急症室，幸運嘅係，小祺已經打開雙眼，所以唔需要R房
 
救護員將小祺過床，然後推佢入診症格之中，因為佢係小朋友，所以等候時間係0。一個救護員就拎起小祺本學生手冊去登記
 
醫生同護士慢慢幫小祺檢查，醫生一睇小祺手同腳上嘅傷，就已經知道發生咩事，當然，要小祺親自同醫生講
 
不過小祺會唔會開口就係另一回事，不過醫生都係吩咐兒科病房準備收症，而急症室係小祺File上就寫左「家暴」兩個字
 
上到兒科病房，助理嘅阿姐細心咁幫小祺沖涼，而佢套校服就唔可以洗住，因為好大機會成為證物。當阿姐幫小祺除衫果時，佢地都嚇一嚇，小祺基本上全身都係傷痕。兒科醫生百份百肯定係虐待個案，所以佢通知醫務社工上黎處理個案
 




醫務社工到場後，決定暫時唔打俾小祺屋企，因為佢地係涉案人士，所以，社工決定打去小祺學校
 
社工跟住小祺手冊上嘅電話打去學校，唔知係好彩定唔好彩，大部份老師都未放工
 
「你好，北角官立小學」
 
「你好呀，我地呢到係瑪麗醫院兒科病房，貴校有一名女同學，梁小祺較早前俾人發現倒卧係北角電器道公園，由經過嘅途人報警送院，經我地急症室初步治療後交俾我地兒科跟進。急症室醫生同我地兒科醫生都一致認為涉及虐待成分，所以想請貴校老師同校長到醫院同院方會面」
 
職員一聽到係醫院打黎，好快就報知校長、駐校社工以及班主任，校方以最快速度去到瑪麗醫院。佢地一去到病房果時，小祺自己係到休息
 




校方人員去到會議室，醫生將報告交俾校方人員睇果時，所有人都嚇一驚
 
「呢個係小祺傷勢?」班主任問
 
「冇錯，所以我地先肯定係虐待個案，我地仲未通知病人屋企」
 
「小祺有冇講任何野?」班主任問
 
「傷者仲未同警方落口供，所以我地想請校方了解事件先」
 




「我諗要通知埋細佬嘅班主任黎了解事件，好可能涉及同校嘅細佬」
 
「我地可唔可以探下傷者?」
 
佢地去到小祺嘅單人房，由門口望入去，小祺已經食左飯，係床上瞓緊
 
「呢d係傷者被發現時嘅物件」
 
校方人員慢慢睇，有幾套校服、便服、今個學年嘅書，仲有一張染滿血跡嘅成績表
 
班主任見到小祺成績表上充滿血跡同埋皺哂，仲有佢套校服同樣染有血跡，佢忍唔住轉身喊出黎，要同事扶去休息
 
見慣大場面嘅校長心情非常沉重，依教育局指引，佢要立即通知社署同警署，一般嘅校長會左右為難，保住校譽定係保護學生?但係佢地學校係官立小學，所以佢冇任何顧慮，冇辦學團體嘅壓力
 
「姑娘，麻煩妳叫警察上黎，我地學校要報案」




 
十分鐘後，駐院警察上到黎，佢地帶埋CID黎檢視證物
 
「請問有冇通知傷者屋企人?」
 
「冇，我地懷疑係屋企人對我地學生施行虐打」
 
「有咩原因令校方會咁諗?」
 
「因為以我地所知同觀察，傷者屋企係極之傳統嘅人，非常重男輕女。傷者係我地學校讀3年書，由小一到而家小四，基本上所有野都係二手，但係傷者細佬今年小一，但全部野都係新，而且傷者早年有篇作文係『我的家庭』佢係寫唔出任何野，寧願0分」
 
CID拎哂資料後，要求學校先同傷者屋企人會面，所以校長等人不敢怠慢，打算星期一返學時請連麗琴去會客室見一見面
 
不過校長首先打電話俾副校長等人，叫哂所有老師聽日返學校開緊急會議